محمد الطيب الأمين: من شدة غسيل اليد الواحد ظهر ليهو (خاتم) فضة !!

* بعض المصائب هي مثل (المسكولات) ، أو هي مثل (المنبه) .
* المنبه (بصحيك) ولو أبيت تصحى بكرر ليك (النكزة) .
* منبه عملوا الخواجات يقعد يحنس فيك الليل كلو عشان تصحى وتلحق مواعيدك .
* وفي منبه قالوا لو أبيت تقوم بهبشك في كتفك .
* ده شكلو منبه الآيفون.
* دلع شديد .
* الآن نحن نتعامل مع (الكورونا) باعتبارها منبه .
* الكورونا منبه (رباني) .
* والفرق بين (منبه الله الذي هو كورونا ، ومنبه الخواجات الذي هو تلفون) ، الفرق بينهما إنو منبه الله (شال أرواح) عشان نحن نصحى .
* بينما منبه التلفونات بصحي سيدو بس .
* ربنا ما كان غالبو يخلي السودان (دار الوباء) زي الصين .
* ولا كان غالبو يخلي السعودية مثل إيطاليا .
* ربنا بغلبو يعمل كده ؟
* لا طبعا.
* لكن ربنا في موضوع الكورونا ده كان لطيف معانا .
* ورانا قدرتو في الخواجات .
* ورانا عظمتو في الدول العظمى .
* مهما خافت الدول الإسلامية من الكورونا فإن ما حدث للصين وإيطاليا ما ح يحصل معانا وده (عشم في الله) .
* بإذن الله ما يحصل معانا .
* أي نحن خايفين لكن ربنا رحيم .
* لو الحالات في العالم الإسلامي بلغت (٥٠) ألف حالة موت برضو ده لطف من الله .
* عشان كده يا مولانا ربنا عمل (منبه في الخواجات وقصد يصحينا) .
* كونو العالم الإسلامي كلو يسجد في هذه الأيام .. ده (استسلام) .
* ولا كتر خيرك تسجد .
* كونو العالم الإسلامي يبطل النوم ويقيم الليل صلاة .. ده (استسلام) .
* كونو تغسل يدك بالصابون كل نص ساعة .. دي (نظافة) من الإيمان.
* الواحد فينا من شدة غسيل اليد ظهر ليهو (خاتم) فضة في الأصبع الصغير .
* خاتم عديل كان مدفون في الأصبع.
* لكن بفعل الصابون الخاتم ظهر .
* بذمتك دي هسه ما نعمة ؟
* كونو يظهر ليك خاتم فضة من كثرة الغسيل دي ما نعمة ؟
* كورونا رسالة كبيرة .
* مرض يحصد في الأرواح وما في راجل قادر يوقفو .
* لا طيران أمريكي وقفو ولا صواريخ إسرائيلية ولا قنابل يابانية .
* لحدي الآن ما في راجل قادر على الموضوع ده .
* قادة الدول الكبيرة بقوا زي البنات يبكوا ليل ونهار .
* حظر تجول وإغلاق للاسواق والحياة تكاد تكون واقفة .
* ده الله يا مولانا .
* رسل حاجة صغيرة وقفت العالم بفد رجل .
* وأكيد ربنا عندو علاج للموضوع ده لكن لسه ما سخر لينا زول يكتشف العلاج .
* كلنا متوقعين خلال أيام يتم الإعلان رسميا عن علاج كورونا .
* وعلاج كورونا ح يتوفر حتى في الصيدليات الصغيرة .
* شفت الصيدلية (المكيفها عطلان الجمب بيتكم) بعد أيام ح تلقى فيها علاج الكورونا .
* بإذن الله ربنا ح يسخر زول يكتشف الدواء .
* لكن الرسالة وصلت .
* ربنا وراك إنو هو قاعد .
* مش لو صنعت تلفون أو طلعت القمر أو العلم اطور.
* ربنا بيهزمك بحاجة (العين ما بتشوفها) .
* عشان تقعد في علبك.
* عشان تدنقر راسك وتعرف الله واحد .
* الناس الآن دايرة تتعلق بأي قشة.
* غرقانين .
* مرة يقول ليك في سبيب شعر في المصحف ، ومرة يقول ليك في طفل حديث الولادة قال اشربوا شاي قبل شروق الشمس .
* شاي ؟
* أي قال شاي مسيخ .
* وقبل شروق الشمس .
* طيب الشافع ده ما قال ليكم الشاي ده بنعناع ولا قرنفل؟
* ننتظر شافع تاني يورينا القهوة كيف؟
* والحلبة برضو .
* ده كلو كلام فارغ .
* والله تشرب برميل شاي ما يحلك.
* بطلوا خزعبلات وامسكوا في الله وانتظروا رحمتو وانتظروا الطبيب الذي سيسخره الله لعلاجنا.
* احمي نفسك وأتبع إرشادات الوزارة.
* والله تركز على الشاي تحرق كبدتك وتبقى في اليحلك.
* الخواجات العاملينا فيها أسياد العلم بقوا يطلعوا في أسطح المنزل ويبكوا ويقول (يا الله) .
* بكى عديل .
* شفع ونسوان ورجال يبكوا ويقول يا الله .
* تجي تقول لي شاي قبل شروق الشمس ؟
* نمسك في الله .
* ونساعد بعض ونتكاتف.
* نتوب ونستغفر ونبطل الظلم والاستغلال.
* وثقة في الله سنعبر .
* و..و..
* والله في .