محمد الطيب الأمين: تبكوا بس .. عين قطرة وعين مس !!

* أهلنا بيقولوا : (دار أبوك كان خرب شيل ليك عود) أو فيما معناه .
* المثل بسيط ولكنه عميق جداً .
* ما تطلع ساي لو دار أبوك خربت .
* شيل ليك سرير أو مروحة أو برميل .
* وبما أن (هذا هو هذا) أعتقد أن (دار المريخ خربت) .
* ودار المريخ كان خربت شيل ليك منها لاعب .
* يمر المريخ بظروف بالغة السوء .
* كل الجوانب في المريخ مظلمة .
* وأكثر هذه الجوانب ظلاماً هي الجوانب المالية .
* حالة من الفلس والفقر يعيشها المريخ بعد سنوات من الترطيبة والرطوبة والثراء .
* في عهد جمال الوالي الشهير بـ(عزو) عاش المريخ سنوات فيها كثير من الترف والبذخ .
* اتنعموا بقروش الحكومة .
* كانوا بياكلوا التفاح والانناس في التمارين .
* بقوا يفتروا علي الموز .
* شغالين تفاح وعنب بس .
* والله لحدي الآن بتذكر (التورتة) الجابوها في عيد ميلاد الحضري .
* جابوا للحضري تورتة نص فدان عديل .
* شدة ما كان عندهم قروش بيحتفلوا بعيد ميلاد كل لاعب .
* كل يوم تورتة .
* وكلو بي قروشنا .
* قروش الشعب .
* جابوا وراغو بخمسة مليارات وخلوا أئمة المساجد يتكلموا في القروش المهدرة .
* جابوا الحضري بمبلغ مالي ربما يعتبر هو الأعلى في تاريخ الحضري .
* عاشوا نعيم غريب لدرجة إنو بلة جابر كان يفتري علي الهلال وهو يقول : (ما بخلي البوفيه المفتوح في المريخ وامشي محل الطعمية) .
* كان يقصد الهلال .
* المريخ في عز عنفوانه المالي الحكومي أفشل كثير من الصفقات للهلال .
* صفقات محلية وافريقية افشلها المريخ حتي لا يستفيد الهلال .
* وصلنا مرحلة بقينا لما نرشح لاعب المريخ بيجري جري لوالد اللاعب ووالدته .
* يغريهم بالمال والهدايا .
* نحن نرشح وهم يمشوا لوالد اللاعب .
* كثير من المواهب كان جمال الوالي سببا في عدم تسجيلها بالهلال .
* صحيح أن الهلال في مرات كثيرة يكون سببا في مساعدة جمال الوالي بطريقة غير مباشرة .
* صلاح إدريس والتجاني ابوسن ساعدو جمال في موضوع طمبل .
* مشى اورلاندو وجا لعب في المريخ .
* الكاردينال وعماد الطيب ساعدو المريخ في موضوع التش وبيبو .
* ولكن الحقيقة أن جمال الوالي الذي كان مدعوما من الحكومة السابقة اجتهد كثيرا في سبيل تدمير الهلال .
* كل حاجة بدمر الهلال جمال الوالي عملها .
* حتى مبارياتنا الأفريقية جمال الوالي وحاشيته تدخلوا فيها .
* مازيمبي جا عشان يلعب مع الهلال قاموا ناس جمال الوالي جابوا لمازيمبي تفاح في التمرين .
* جمال الوالي سجل هيثم مصطفى عشان يعمل فتنة في الهلال .
* ونجح وعمل الفتنة .
* شال السماني الصاوي من جوة غرفتنا .
* عمل كل حاجة .
* ومع ذلك ظل الهلال هلال والمريخ مريخ .
* رغم كل حاجة المريخ فشل يبقي هلال .
* عملوا حاجات مشروعة وغير مشروعة وفي النهاية احتفظوا بالوصافة .
* مجرد ضل .
* ونحن والله ما بننسى الحركات العملها الوالي في الهلال .
* وأعتقد جا الوقت المناسب أننا ناخد حقنا .
* في الهلال الوضع المالي ممتاز .
* المشكلة في الهلال أن القروش رايحة في المواسير .
* الكاردينال عندو قروش لكن إدارته للقروش فيما يتعلق بفريق الكرة إدارته سيئة جداً وفاشلة جداً .
* الآن الفرصة مواتية عشان (نشيل عود من دار المريخ الخربت) .
* صحيح الهلال ملئ بالمواهب ولكن كمان البحر ما برفض الزيادة .
* هنالك خمسة لاعبين بالمريخ يمكن أن يلعبوا في الهلال .
* وحسب علمي أن اثنين من هؤلاء الخمسة عقوداتهم ستنتهي بعد أيام .
* والغريبة الخمسة ديل هلالاب .
* هلالاب لمن غلط .
* نرجو من الكاردينال أن يدخل معهم في مفاوضات سرية ومباشرة .
* لن نذكر الأسماء ولكن اللبيب بالإشارة يفهم .
* المريخ ده لما تلقى فيهو فرصة ما تخليهو .
* لقيت فرصة طوالي أضرب .
* إدارة الهلال لابد أن تتعلم الشفتنة .
* الخبث مطلوب في كرة القدم .
* بسبب أخطاء إدارية ضم المريخ عدداً من اللاعبين الذين يشبهون الهلال .
* الآن الفرصة كبيرة لتصحيح هذه الأخطاء .
* نسجل العقدو منتهي ونقنع القعدو ما منتهي بعدم التجديد للمريخ .
* أو ممكن نعمل كبري لبعض اللاعبين .
* المهم .. المريخ يحاول يبني فريق وضم بعض اللاعبين الذين يمكن أن يشكلوا (عضم للفريق) .
* يلا نحن نستهدف (العضم) ده .
*والكاردينال لو أشتغل في الحتة يمكن أن يعيد توازنه .
* يا كاردينال أرفع شعار (دار أبوك كان خربت شيل ليك منها عود) .
* وتبكوا بس .. عين قطرة وعين مس ..
* ونركب صافنات ونجيبه (تعايشية) وأصلو الزول بيموت والذكرى تفضل حية ..
* و..و..
* وبرضو أسأل من قلوبنا بتلقى فيها …. (حب ميت) .