محمد الطيب الأمين يكتب: تحرير إستاد الهلال .. أم درمان تتنفس الآن ..

أحزنني جداً أن أرى (بيت الحبيب والقصيد) بهذا المنظر الأسيف.

لا أخضر ولا يابس.
سرقوا ودمروا وسمحوا حتى لشجر العُشر (العوير) أن يتطاول في مسرح الهلال.
سعدنا بتحرير هذا (البيت السوداني) الفسيح ، وسعدنا بعودة الجوهرة مُحررة يحرسها الآن جند الله وجند الوطن :
قالدت سوق الشجرة
وأب روف والبنات
الزنكي
سوق الناقة
والناس والخدار
وقطعت حي البوستة مرفوع الكلام
ودمي ينبح ويندهك
تاوقت بي عيني اليمين جوه الشمال.
الهلال حالة فرح وحب.
وإعتقال الحب لن يتم لأن مقر الحب الفؤاد ، وسكن الهلال قلوب الناس.
الهلال بيلعب في قلوبنا قبل ما يلعب في إستاده :
صِبح الحزن مليان ضحك
وجاني المنادي ينادي بيك
وسرت زي الضو عليك
وصرخت يا جنة بلال
عالجني ياعابدين شرف
سامحني يا استاد الهلال
هذا السواد والحريق الذي أصاب النجيل سيعود أخضر و(أخدر) بعرق الرجال إن شاء الله.
قريباً يعود الهلال ليكمل شخصية أم درمان ويلهم الأمسيات والناس.
الليلة يا أم درمان بشوف
كل المدن في توب سماحتك تنهجك
زهت الفتيحاب بالشمس
وإتبسمت بانت على وش أب كدوك
والعرضة غنت من مطامير الحقيبة الصادحة
هم ما بشبهوك
من يوم ولدتي العاشقين
ما شفتي يوم بيت ناس ابوك
وعشق المدن توّر علىّ جرح الغرام
غرامي ليك
خايف .. بي جمالك يشدهك
واتلملمن بنوت فريق القلعة
غنن من شعر ناس ابو صلاح
يا الله لزمني الجراح
انا ما حبيس سجن التلج
لكني مطلوق السراح
#محمد_الطيب_الأمين