محمد الطيب الأمين: الخبز ليس عند خبازه

* أهم (7) لاعبين في كشف الهلال حاليا (5) هم : (محمد مختار بشة وبشة الصغير والصغير بشة .
* وبما أن ذلك كذلك يجب أن يجد هذا اللاعب الاهتمام اللازم من قبل الجهاز الفني .
* تجهيز بشة والاهتمام به وحسم أمر تسجيله من الآن مهم جداً .
* لأكثر من سبب تقطعت مشاركة بشة في المباريات الأخيرة ونأمل أن يتم تجهيزه من خلال المباريات الودية القادمة استعداداً لمباراة القمة .
* ونأمل أن يكون ما يتردد عن بشة وعلاقته بالجهاز الفني مجرد شائعات .
* نتمنى ذلك .
* المهم .
* بصوته السعيد غنى الطيب عبد الله : (مسكينة المحبة البتمشي لناس ما بتقدر) .
* مرات بتحب زول حب غير عادي وبتكتشف إنو الزول ده لا بقدر حبك ولا بقدرك أنت ذاتك .
* زول جاهل في أمور الريد والعشق .
* وأعتقد أننا حتى في مجال الحب نحتاج أن (نعطي الخبز لخبازه).
* في ناس بنديهم (عجين الريد) ولكنهم لا يفقهون في (خبز المحبة) .
* ولذلك نظرية الخبز لخبازه لو عملنا بها في عموم حياتنا لحققنا نجاحات باهرة .
* ولعل أكثر ما أضر نظام الرئيس المخلوع البشير هو أنه كان يمنح الخبز لغير خبازه .
* وأيضاً هذا ما أضر الهلال في وجود الكاردينال .
* الخبز في عهد الكاردينال يخبزه من هم يجهلون أبجديات الخبز .
* والعواسة في الهلال تظهر خلال فترة التسجيلات بشكل لا يشبه الهلال .
* منذ الآن يجب أن يضع المجلس يده علي الأجانب الذين ينوي التعاقد معهم .
* يحتاج الفريق لثلاثة أجانب نتمنى أن نحسم أمرهم مبكراً لأن الوقت يمضي .
* مع إن مباراة القمة متبقي لها (13) يوماً، إلا أن كثيراً من أهل المريخ فارق النوم عيونهم.
* من الآن يضعون أياديهم في قلوبهم خوفاً من الهلال.
* وخوف المريخ من الهلال (عادات وتقاليد).
* ما جديد.
* خوف معاصر.
* وغايتو جنس غايتو.
* الاهتمام المتعاظم والجدل الكثيف والعربي الكثير الذي صرفه الناس فيما يتعلق بـ(قميص حمدوك) يؤكد أن أهل المؤتمر الوطني قد راح لهم الدرب فعلاً وقولاً .
* خلو زيارة حمدوك للفاشر وخلو أهداف الزيارة ومسكوا في القميص.
* (كم قصير) و(كم طويل) .
* يعني هي بقت على القميص .
* زمان ناسكم كانوا بلبسوا اللبسات السفاري والبدل ومراكيب النمر، عملوا شنو يعني؟
* حمدوك ده لو لبس تشيرت ما عندنا مشكلة .
* الكرفتات والبدل خليناها ليكم أنتو .
* حاجة تكسف .
* مطلع كل شهر هنالك شكوى من غارزيتو ضد المريخ .
* يحلوا مشكلة يظهر ليهم بمشكلة تانية .
* غارزيتو ده شكلو كان بيدرب المريخ بالدين .
* (17) شكوى وتهديد وقصة طويلة .
* غارزيتو حتى القهوة الشربها في مول عفراء يحاسب بها المريخ الآن .
* كل يومين تلاتة بتذكر ليهو حاجة جديدة .
* والله صحي .
* أحسب من الآن شهر لقدام ح تسمع : (غارزيتو يشكوى المريخ).
* غايتو يحلكم الحل بلة .
* وكمان المدرب الجزائري (الشنبو أكتر من نجيلة إستادكم) برضو عندو شكوى .
* أي مدرب يتعاقد معاهو المريخ بجهز الشكوى قبل ما يوقع على العقد .
* أكتر اسم تردد على الفيفا خلال السنوات الأخيرة هو المريخ .
* يطيروا من التمهيدي وياكلوا قروش المدربين .
* هو هسه عليك الله لو ما ساي إرادة وقسمة فريق بيطير من التمهيدي لشنو بيجيب مدرب أجنبي ؟
* التمهيدي ما داير ليهو أجنبي .
* بوبار عجيب .
* وبوباركم ده علي بالنعمة ينزلكم دوري التانية .
* وتبكوا بس .. عين قطرة وعين مس .
* من أهم أسباب نجاح تسجيلات الهلال إبعاد الكاردينال من هذا الملف .
* يوفر القروش ويقيف بعيد .
* لا عندك شغلة بيشطبوا منو ولا عندك شغلة بيسجلوا منو .
* أدفع وزح بعيد .
* وحتى اللاعبين المنتهية عقوداتهم يجب أن لا يجلس معهم الكاردينال .
* التفاوض فن وهذا الفن لا يجيده الكاردينال .
* وعشان ما نفقد لاعب تاني زي ما فقدنا محمد عبد الرحمن وبكري ياريت الكاردينال ما يجلس مع اللاعبين المفكوكين وتحديداً بشة .
* ونأمل ونتعشم في حسم أمر أمبومبو بأسرع ما يمكن .
* أمبومبو لاعب جيد وموجود في كشف الهلال الأفريقي.
* يجب معاجلة مشكلته حتى يعود ويسهم في تعزيز خط الهجوم قبل المجموعات .
* موضوع أمبومبو قروش بس .
* ادفعوا ليهو وخلوهو يرجع .
* عندو أي مشكلة خلاف القروش .
* المرحلة تحتاج قروش وحكمة وفهم إداري .
* التخبط ما حبابو .
* والشتارة في معالجة الأمور برضو ما حبابا .
* ونركب صافنات ونجيبه (جموعية) وأصلو الزول بيموت والذكرى تفضل حية.
* و..و..
* والله في.