محمدالطيب كبّور يكتب: عالم مهووسة طلعوا بدرية جاسوسة !!

*الجميل أنّني فقدت القدرة على الدهشة والله جد بقيت ما قاعد اندهش نهائي خصوصًا عندما يتعلّق الأمر بشئ يخصّ الهلال ( اندهش كيف والقوون ضربة شمس )، سمعنا بضربة حظّ إلاّ ضربة شمس ديّ جديدة كرت وحقو الواحد يبطل ما يندهش.. أمس قربت اندهش لمن قريت مانشيت في صحيفة هلالية اسمها الأجراس قالت ايه وبالمناشيت العريض ( جاسوسة مريخية وراء اللقطات التي اعتمد عليها الأهلي دخلت بدعوة من الشليق)،وجايبين صورة الأخت الزميلة بدرية عبدالحفيظ مع الخبر في الصفحة الأولى .. خلوا كل حاجة ومسكوا في بدرية وكأنّها دخلت لابسة طاقية الاخفاء في حين إنّها إعلامية متخصّصة في الرياضة، ومن صميم عملها متابعة المباريات بعيد عن انتمائها لأنّها ببساطة تمارس عملها بمهنية ولو هذه المباراة كانت تجمع أيّ نادٍ سوداني بأيّ فريق من خارج الحدود في البطولة الأفريقية فإنّ بدرية وغيرها من الإعلاميين مؤكّد سيكونوا حاضرين.

*اتّخاذ بدرية كملهاة لن يجديّ، لأنّ المباراة المعنية لم تقام في العصور القديمة وكانت منقولة عبر الشاشة الساحرة البي إنّ سبورت وكلّ حاجة التقطتها الكاميرا ومراقب المباراة أكّيد ما فوّت حاجة وتقرير الحكم أيضًا عشان كدا ما في داعي تعملوا فيها مفتحين وتحاولوا تفتشوا ليكم عن كبش فداء لتخفيف ماهو قادم من عقوبات.

*غايتو مسرحية الجاسوسة بدرية دي ما ظابطة والكلام دا حقوا ما تمرقوه عشان ببقى دليل إدانة ليكم والكاف ممكن يفتح تحقيق ويسأل وين الفيديوهات الصورتها بدرية ولو نكرتوا حايقولوا ليكم أنتو القلتوا وطالما أنتوا قلتوا يبقى الكلام دا وراه كلام وفي تجاوزات حصلت وين بدرية !! وببقى ليكم بمبي مع أولاد بمبا خصوصا أنو في شوط تاني هناك أيوا في ستاد السلام وعلى حسب متابعتي في صفحات جماهير الأهلي الناس ديل ناوين ليكم نيه سوداء.. أخ أنا الخلاني أكلمكم شنو بكرة تطلعوا بمناشيت كبير تكتبوا كبور شنو كدا جاسوس .. هو أنا ناقص على قول عادل إمام في مسرحية ( شاهد ما شافش حاجة) وأنا طبعًا ما خشيت المباراة ولا فكرت أصلا أخش استاد الهلال وكنت متابع مباراة آرسنال وأستون فيلا في تلك اللحظة، ومرة مرة استجابة لرغبة بعض الأهله الكانوا معانا كنا بنحضر دقائق في مباراة ذات الأحداث والغريبة حضرنا قووون ضربة الشمس في واحدة من تنقلاتنا تلك.

أكثر وضوحًا

*الأهلي رفع شكواه والحكم كتب تقريره وكذلك المراقب يبقى كترت البتابت عيب حقوا تركّزوا بدل النطيط دا وترجوا الراجيكم وأهو يا خبر الليلة بفلوس بكرة ببلاش والعقوبات جاية جاية.

*معقولة تصف إعلامية بالجاسوسة بس عشان كانت حريصة على أداء واجبها المهني بمتابعة مباراة من داخل الاستاد للدرجة دي أيّ حاجة منسوبة للمريخ  بتصيبكم بالهوس ي عالم ي مهووسة.

*من غاروا سمعنا أنّو موفدكم طلع ما بعرف أيّ لغة للتخاطب حتى اللغة العربية قالوا في تلتلة وشغال بلغة الإشارة وتاميها ابتسامات والغريبة بدرية ما سافرت غاروا وبعد دا خبر موفدكم انتشر  ..

*تصريح العليقي بضرب سيف مساوي للحارس الاحتياطي للأهلي علي لطفي برضو جابتو بدرية ياعالم ي مهووسة عيب تطلعوا ضيفتكم جاسوسة وانتوا العملتوها ما مدسوسة وفي الشاشة كانت مبثوثة.

مجرد سؤال

*بالله دا إعلام دا  ؟؟