محمد الطيب الأمين: بقى فوق مع ناس الشعيرية وصابون لوكس !!

* مثل (شاي اللبتون).. طلب الرجل من زوجته أن تربط (البصلة) بخيط رفيع ثم تضعها في الحلة لفترة زمنية لا تتجاوز الدقيقة ثم تخرجها وتحتفظ بها في التلاجة ..
* شاي اللبتون مع الموية الحارة (بيحل) في أقل من دقيقة ويمكن أن تحتفظ به بعد ذلك ..
* والبصل الذي هو دون البصائر أصبح أغلى من التفاح الذي هو معدوم أصلاً ..
* البصل شدة ما بقى عزيز أصبح يوجد في (رف الدكان) مثله ومثل الساردين والمربى وباقي الطيبات ..
* زمان البصل تلقاهو مفروش في الأرض (مع ناس) الطماطم والتبش والشطة الخضراء ..
* وهسه البصل بقى من أصحاب المقام الرفيع فتجده أعلى الرفوف (مع ناس) صابون لوكس والشعيرية ..
* قريباً جداً سيصبح البصل بالجرام والسكر بالحبة والزيت بالنقطة ..
* وحكمة الله النسوان في البيت لما يقطعن البصل ببكن بدموعهن والرجال في السوق لما يشتروا البصل برضو ببكوا ..
* البصل لما تشتري بتبكي من غلاوتو ولما تقطعو بتبكي من حرارتو ..
* في الحالتين البصل يستدعي دموعنا ..
* ولا أعرف لماذا تذكرت البصل وأنا أكتب عن المريخ ..
* ربما العلاقة تبدو في أن المريخ بكى في يوغندا وسيبكي في الجزائر ..
* في الحالتين المريخ باكي ..
* كلما أحس بزهج وضيق تجدني أبحث عن فيديو ملخص مباراة المريخ والوحدات الأردني..
* هذا الفيديو يحقق لي كثير من السعادة والتوازن ..
* نفسياً كده برتاح ..
* أصلاً في (سبع) حاجات بتريحنا نفسياً (خمس) هي : مباراة الوحدات الأردني والمرتبات والرغيف الما فيهو صف..
* الواحد فينا بقى لما يلقي فرن ما فيهو صف بتلفت براهو ..
* والله صحي ..
* بتحس إنو رغيف بدون صف زي الحاجة الحرام ..
* بتحس إنو ما حلال ..
* الصف أهم من الرغيف ..
* المهم ..
* الأجواء في الجزائر باردة جداً ..
* البرد تاريخياً ما بنفع مع المريخ ..
* المريخ في الجزائر سيواجه البرد كخصم أول ..
* وأي برد يعني خسارة المريخ برقم كبير ..
* المريخ في الشتاء ما بلعب ..
* ولذلك ننصح أخونا أيمن عدار بأن يجهز شكوى مضمونها (البرد) ..
* بس أهم حاجة الشكوى تكون صحيحة ..
* صحيحة وواضحة ..
* وأنا عندي ليكم اقتراح ..
* زمان في المدرسة لما يكون في (تسميع) بندبل الملابس خوفاً من (الدق) ..
* بنلبس ملابس كتيرة وبنسميها (كركاسة) عشان تخفف لينا ألم السوط ..
* وبما أن ذلك كذلك نقترح للإخوة في نادي المريخ الشهير بـ(المدفور) أن (يدبلوا الملابس) ..
* ألبسوا شعاركم (الاصيفر) داك وألبسوا بفوق عليهو شعاركم الليموني وبي فوق عليهو ألبسوا الشعار الأحمر الفيهو صورة شيخ زايد ..
* أصلاً الشعار الفيهو صورة شيخ زايد ده كرهتونا ليهو ..
* أنتو قايلين يعني لو لبستوا صورة شيخ زايد دي كتير ح يدوكم قروش ولا شنو؟
* حركات كسير التلج دي ما بتنفع ..
* ما خلاص لبستوا الشعار ده في كأس السوبر وأدوكم (100) ألف دولار والموضوع انتهى ..
* تاني شنو ؟
* ما تبقوا للإماراتيين في حلقهم ..
* لحدي هنا والموضوع انتهى ..
* لبستوا الشعار وقبضتوا الدولار مع إنكم ما شلتوا الكأس ..
* الحاجة لما تكتر ما سمحة ..
* طلعوا شعاركم (الاصيفر) داك وأطبعوا فيهو صورة جمال الوالي وأبقوا مارقين ..
* وبعد تطيروا من البطولة العربية راجيكم الدوري الممتاز ..
* وأنا عندي إحساس كبير إنو المريخ السنة دي ما بتأهل لدوري النخبة ..
* حدكم دور المجموعتين بس ..
* عندي إحساس كده ..
* وأي زول طبعاً حر في (محاسيسو) ..
* وغايتو السنة دي بالذات يا متنا من الضحك ويا كمان الضحك كتلنا ..
* بال رايق ومرتاحين غلبنا رايح وجاي واليوم نغلب هلال كادوقلي ونمشي تونس بإذن الله غالبين ونجي الجوهرة وبحول الله غالبين ..
* وكان أنتو اتأهلتوا لدوري النخبة وما طرتوا من دوري المجموعتين بنتقابل وبرضو غالبين ..
* وحقيقة عندي طلب صغير ..
* بطلب من الأخ محمد جعفر قريش أن يتمسَّك بحقه الشرعي ويواصل في المجلس ..
* قريش أقوى من الحملات الإعلامية ..
* جا بالصندوق ويجب أن يكمل فترته ..
* أصلاً كده كده المريخ قاعد يطير من التمهيدي ..
* طيران التمهيدي ما عندو علاقة بقريش ..
* وغايتو الله يكفينا شر (المصدي) اللمعتو الأيام ..
* ونركب صافنات ونجيبه (جزائرية) وأصلو الزول بيموت والذكرى تفضل حية ..
* و..و…
* والجاب لي أخبارو وقال ….(شلباية أخد الجنسية الجزائرية).