محمد الطيب الأمين: الكاردينال في السلاح الطبي !!

* واحدة من أصدق تعريفات (الصدق) تقول : (الصدق هو أن تصدق في موقف لو كذبت فيه لما عرفك أحد) ..
* مثلا : (أنت) قاعد في الخرطوم وإتصلت عليك (خطيبتك) من كسلا وسألتك : أنت وين وصوت الهواء ده وين ؟؟
* طيب .. لو أنت قلت ليها أنا راكب أمجاد وماشي (أم صاحبي) راقدة في السلاح الطبي ح تصدقك لأنها ما شايفاك ..
* ولو قلت ليها أنا في ظلط حلتنا برضو ح تصدقك لأنها هي في كسلا وما شايفاك ..
* لكن الصدق هنا إنك تقول ليها : (أنا قاعد في شارع النيل ومعاي دفعتنا من الجامعة بنات وأولاد) ..
* ده صدق في موقف لو كذبت فيه لما عرفتك ..
* بغض النظر عن ردة فعل (خطيبتك) لما تعرف إنك (في شارع النيل ومعاك بنات) بغض النظر عن ردة فعلها ولكن يبقى هذا (صدق في موقف لو كذبت فيه لما إنكشفت) ..
* وميزة هذا الصدق أنه يجعل كل ما تقوله او تفعله فوق الشبهات ..
* لما تكون صادق بهذه الدرجة قطع شك لو قلت لخطيبتك فنان عرسنا ح يكون (كاظم الساهر) ح تصدقك ..
* وبما أن ذلك كذلك فأن واحدة من أكبر مشاكل مجلس الهلال الحالي أنه فشل في إمتحان الصدق ..
* فشلوا في الصدق حتى بحده الأدنى ..
* مجلس الهلال يكون (خالط) في شارع النيل ولما نتصل نسألهم إنتو وين يقولوا لينا : (راكبين أمجاد ماشين السلاح الطبي) ..
* لم يكونوا صادقين ولذلك أصبحت الشفافية معدومة وأصبح كل تقصير حتى ولو لم يكن من المجلس فأنه من المجلس ..
* لو صدقت في حاجات (مشت) بنصدقك في حاجات (جاية) حتى ولو كذبت في (الجاي) ..
* لو صدقت في موضوع مكسيم مثلا ، ممكن نصدقك في موضوع كافالي ..
* وهنا تتجلى قيمة الصدق ..
* عندما تقول : (بكري المدينة تاني ما بدقها) وفعلا بكري ما يدقها معناها انت صادق ، وتاني بنصدقك في موضوع كافالي وفي أى موضوع مستقبلي ..
* وعندما تقول : (محمد عبد الرحمن إصابتو مزمنة وما بقدر يلعب) وفعلا محمد ما يلعب معناها انت صادق ، وتاني بنصدقك في موضوع كافالي وأى موضوع مستقبلي ..
* ولما تقول : (تاني محترف ما جابوهو في التلفزيون ما بدخل كشف الهلال) وبالفعل تجيب محترف جابوهو في التلفزيون معناها انت صادق ، وتاني بنصدق ..
* لما تقول : (2017) الهلال خالي من الأجانب وفعلا يبقي خالي معناها انت صادق ، وتاني بنصدقك ..
* لما تقول : (السنة دي الهلال لو ما جاب كأس افريقيا أنا ح أمشي) وفعلا الهلال يجيب الكأس أو (انت مشيت) معناها أنت صادق ، وتاني بنصدقك ..
* لما تقول : (ساماتا من ضمن خياراتنا لكن بنجيب ليكم الأخطر من ساماتا) وبالفعل تجيبو معناها انت صادق ، وتاني بنصدقك ..
* لكن لما الكلام ده كلو يطلع (هوا) قطع شك لما تجي تقول لينا (الإتحاد العام) سبب في موضوع كافالي ما ح نصدقك حتى ولو الإتحاد كان سبب بالفعل ..
* عرفتوا المشكلة وين ؟؟
* كافالي لم يكمل يومه الـ(60) مع الهلال ومع ذلك يخصم الآن من الهلال (6 نقاط) ..
* كل أندية الدوري الممتاز ما قدرت تشيل من الهلال (6) نقاط ، يجي كافالي بسبب سذاجة إدارية يشيل الست نقاط ..
* المشكلة أن المجلس الهلالي يظن أن شغل (السوق) ممكن ينفع مع (الفيفا) ..
* إدارة الأندية تختلف عن شغل (الكرين) لأن هنا القوانين واضحة وصريحة ..
* بفهم السوق ظن مجلس الهلال أن (الفيفا) مثل (البعاتي) تستخدم للتخويف حتى وقع الفأس في الرأس ..
* هذه النقاط الستة يتحملها مجلس الهلال ورئيسه حتى ولو شارك الإتحاد العام في الخطأ ..
* كده نفترض الإتحاد كان سبب ..
* طيب مصلحة الإتحاد شنو ؟؟
* ح يقول ليك مصلحتو إنو الهلال ما يشيل الكأس ..
* طيب وداع الهلال لبطولة كأس السودان على يد ود هاشم سنار كان الإتحاد العام سببا فيه ؟
* هل وداع الهلال للكونفدرالية كان الإتحاد سببا فيه ؟؟
* أوكي .. نفترض الإتحاد كان سبب في وداعنا لكأس السودان وإنو الإتحاد داير المريخ يشيل كأس الدوري ..
* نفترض كده ..
* أها أنت عملت شنو عشان الإتحاد ما يدي الكأس للمريخ ؟؟
* عملت شنو ؟
* سلمتو قروش (أمانات) وسافرت دبي ومنها إلي لندن ومنها إلي جوبا ؟؟
* ومجلسك قاعد لا بهش ولا بنش ..
* أنت عارف الإتحاد ضدك .. طيب المفروض تكون صاحي عشان ما تلقاهو توج المريخ وانت مقضيها (دبي لندن جوبا) وبالعكس ..
* الإتحاد ما عندو ذنب وهذه حقيقة ..
* الإتحاد إتساهل في معاقبة لعيبة المريخ وإتساهل في موضوع التحكيم هذا مفهوم ومنطقي ..
* الإتحاد يدعم المريخ الشهير بـ(المدفور) أيضا هذا قديم ومعروف ..
* لكن موضوع كافالي لأ وألف لأ ..
* ولا بنصدقكم ..
* قصور إداري يتحمله مجلس الهلال ..
* والموضوع ده لا داير طبيل ولا كسير تلج ..
* قولوا الحقيقة عشان خاطر الهلال بس ..
* هو عليك الله لو ما ساي إرادة انت زول (أقلتو) بعد شهرين ما تديهو حقو ..
* ماسك قروشو لشنو ؟؟
* في نفس يوم الأقالة سلمو حقو لانو القانون بيقول كده والذوق بيقول كده والفهم بيقول كده ..
* الفلهوة والشفتنة ما (بتقسم) مع القانون واللوائح ..
* وخلونا من حكاية الإستئناف الما راح تكتل ذبابة ..
* البقت بقت ..
* وكافالي الجفل خلو أقرعو الواقفين ..
* ونركب صافنات ونجيبة (هلالابية) وأصلو الزول بيموت والذكرى تفضل حية ..
* و..و..
* والله في ..