سيف تيري لـ”باج نيوز”: بعض الجهات تترصدني وتجمّع المهنيين وقوى التغيير لم يتركوني
قبضوني من بيتنا وقالوا لي " الكاميرات جابتك"
باج نيوز: حسن بشير
بعد فترة من الصمت، وربما الانزواء بعيدًا عن الأضواء وأجهزة الإعلام .. بدأ مهاجم المريخ، سيف تيري، المتهم على ذمة إحدى القضايا الشهيرة التي تزامنت مع ثورة ديسمبر المجيدة، يستعيد أنفاسه، ويسعى لاسترداد البريق المفقود، وربما المستوى الفني المعهود فيه الذي أهّله لارتداء شعار أكبر الأندية السودانية، وجعله يتزيّن بعلم البلاد من خلال المشاركة مع المنتخب الوطني في عدد من المنافسات انذاك.
سيف تيري الذي يشتهر بصمته وتهرّبه الدائم من الحديث للصحف أو إجراء الحوارات .. تمكنّ ” باج نيوز ” بعد جهدٍ من الجلوس معه وكانت الفرصة مواتية على هامش التكريم الذي أقامه له قطب المريخ أسعد حسن من أجلّ الجلوس معه وطرح العديد من التساؤلات عليه خاصة أسئلة الشارع الرياضي لا سيما وأنه لاعب مثير للجدل لكون أنّ مسيرته التي بدأت بالتألق ونيل نجومية التسجيلات لم تخلو كذلك من الهنات بحسب البعض وهو ما جعله أسيرًا وحبيسًا في قضية تدور حولها الكثير من الاستفهامات ومن هنا كانت البداية.
* فئة كبيرة في المريخ تري بأنّ النادي شرب المقلب في التعاقد معك؟
– من حقهم وأنا عن نفسي ما راضي عن مستواي.
* سيف تيري من نجم للتسجيلات إلى أسير وحبيس في قضية شائكة؟
_ شوف الناس القريبة منيّ والبتعرفنيّ عارفة الحقيقة.
* ما هي الحقيقة، ألم تشارك في حرق قسم التكامل؟
_ أنا لم أحرق قسم التكامل، أقول ليك كلام أنا ما جيت جنب القسم ده أصلاً في الحادثة مثار الاتهام.
* لكن الحيثيات تشير إلى أنّك شاركت مع المتظاهرين؟
_ الكلام ده ما حاصل وفي ناس مترصدني وأنا ما عارف مشكلتهم معاي شنو.
* يقال أنّك شاركت وقدت موكبًا لتحرير شقيقك المحبوس في القسم؟
_ دي واحدة من الشائعات الطلعوها عنيّ أيام الحبس، وداير أقول ليكم حاجة أنا شقيقي ما كان محبوس في القسم ده أصلاً ودي أوّل كذبة، والحاجة التانية البتأكّد كلامي أنّو البلاغ المفتوح فيني ما فيه أيّ زول من أقربائي.
* سيف بحسب البعض أنت دائم التردد كنت على القسم؟
_ ما صاح القسم أصلاً ما قريب مننا.
* أين كنت تتواجد في أيام التظاهرات؟
_ بيتنا طبعًا.
* أنت مثير للجدل وهناك شكاوي تجاهك من سكان منطقتك؟
_ ناس الحلة ما اشتكوا منيّ، وأقول ليك كلام امشوا أسألوا عنيّ في الحاج يوسف كلها ” دي منطقتي”، ولو في واحد أتكلم عنيّ كلام ما ياهو بعداك من حق الناس تاخد عنيّ أيّ انطباع.
*أين تمّ القبض عليك؟
_ أنا اعتقلوني من البيت.
* متى حدث ذلك بالضبط؟
_ بعد الحادثة بي 15 يوم.
* ماهي الأسباب رغم سردك ودفاعك؟
_ قالوا لي الكاميرات جابتك .. وهو أصلاً ماف أيّ كاميرات.
* أنت تشعر بالترصد والاستهداف؟
_ ما بشعر، أنا أصلاً مترصد من ناس المباحث.
* لماذا المباحث تحديدًا؟
_ لا أعرف أسباب المشكلة، بس أعتقد في ناس حاسدني.
* كيف؟
_ ناس المباحث بقولوا ” سيف كنا بنسكوا وحسي بنحضر ليه”.
* معني ذلك أن سجلك مليء بالجرائم؟
_ ما صاح.
* ألم تحبس من قبل؟
_ أيوة أيّ شخص بمر بفترة مراهقة، وأنا اتسجنت في الفترة دي لكن من بديت كورة بطلت أيّ حاجة.
* يقال إن الخرطوم الوطني لم يسجلك إلاّ بعد الإطلاع على سجلك؟
_ أقول ليك كلام ” ناس الخرطوم سجلوني عشان كورتي وما سألوا من “فيشي” زي ما بقولوا الناس.
* واحدة من الاتهامات الشهيرة تجاهك أنّك تقود عصابات ” النيقرز”؟
_ مرة يقولوا بقود ومرة يقولوا بمول وفي الحالتين الكلام ما صاح ودي شائعات وأنا ما قادر أحدّد الجهة البتطّلعا لكنّ زي ما قلت ليك في ناس حاسدني.
