محمد الطيب الأمين: هل يعلم الكاردينال أن للزبادي فترة صلاحية ؟؟

* إذا كان هنالك (دم) عبارة عن (شربات) كما غنى وردي عليه الرحمة فهو (دم) النجم الكبير واللطيف محمد هنيدي ..
* في مرات كثيرة أحس أن (شريان وعروق) محمد هنيدي يجري فيها (شربات) وليس (دم) ..
* فهو إنسان ظريف ومجرد أن تشاهده تستدعي الضحك أو بالأصح (الضحك يستدعيك) ..
* وأعتقد أن أي دولة في العالم فيها زول (كوميدي) بيضحك البلد كلها ..
* مصر فيها محمد هنيدي وحسن حسني وأحمد حلمي ..
* الكويت فيها عبد الرحمن العقل وإنتصار الشراح وحسن البلام ..
* السعودية فيها ناصر القصبي ..
* والسودان فيهو محمد المهدي الفادني والمريخ وجمال حسن سعيد ..
* المريخ في السودان عندنا زي محمد هنيدي في مصر ..
* والله صحي ..
* تضحك بس ..
* أي حاجة في المريخ بضحك ..
* منذ التأسيس .. المريخ بيضحك فينا ..
* من زمن (نجمة فكتوريا) ومرورا بـ(أبو العائلة الهلالابي البقى رئيس المريخ) و(زيكو الشال الكورة) و(العارف عزو مستريح) و(سباعية الوحدات) و(شكوى عدار) وإستئناف (القانونيين) وصولا إلي الأخ جمال سالم ..
* كوميديا في كل شئ ..
* تضحك في الملعب وتضحك على صفحات صحفهم وتضحك في مواقع تواصلهم ..
* غايتو عاملين لينا جو ممتاز ..
* قبل ما يظهر جمال سالم مع الكاردينال قالوا (المريخ يفاوض جمال ويجدد عقده) ، وبعد ظهور (الصورة) قالوا (أصلا المريخ ما كان داير يجدد لجمال) ..
* والليلة لو أمير كمال لبس (الكسكتة) ح يقولوا ليك (أمير كمال كبير) ..
* وهكذا ..
* هم كده .. في كل الأحوال مُضحكين ..
* المهم .. جمال سالم خارج كشف المريخ في عملية أطلقنا عليها إحنا أولاد حلتنا إسم (إحنا في الدمعات غرقنا وإنت زي ما حاسي بينا) ..
* بعد كده تسحبوا الجنسية ولا تخلوها دي حاجة تانية ..
* ده موضوع جانبي ..
* نتناقش فيهو في وقت تاني ..
* بس الحقيقة إنو جمال سالم لن يحرس مرمى (المدفور) ..
* آخر مباراة ليهو كانت في الفاشر ..
* تاني جمال سالم ده لو إشتقتوا ليهو شوفوهو في (قناة الهلال) ..
* يوميا من الرابعة عصرا وحتى السادسة ونصف ستشاهدون جمال سالم على شاشة قناة الهلال ..
* الولد ولدنا والقناة حقتنا ..
* والتشليع مستمر ..
* أنا والله مشتهي أشوف أمير كمال بشعار حي العرب بورتسودان ..
* مشتهي الحاجة دي ..
* وأى زول طبعا حر في (إشتياهاتو) ..
* لكن لازم نعمل مفاضلة ..
* نسجل أمير كمال في الهلال ونطلع كولا إعارة لحي العرب ؟ ولا أحسن نسجل أمير كمال في حي العرب ونخلي كولا قاعد في الهلال ؟؟
* دي كلها خيارات ..
* طيب النعسان نوديهو نسجلو في الأمل عطبرة ونشيل (سليم) ولا أحسن نقدم النعسان هدية لأهلي الخرطوم ؟
* برضو خيارات ..
* أها طيب ضفر كيف ؟؟
* أنا حسب وجهة نظري الخاصة شايف إنو يفترض الكاردينال يجدد عقد ضفر مع المريخ كهدية بمناسبة (عيد الأم) ..
