محمد الطيب الأمين:الأب والإبن وود العم !!

* من أدبيات وبديهيات التربية السودانية الأصيلة أن الصغار لا يخالطون الكبار في الونسة ..

* يقول ليك: (دي ونسة ناس كبار أمشي بقادي يا ولد) ..

* عندما يكون هنالك ضيوف في (صالون البيت) فان دور (الأطفال) ينحصر في (تقديم الموية والعصير)..

* وأظن أن أي إنسان سوداني قد تعرض لـ(الضرب أو الهرش والعين الحمراء) بسبب (جلوسه مع الضيوف والناس الأكبر منو) ..

* لما يجوا ضيوف تجد أن الرجال مع الرجال في الصالون، والنسوان مع النسوان في البرندا و(أطفال البيت وأطفال الضيوف) بيلعبوا في الحوش ..

* وهذه تربية تضع كل زول في حجمه ..

* لما الكبار يتلاقوا لازم إنت تمشي تفتح قناة (طيور الجنة) ..

* تذكرت تفاصيل هذه التربية السودانية الأصيلة وأنا أشاهد الصورة الجماعية بمطار الخرطوم للثلاثي (الهلال، هلال الأبيض والأهلي شندي) ..

* صورة فيها كثير من (الكلام) و(الكلام) ..

* صورة جماعية جمعت بين (كبار البيت) ..

* صورة جمعت بين (الأب والإبن وود العم) ..

* بما إنو أهلي شندي في مهمة وطنية سنطلق عليه إبن العم رغم أن راعيه الأرباب أصبح أقرب للمريخ ..

* الصورة جمعت (كبار البيت في الصالون الذي هو المطار) ..

* تلاتة فرق تغادر في (زمن واحد) لتمثل السودان في بطولتي (الكاف) الأبطال والكونفدرالية ..

* تلاتة فرق تتوزع في أفريقيا بحثا عن المجد والدفاع عن شعار الوطن وشعارها ..

* وقد جسدت الصورة ذلك ..

* الصورة الجماعية لـ(لكبار البيت في الصالون) ..

* صورة للذكرى والتاريخ ..

* وإحنا وأولاد حلتنا قدر ما عاينا في الصورة ما فقدنا زول ..

* مرات في صورة جماعية كده لما تعاين ليها بتسأل الزول الجمبك بتقول ليهو: وين فلان في الصورة ما شايفو ؟؟

* يقول ليك: فلان هو الذي صورنا ..

* صورنا هو.. عشان كده ما ظهر في الصورة ..

* أو مرات يقول ليك: فلان مغطيهو فلان داك عشان كده ما ظهر ..

* ويقول ليك: عاين طرف قميصو ظاهر لكن هو ما ظهر في الصورة ..

*  المهم.. إحنا لما شفنا الصورة الجماعية لـ(كبار السودان في مطار الخرطوم ما فقدنا زول) ..

* لكن أكيد في ناس لما شافوا الصورة فقدوا المريخ الشهير بـ(المدفور) ..

* قالوا : وين المريخ ما ظاهر مع كبار السودان ؟؟

* يكون المريخ هو الذي إلتقط الصورة لهؤلاء الكبار ؟

* أو إحتمال يكون هلال الأبيض (غطى المريخ) عشان كده ما ظهر في الصورة ..

* كلو وارد ..

* لما (الكبار ديل) عملوا الصورة الجماعية دي المريخ كان يتأهب للإنتظام في معسكر مقفول إستعداداً لمباراته أمام الاخلاص الأمدرماني والتى جرت (عصر أمس) ..

* لعبوا مع (الاخلاص) !!

* فايقين وهمهم بارد ..

* الكبار سافروا سوا والمريخ بيلاعب في الأخلاص ..

* وبعد ده وبدون خجل صحف المريخ الصادرة أمس خصصت عناوينها الرئيسية للحديث عن (أزمة مالية) ضربت نادي الهلال ..

* وانا وأول مرة في حياتي أشوف لي زول كلو (عيوب) وبتكلم عن عيوب زول تاني ..

* ياخ قول الهلال من شدة الفلس علق التدريبات ..

* هل المريخ عندو عين يتكلم بيها عن فلس الهلال ؟؟

* المريخ الذي باع (كأس) في سوق العتبة بمصر يتحدث عن (فلس الهلال) ..

* دي إسمها قوة عين مخلوطة بقلة حياء ..

* آخر ناس يتكلموا عن الفلس هم ناس المريخ ..

* لكنه عدم الخجل ..

* نادي سبعة شهور بدون رئيس ، وطائر من التمهيدي ، وعندو مجلسين والمجلسين ما جايبات حقهم ومع ذلك يتفاصحوا ..

* عندهم مجلسين .. واحد جاء بالإنتخبابات وما عندو (رأس) ، والتاني جاء بواسطة الحكومة وما قدر يدخل النادي ..

* والغريبة الإعلام الأحمر واقف مع المجلس الجابتو الحكومة والما قادر يدخل النادي ..

* أصلا الجماعة ديل بيحبو الحكومة تجيب ليهم ..

* ما بحبو الحاجات البتجيبها الجمعية العمومية ..

* بحبوا الباردة ..

* إتعودوا على الحكومة شديد ..

* المهم ..

* (كبار السودان) غادروا من أجل إستحقاقات أفريقية غاية في الأهمية ..

*  ومثلما جمعت الصورة بين الثلاثي وهم في طريق المغادرة وكلهم حماس نتمنى أن تجمع بينهم صورة اخرى في العودة وكلهم فرحانين ومبسوطين بنتائج الذهاب ..

* لو حقق الهلال الفوز وكذلك هلال الأبيض وأهلي شندي فأننا نقترح أن يقوم المريخ بإلتقاط صورة جماعية لـ(كبار البيت) عقب عودتهم ..

* دور المريخ السنة دي كلها ح ينحصر في إلتقاط الصور ..

* ساعدونا بالصور والموية الباردة ..

* عموما .. الهلال مباراته لن تكون سهلة وذلك لأن سمعة الهلال تسبقه دائما وتصعب مهمته في الغالب ..

* ولذلك مطلوب من نجوم الهلال أن يكونوا على قدر التحدي الذي ينتظرهم ..

* لابد ان يلعب الهلال من أجل تحقيق الفوز خارج الأرض وبالعدم التعادل وبالعدم تسجيل هدف ..

* ولكن نحن نريد أن تكون كل خياراتنا هي (الفوز) ..

* من يعمل للفوز سيناله بالجهد والتخطيط وحتى إذا فشل فأنه سيخرج بالتعادل ..

* ولكن الذي يسعى للتعادل سيقبل الخسارة ..

* وأعتقد أن مدرب الهلال البرازيلي قادر على ترويض بطل توغو داخل أرضه ووسط جمهوره ..

* وعلى جمهور الهلال أن يلاحق الفريق بالدعوات ويركز في هذه المواجهة ومن بعد ذلك يمكن فتح ملف (قروش اوتارا) وغيرها من المشكلات التى ظهرت على السطح مؤخرا ..

* المباراة متبقي لها (48) ساعة نركز فيها ومن بعد ذلك المجال مسموح للكل بالنقد والحديث ..

* ونركب صافنات ونجيبة (هلالابية) وأصلو الزول بيموت والذكرى تفضل حية ..

* و..و..

* وكيف (تغطي) الصورة صورة وريدنا داك يا سيدي كلو يبقي … (تمهيدي ساكت) ..