محمد الطيب الأمين: الخروف سيحل مشاكل الهلال !

* لو كنت تملك (عشرة في المية) من عناصر الإبداع ووجدت الدعم والسند والثقة والجو المعافى ستظهر وكأنك مبدع بنسبة (تسعين في المية).
* لأن الثقة والجو الصحي وسلامة البيئة ستمنحك طاقة إيجابية هائلة.
* وبذات القدر لو كنت تملك من عناصر الإبداع النسبة الأكبر (تسعين في المية) ولم تجد الثقة والجو الطيب ستظهر وكأنك تملك النسبة الأقل (عشرة في المية) من الإبداع.
* وحيث يؤكد أن أي عمل جماعي إبداعي يحتاج لثقة وجو صحي وروحة واحدة .
* القوة في الوحدة .
* ومع تأكيدنا التام على وجود خلافات داخل فريق الكرة بنادي الهلال والتي جاء وأكدها مدرب الفريق صلاح آدم، رغم هذا نقول إن الهلال يستطيع أن يلم أطرافه .
* تشغلنا مباراة الجمعة كثيراً لأنها تمثل بداية الهلال في مجموعات هذا العام .
* وبخلاف إنها المباراة الأولى فهي تلعب بإستادنا ووسط جمهورنا .
* ولهذا نعتبرها المباراة الأهم .
* الفوز فيها يعني الكثير، وأي نتيجة خلاف ذلك تعني الكثير أيضاً .
* والفوز على بلاتينيوم يحتاج لمقومات وعناصر نجاح.
* وأول هذه المقومات هي الروح.
* الروح الواحدة والقلوب المتوحدة .
* لن ننجز المهمة لو كانت قلوبنا شتى.
* ومن باب الأمانة الجو داخل فريق الكرة لا يسر وقد ذكرنا ذلك أمس وأمس الأول.
* ولكن بالإمكان الجلوس وتنقية الأجواء قبل معركة الجمعة .
* اللاعبون والجهاز الفني يجب أن جلسوا مع بعض.
* جلسة مواجهة ومكاشفة وشفافية.
* جلسه يقال فيها كل ما في النفوس .
* أي زول يقول الدايرو في وش الزول الدايرو.
* اطلعوا من المعسكر ويشيلوا ليكم خروف وأمشوا أي مزرعة في أطراف الخرطوم.
* رحلة تضم (صلاح آدم وهيثم والسادة وجميع اللاعبين).
* الشغيل يقول الداير يقولو في وش هيثم، وهيثم يقول الداير يقولو في وش بشة الصغير.
* انتقدوا بعض وقولوا كلام القلب.
* هيثم يعرف حدودو وأي لاعب يعرف حدودو.
* نحن لا فاضين لتصفية حسابات ولا خزعبلات.
* لازم الأجواء في الهلال تبقى مثالية.
* دون ذلك لن نمضي شبر للأمام.
* والمكابرة والكضب ما بينفع كلنا عارفين في مشاكل بين هيثم وبعض اللاعبين.
* الغتغتة والتستر ما بحل مشكلة.
* الحل في المواجهة والمكاشفة بعيداً عن الإعلام وبعيداً حتى عن الإدارة .
* نقدم اقتراح الرحلة هذا ونأمل أن يتم تنفيذه اليوم قبل الغد.
* نخت الهلال في حدقات عيونا ونراعي لجمهورنا العظيم.
* نراعي للناس العندها سكري وضغط وأمراض قلب وكل البيهمها إنو الهلال يكون طيب.
* ناس ما بهمها هيثم زعلان من الشغيل ولا زعلان من بشة.
* ناس بتهمها عافية الهلال.
* لما نطلب هلال معافى هل هذا أصبح مستحيلاً؟
* نحن في المجموعات وهذه مرحلة غيرنا يتمناها ويجري وراها فلماذا لا ندرك حجم المرحلة التي نحن فيها.
* هسه عندك المريخ ده تلاتة سنين ما قادر يتجاوز التمهيدي.
* يقوم ويقع في التمهيدي.
* نحن بعد وصلنا المرحلة دي يجب أن نتوحد ونتفق ونصفي النفوس.
* نوحد النية عشان المقصد واحد.
* كل ما اختلفنا سنسهل مهمة الخصم.
* خلافاتنا المستفيد الأول منها الخصوم.
* والفرق في المجموعات لا ترحم.
* يا تبقي قوي ومرتب وراكز ويا كمان تنحني وتخلي الباقين يعبروا.
* ننظر لمصلحة الفريق العليا.
* لو كانت مصلحة الهلال في مشاركة الشغيل فيجب أن يشارك دون النظر لخلافه مع هيثم.
* ولو كانت مشاركة بشة الصغير من مصلحة الهلال يجب أن يشارك.
* زهجنا وفترنا من العباطة وشغل الشفع ده.
* الهلال أكبر من صغائر الأمور.
* ونركب صافنات ونجيبة (أم درمانية) وأصلو الزول بيموت والذكرى تفضل حية.
* و..و..
* والله في.