* أو بمناسبة (عيد المورينغا) إن شاء الله ..
* جدد لضفر ومدد ليهم عقد صلاح نمر سنتين تلاتة كده ..
* صلاح نمر ده يا الكاردينال جدد ليهو عقدو مع المريخ بمناسبة (اليوم العالمي للمسرح) ..
* وغايتو السنة دي بالذات يا متنا من الضحك ويا كمان الضحك كتلنا ..
* المهم ..
* فشل الطب في إيجاد حل للسيطرة على (دماغ ولسان) الإنسان بعد (البنج) ..
* (البنج) في حد ذاته إكتشاف عظيم وإنجاز طبي لا يستهان به ..
* قبل ظهور (البنج) كانت كل العمليات تتم (رجااااله كده) ..
* عندك وجع ضرس تمشي تفتح خشمك يقلعو ليك الضرس بكماشة وبدون بنج ..
* أمسك لي وأقطع ليك ..
* الطب إكتشف (البنج) ولكنه فشل في إيجاد حل لما يسمى بـ(الهضربة) التي تأتي عقب (البنج) ..
* (البنج) لما يفك الزول بتكلم بره رأسو ..
* بيجيب خارجيات ..
* بقول كلام العقل الباطن ..
* وبيقول الحاجات الفي بالو ..
* وبيطلع أسرار وبلاوي ..
* يعني (الصندوق الأسود) بإختصار ..
* عشان كده في ناس الواحد قبل (العملية) بيوصي إنو يكون وحده لحظة (خروج البنج) ..
* أسرارك بتكون في السهلة ..
* وبما أن ذلك كذلك فان أهل المريخ الشهير بـ(المدفور) يفعلون هذه الأيام ما يفعله (صاحب البنج) ..
* الجماعة بقوا يجيبوا خارجيات ..
* المريخابي لو عاينت ليهو (عين ساكت) بيقول ليك : (أقسم بالله التش ما فاكي) ..
* حتى لو ما سألتو براهو بيقول كده ..
* الجماعة بعد ضربت جمال سالم بقوا يبحثوا في عقودات اللاعبين الذين إنتهت فترتهم ..
* مش سيف تيري ده سجلوهو قبل ستة شهور ؟؟
* برضو خايفين عقدوا يكون إنتهى ..
* هو عقد ولا (صلاحية زبادي أصلو) ..
* ختو الرحمن في قلوبكم ..
* سيف تيري لسه عقدو ساري وكذلك التش وبيبو ومحمد الرشيد ..
* ما تتخلعوا ساكت ..
* الجماعة بقى عندهم وسواس ..
* شاكين في أي حاجة ..
* الوحيد الما شاكين فيهو هو صلاح نمر ..
* هسه أسأل ليك مريخابي قول ليهو سومانا هنا ولا في نيجيريا ؟؟
* ح يقول ليك : (والله العظيم وكتابه الكريم سومانا ما فاكي) ..
* دخلت فيهم خوفة كده ..
* بقت عندهم هواجس وظنون وهضربة ..
* والله بيني وبينكم الشغلانية دي حارة ..
* حارة جدا لما تقول لزول أنا مع المنتخب في يوغندا وفي نفس الوقت انت في قاردن سيتي لابس ليك بنطلون مشروط في الركبة وبتحسب في الدولارات ..
* الإحساس ده بالجد صعب ..
* زي لما تكون مواعد (حبيبتك) تقوم تقول ليك (معليش جونا ضيوف ما بقدر أجي) وهي تكون خاااالطة حبيب تاني في شارع النيل ..
* نفس القصة ..
* وغايتو الله يكفينا شر (المُصدي) اللمعتو الأيام ..
* وتبكو بس .. عين قطرة وعين مس ..
* ونركب صافنات ونجيبة (جعلية) وأصلو الزول بيموت والذكرى تفضل حية ..
* و..و..
* ولو وشوش صوت الريح في الباب يسبقنا ….(جمال سالم على الامارات) ..