محمد الطيب الأمين: انت قلت (بطانية) وألا بطارية ؟

* يحفظ المجتمع السوداني (نكتة) ظريفة وذكية حدثت داخل (القطر) قبل (وفاة) السكة حديد ..
* وفي النكتة.. بوليس مكافحة المخدرات التابع لشرطة السكة حديد عثر على (بطانية وبداخلها عدد من قناديل البنقو) ..
* والدنيا شتاء ..
* (البطانية) داخل القطر ولكنها في (حتة بعيدة) ..
* البوليس وبعد أن تأكد عن طريق (الكلب البوليسي) أن البطانية (محشية بنقو) ولم يجد شخصاً بالقرب منها، إضطر البوليس أن يسأل ..
* وبالفعل قال : (يا جماعة البطانية دي لقينها هنا .. حقت منو) ؟؟
* الجماعة لبدوا ..
* تاني كرر السؤال: يا جماعة البطانية دي حقت منو ؟؟
* في واحد شليق شلاقة شديدة وأظنو كان بردان قام قال ليهو: دي بطانيتي أنا يا جنابو ..
* قال ليهو : دي بطانيتك ؟؟ قال : أي ..
* مسكو البطانية في يدو وقال ليهو تعال طيب ..
* ساقو (غرفة الشرطة) وقال ليهو : أفتح البطانية ..
* فتح البطانية لقى فيها بنقو طوالى نطة وقال ليهو : أنت قاصد بطانية وألا بطارية يا جنابو ؟
* أقسم بالله يا جنابو أنا قايلك قاصد (بطارية) .. البطانية دي ما حقتي ولا بعرفها ..
* نكر ..
* وأصلاً الشينة منكورة ..
* عمك عمل فيها إنو ما سمع كويس ..
* سمع البطانية (بطارية) ..
* وبما أن (هذا هو هذا) فان المريخ الآن يفعل شئ يشبه هذا ..
* المريخ مشى لعب في دنقلا مباراة إحتفائية أثناء فترة الراحة ..
* ولما الإتحاد العام فتح تحقيق في الموضوع الجماعة (نكروا المريخ) عديل ..
* قالوا اللعب في دنقلا ده ما المريخ ..
* والله صحي ..
* قالوا ده ما المريخ ..
* إحنا عينا في سيف تيري ومحمد عبد الرحمن وبيبو .. وهم قالوا لينا ده ما المريخ ..
* نكروا حطب ..
* يكون شبه ساكت ..
* يخلق من الشبه أربعين ..
* ناس المريخ قربوا يقولوا لشداد: أنت قلت بطانية ولا بطارية يا بروف ..
* إنت قلت (مريخ ولا بطيخ) يا بروف ..
* اللعب في دنقلا ده (البطيخ) وليس المريخ ..
* وغايتو جنس غايتو ..
* رفض الكاردينال للمرة الخمسين أن يخيب ظن الذين اتهموه و(نحن منهم) بأنه لا يسجل في الغالب إلا اللاعب المنتهي عقده مع فريقه ..
* أكد الكاردينال ذلك أمس بضمه للاعب العادي كونتاك ..
* كونتاك عندما خرج من غرفة الهلال قبل أسبوع قالوا إن الهلال صرف عنه النظر لأسباب فنية ..
* وبالأمس تم قيده لأسباب غير فنية ..
* اللهم إلا يكون كونتاك في فترة الاسبوع دي (طور مستواه) ..
* زول قبل أسبوع تم رفضه فنياً فكيف يتم تسجيله بعد أسبوع ؟
* هنالك تخبط واضح في ملف التسجيلات رغم أننا نستبشر خيراً بالأجانب الجدد وعلى رأسهم المدافع الكاميروني ..
* تحاشى الكاردينال النجم سليم لأن ناديه طلب قروش، وتحاشى مؤيد عابدين ظهير التبلدي العصري وسجل كونتاك الطاعن في السن ..
* لا نملك الآن إلا ان نتمنى التوفيق لكونتاك بما أنه أصبح أمرا واقعا ..
* وكذلك نتمنى التوفيق للأجانب الجدد ونرجو عدم الاستعجال في الحكم عليهم ..
* كما نتمنى من الجهاز الفني أن لا يستعجل في الدفع بهم في قمة الامارات ..
* الاستعجال سلاح ذو حدين ..
* المهم ..
* ما زال المريخ الشهير ب(المدفور) يخدع جماهيره بالشكاوي..
* المريخ في شهر واحد داير يمشي الفيفا تلاتة مرات ..
* الفيفا عندهم زي السوق العربي ..
* لو (حمرت ليك لمريخابي) ممكن يهددك بالفيفا ..
* قبل اسبوعين قالوا ماشين الفيفا بعد رفض الاستئناف الذي قدموه عقب رفض شكواهم التي كتبها أيمن عدار (غلط) ..
* قالوا بمشوا الفيفا ..
* قبل عشرة أيام برضو قالوا ماشين الفيفا بخصوص جمال سالم الذي انتقل للهلال ..
* قالوا عقده لسه ساري ..
* ساري منو ؟
* ساري الليل وألا شنو ؟
* قبل يومين قالوا ماشين الفيفا بخصوص رفض الاتحاد تسجيل الثنائي البرازيلي ..
* يعني الفيفا دي تخلي أي حاجة وتقعد تشتغل قصاد فريق اسمو المريخ ملقب بالمدفور ..
* فيفا شنو عليكم الله البتمشوا ليها انتو ؟
* الفيفا في التلاتة شكاوى دي بتشيل منكم حوالي عشرين ألف دولار ..
* عشرين ألف دولار تعادل حوالي مليار ..
*وانتو لو عندكم مليار ما كان أمير كمال اتجنن عليكم ..
* عشان بطلوا التخدير وارح ننقابل في الامارات ..
* جمهوركم ده شبع تخدير والله ..
* وين شكوى شيبوب ؟
* المريخ إذا أراد أن يحافظ على وصافته عليه أن يركز في الملعب ويترك خزعبلات المكاتب ..
* لو دايرين تحافظوا على وصافتكم ومشاركتكم مع الهلال في الأبطال (صحبة راكب) عليكم بالتركيز في الملعب وترك التباكي والخزعبلات ..
* عموماً.. الشعار الذي سيلعب به الهلال قمة السوبر جميل وأنيق.
* وهو شعار تنتهي صلاحيته بنهاية الديربي لأن فيه صور للشيخ زايد ..
* نتمنى أن يعمل المجلس على تصميم شعار بذات المواصفات والجمال ..
* ويا حبذا لو بقى عندنا شعار (كم طويل) ..
* الكم الطويل فيهو أناقة وأبعاد جمالية ..
* ونركب صافنات ونجيبة (إماراتية) واصلو الزول بيموت والذكرى تفضل حية ..
* و..و..
* والقلوب الحايمة حولك بتتمنى ليك …..(وصافة دايمة) ..