محمد الطيب الأمين: غايتو يا (مات) ويا كمان (إتكتل) !!

* يحرص الناس في رمضان على ضبط المنبه للسحور أكثر من حرصهم على (المكيف) ..
* والسحور يعتبر (سندة كبيرة) للصائم وقد قال الرسول الكريم صلى عليه وسلم : (ان في السحور بركة) ..
* في ناس ما بيحبوا يتسحروا وليس في ذلك عيب ..
* وفي ناس بتتسحر بـ(عصير) ..
* وناس بـ(الرقاق واللبن) ..
* وناس بتأكل أكل عديل في السحور (عصيدة وفراخ وبطيخ) ..
* ولو ما اخاف الكضب في ناس في السحور بيأكلوا (سمك) ..
* السحور خير زاد للصائم خلال اليوم ..
* وهذا يعني أن الذي لا يصوم ليس بالضرورة أن يتسحر ..
* في ناس ما صايمين ومع ذلك بيحرصوا جدا على السحور ..
* والله صحي ..
* أنا ما عارف هم بتسحروا لشنو وهم ما صايمين ..
* سحور الزول الفاطر في رمضان بيذكرني بالمريخ الذي ينوي دخول سوق التسجيلات التكميلية ..
* إذا شبهنا فترة التسجيلات التكميلية بالسحور فان السؤال الذي يفرض نفسه هو: (المريخ عايز يتسحر بالتسجيلات لشنو) ؟؟
* المتسحرين ليها شنو ؟؟
* عرفنا الهلال واجب عليه (السحور) أقصد واجبة عليه التسجيلات لأنه يشارك في مجموعات الكونفدرالية ومن حقه أن يدعم صفوفه ويستعد للمعارك التى تنتظره ..
* طيب المريخ عايز يدعم صفوفو لشنو ؟؟
* مشاركين وين ؟؟
* لا مشاركين في أبطال ولا كونفدرالية ..
* وأوع تقول لي البطولة العربية ..
* البطولة العربية أصلا المريخ ح يطير من الدور الأول ..
* يبدأ المريخ البطولة العربية من سوريا ..
* وفي سوريا المريخ يا (مات) ويا كمان (إتكتل) ..
* وإحنا السنة دي بالذات يا متنا من الضحك ويا كمان الضحك كتلنا ..
* المهم ..
* الهلال هو النادي الوحيد في السودان الذي يفترض أن (يتسحر سحور كارب) ..
* السحور الكارب بالنسبة للهلال مهم جدا ..
* الآن الحمدلله هنالك تغيير كبير في فريق الهلال من حيث الشكل والمضمون ..
* والتغيير جاء في الوقت المناسب ..
* هنالك حيوية ونشاط وجمال في أداء الهلال ..
* في حركة وفي شغل جيد يتم الآن داخل فريق الكرة ..
* وهذا يعني أن الهلال بنسبة كبيرة جاهز للمجموعات ..
* جاهزين للمجموعات لكن (السحور) بيدينا (سندة كبيرة) ..
* ولابد أن يراعي الهلال في التسجيلات التي إنطلقت أمس لابد أن نراعي (البركة) ..
* والبركة نقصد بها اللاعب الجاهز ..
* أمام الهلال ثلاث خانات لإضافتها بالكشف الأفريقي ..
* والثلاث خانات هذه يجب أن نضيف فيها لاعبين على قدر عالي من الإمكانيات والتأثير ..
* لابد من التعاقد مع مهاجم سوبر وغالي وجاهز حتى يكون إضافة قوية للفريق ..
* سمعنا إن مجلس الإدارة ينوي إضافة رمضان كابو ..
* كابو لاعب جيد ولكن نرجو أن تتم إضافة لاعب آخر بدلا عنه لأن مشكلة الهلال في الهجوم أكبر من مشكلته في الطرف ..
* الأهداف في الهلال يسجلها نجوم خط الوسط بقيادة المبدع شيبوب وبشة والشغيل وهؤلاء لن تتوفر لهم المقدرة في كل مباراة للتسجيل ..
* لابد من مهاجم سوبر ..
* دايرين أهداف نجوم خط الوسط تكون زيادة خير لأهداف المهاجم السوبر الذي يجب أن نتعاقد معه ..
* ثم يجب التأكد من سلامة نزار حامد لأنه إذا تعافى سيكون من أكبر المكاسب في المجموعات ..
* لازم الهلال يستفيد من (سحور التسجيلات) عشان يفاجئ كل الناس في المجموعات ويظهر بشكل مغايير ..
* التعاقد مع سيف تيري مكسب أيضاً ..
* ليس بالضرورة أن يشتري الهلال سيف تيري ..
* سيف تيري ممكن يلعب للهلال على سبيل الإعارة ..
* لو الخرطوم الوطني (طمع) في سيف تيري نشيلو منهم إعارة ..
* الموضوع ما صعب ..
* وسيف فيهو خير للهلال ..
* والخير بيجيب الخير ..
* أما أكبر حماقة سيرتكبها مجلس الهلال هي شطب مكسيم والتعاقد مع أكرم الهادي سليم ..
* إذا تم ذلك فان المجلس سيكون إرتكب حماقة كبيرة جداً ..
* مكسيم ما بتشطب وأكرم ما يجي الهلال ..
* أكرم لاعب مزاجي كلنا نعرفه وما ظهر به من مستوى لافت في بطولة الشان كان محاولة منه للرد على إدارة هلال الأبيض التى إبعدته من الكشف الأفريقي ..
* أكرم في الشان لعب تحت تأثير الزعل وقصد يرد على ناس الأبيض وتحديداً ابراهومة ..
* بخلاف هذا أكرم لن يفيد الهلال ..
* ولو جيتو للجد .. الهلال ما عندو مشكلة في حراسة المرمى ..
* الهلال ممكن يكون عندو ثغرات ومشاكل في خط الظهر لكن ما عندو مشاكل في حراسة المرمى ..
* يعني ما عندنا مشكلة لدرجة إنو نشطب حارس أجنبي مسجل في الكشف الأفريقي عشان نسجل حارس وطني ونضيفو للكشف الافريقي علما بأن هذا اللاعب لم يمارس كرة القدم منذ بطولة الشأن ..
* شغل العواطف ما بينفع وتحديدا في موضوع أكرم ده ..
* عالجوا مشكلة مكسيم وخلوهو يقعد إحتياطي لجمعة ..
* عيب كبير أي لاعب يطالب بحقوقه يتم شطبه ..
* وحتى إقالة مدرب اللياقة البرازيلي بسبب مطالبته بحقه عيب وعيب كبير ..
* أمام هلال المجموعات وإذا إشتغلنا بقلب واحد وبعيداً عن سياسة الإقصاء والحماقة سنحقق المطلوب ..
* صفوا النية ..
* بهناك …..(السحور خلوا للناس الصايمين يا مريخاب) ..
* ونركب صافنات ونجيبة (رفاعية) وأصلو الزول بيموت والذكرى تفضل حية ..
* و..و..
وغدار دموعك ما بتفيد في زول …(نطة من الطابق الرابع ومزاجو عالي الأيام دي) ..