محمد الطيب الأمين: اعتبرها (1-0) من هسه !

* أهلنا بيقولوا : (الجاري من عمايلو ما بتلفت ورا) .
* عملك وأنت جاري منو تاني بتتلفت لشنو؟
* تجري بوشك وما تتلفت نهائي، لأنو لو كان عملك طيب ما بتجري منو.
* وبما أن ذلك كذلك فإن المريخ وعلى مدار الثلاث سنوات الأخيرة (بيجري من إستادو) .
* ثلاث سنوات لورا المريخ بيهرب من مواجهة الهلال بملعبه .
* يستغل المريخ سوء أرضية ملعبه (شماعة) حتى يعلق عليها الهروب .
* المريخ السنة كلها بيلعب في إستادو ولما تجي مباراة القمة يقول ليك عندنا (عمل في أرضية الملعب) .
* الأرضية دي ما بتذكروها إلا لما مباراة الهلال يكون باقي ليها أسبوع .
* والله صحي.
* مرات بيجيني إحساس إنو المريخ مخصوص ما عايز يصلح نجيلتو عشان يعملها عذر .
* النجيلة بشكلها الحالي ما عاجباهم لكن كمان مجبورين يخلوها كده عشان لما مباراة القمة تقرِّب يزوغوا بالنجيلة .
* الحاجات دي نحن عارفنها والله .
* حركة قديييييمة وغبارها طالع .
* يلعبوا مع الامتداد عادي، يلعبوا مع أهلي الخرطوم عادي، يلعبوا مع الشرطة القضارف عادي، أول ما تجي مباراة الهلال يقول ليك أرح نمشي إستاد الخرطوم.
* خووووف عديل.
* والموضوع قديم.
* من زمن جمال الوالي هم بيحاولوا يهربوا من إستادهم .
* الخوف من الهلال (وراثي) .
* ناس الله خلقهم كده .. بخافوا من الهلال.
* خوف وراثي.
* خوف تعاقبته الأجيال.. من زمن زيكو ولحدي زمن بيبو.
* من زمن جكسا ولهسه.
* بغض النظر عن حال الهلال وواقعه تجدهم خايفين.
* نحن كويسين هم بخافوا مننا، نحن كعبين برضو بخافوا مننا.
* نجيبهم بمدرب أجنبي بيخافوا، نجيهم بمدرب وطني برضو بخافوا.
* تشكيلتنا فيها محترفين هم بخافوا، تشكيلة كلها وطنيين برضو بخافوا.
* الخواف (قلع نجيلتو).
* أنا خايف لو جاتهم الفنايل يخافوا.
* عموماً .. هروب المريخ من ملعبه يعتبر (1-0) لصالح الهلال قبل بداية المباراة.
* دي هزيمة نفسية.
* وعلى الهلال أن يستفيد من هذا الجانب.
* نستفيد من الجانب الذي جعل المريخ يهرب من ملعبه.
* والموضوع كلو.. المريخ ما داير ناس الهلال يحتفلوا في إستادو.
* دي كل القصة.
* لا في صيانة ولا بطيخ.
* أي فريق في الدنيا بيلعبوا في ملعبوا لدواعٍ نفسية ما عدا المريخ.
* أول مرة في حياتي يلاقني فريق بيهربو من ملعبو لدواعٍ نفسية .
* المهم .
* هي مباراة أكثر من عادية يحتاج من خلالها الهلال الفوز.
* هو كده كده الدوري الممتاز حقنا، لكن الفوز معنوياً جيد جداً.
* نحن بنمثل السودان وأمامنا مباراة أفريقية في غاية الأهمية.
* بنلعب قدام المريخ لكن تركيزنا مع تمثيل البلد.
* نفوز عليكم عشان نرفع معنويات قبل معركتنا الإفريقية.
* أنتو طبعاً حكاية البطولة الأفريقية سيرتها بتعمل ليكم إحراج.
* يحتاج الهلال أن يفوز ويقدم العرض المطلوب.
* التشكيلة الصحيحة والقوة والتركيز .
* العناصر الموجودة في الهلال هي الأفضل.
* نزار، سليم، الثعلب، بشة الصغير، موفق، وليد الشعلة والبقية تأتي.
* المريخ عندو التش وعجب .
* وبس.
* والحاجة التي يجب أن يفهمها لاعبو المريخ هي أن مجلس إدارتهم وجهازهم الفني لايثق فيهم ويخاف منهم عشان كده نقل المباراة إلى إستاد الخرطوم.
* حتى إدارتكم ما عندها ثقة فيكم.
* طول ما صلاح نمر قاعد يبقى من حق المريخ يهرب من إستادو.
* صلاح نمر ده لو كان بيلعب معانا نحن ذاتنا كنا حنهرب من الجوهرة.
* فعلاً في مدافعين ما بتقدر تلعب معاهم بملعبك.
* الشر بره وبعيد.
* والسنة دي بالذات يا متنا من الضحك ويا كمان الضحك كتلنا.
* ونركب صافنات ونجيبه (بورتسودانية) وأصلو الزول بيموت والذكرى تفضل حية.
* و…و…
* وبخاف أسأل عليك الناس ….(يقولوا خايف من إستادو).