* الثورة انصفتك واصبحت بطلاً قومياً؟
_ أنا ما بطل قومي .. أنا هدفي كان واحد وهو تغيير النظام زي وزي ناس كتار ودي كانت إرادة الشعب.
*هل فعلاً فكّرت في ترك الكرة نهائيًا عقب الاعتقال؟
_ لا لا لا .. ما فكّرت في ترك الكورة وأنا كنت واثق من براءتي مهما قعدت في السجن.
*ألّا تعتقد بأن وقوفك مع الثورة هو واحد من أسباب الدفع بك إلى الحبس؟
_ 100% السبب هو وقوفي مع الثورة وظهوري في القيادة وقيادتي للمواكب.
* سيف بصراحة أنتم متهمين بأنّكم شاركتم في الثورة لأجلّ الشهرة ؟
_ ده كلام ما صاح، أنا ما سياسي، أنا شاركت في الثورة زي وزي أيّ زول وما عملت حساب أنو أنا نجم أو اسم مشهور أنا خرجت لأنو وضع البلد داير تغيير وده الكان حاصل.
* بصراحة تشعر بالخذلان تجاه بعض اصدقائك في محنتك؟
_ شوف أنا اتخذلت في ناس وكسبت ناس.
* من هم؟
_ بصراحة في ناس وقفت معاي وقفت رجال .. وفي ناس ما بعرفا وبرضو وقفت معاي كأنّها بتعرفني ليها فترة وزمن وفي ناس كانت قريبة لي وعرفتهم على حقيقتهم.
* ماذا عن زملائك اللاعبين؟
_ ديل الوحيدين الأنا ما اتخذلت فيهم والله، بالعكس في ناس ما بعرفهم بلعبوا في أندية ثانية ولمتّنا الكورة لقيتهم واقفين معايّ وقدام وبرضو لاعبين المنتخب ما قصروا .. أنا مبسوط من زملائي.
* تلعب مع المريخ وجلسات محاكمتك تشغل الجميع؟
_ على فكرة أنا بحرص على حضور جلسات محاكمتي بنفسي .. ولمن أكون قاعد في الخرطوم بمشي.
* ماهو دور تجمّع المهنيين وقوة التغيير في قضيتك؟
_ تجمّع المهنيين وقوة الحرية والتغيير وقفوا معاي وأستاذ مجدي المحامي جمايلوا ما بقدر أنساها..واقف معاي ومتواصل وحضور في كل الجلسات.
* ما هو أبرز المشاهد التي لا تنسى خلال فترة اعتقالك؟
_ لقيت معاملة كويسة من ضباط السجن، وتلفوني كان شغال والأخبار كانت بتجيني، ويوم الموكب الكان عاملنوا ليّ في شائعات كتيرة حصلت إنو في اقتحام للسجن والحاجة دي خلت ناس امدرمان يحوّلوني لي كوبر قبل يوم من الموكب وناس سجن كوبر رفضوني .. بعداك رجعنا ويوم الثلاثاء أو الأربعاء الصباح أتذكر ودوني ” الهدى”
* دعنا نخرج من هذا الملف، أحرزت هدفًا أمام مريخ الفاشر بعد غياب؟
_ انتصارنا على مريخ الفاشر كنّا في أشد الحاجة إليه، ونحن خسرنا كورة حي الوادي وكان لازم نعوّض والحمد لله فزنا على الهلال والمريخ.
* لكنّ من الكواليس أنّك اعتذرت عن المشاركة أمام مريخ الفاشر؟
_ أيوة أنا ما مرتاح نفسيًا، واعتذرت لي الكوتش وقلت ليه أحسن أكون بعيد.
* ماذا حدث؟
_ أبوعنجة من أكثر الداعمين لي، وأتكلم معاي وهو قبل اعتذاري أمام هلال الفاشر لكنّ في كورة مريخ الفاشر قال لي نحن محتاجين ليك والفريق دة لازم نغلبوا ومبارياتنا معاه فيها أحداث والسنة الفاتت ضيّع مننّا الدوري .. وباختصار أبوعنجة دعمني وحفزّني وكانت مشاركتي إيجابية.
* لكن أداءك غير جيّد؟
_ شوف أنا من طلعت من الاعتقال ما راضي عن مستوايّ.
* أخيرًا هل أنت صفقة خاسرة في المريخ كما يرى البعض؟
_الناس بتقول إنّي صفقة خاسرة لكن أنا أصلاّ ما راضي عن نفسي .. أنا مستواي الحالي ما نفس المستوى اللعبت بيه في الخرطوم ـو المنتخب الوطني لكنّ ده وعد لي جمهور المريخ إنو حيشوفوا سيف تيري على حقيقتو في الفترة الجاية وأتمنى إنّو أسعدهم وأنا بقدر وقفتهم معاي شديد.
التعليقات مغلقة، ولكن تركبكس وبينغبكس مفتوحة.