محمد الطيب الأمين: هل الجو في الهلال مكهرب؟

* أهلنا بيقولوا : (اتنين ما فيهم صغير) ..
* (المرا والنار) ..
* والاتنين ما تخليهم وراك ..
* الطفلة لو بلغت (12) سنة، لازم تعمل ليها حسابك ..
* تراعيها وتباريها وتعلمها وتمنحها (الثقة المقيدة) وتبعدها من الأولاد ..
* أوع تقول (بتي صغيرة) ..
* ح تندم ..
* ح تجيب ليك مصيبة ..
* ما عشان هي كعبة، بل لأن المجتمع أصبح مليان كعبين ..
* خاصة في الزمن العلينا ده ..
* زمن يتم فيه اغتصاب (المواليد) والعياذ بالله ..
* ده بالنسبة للمرا ..
* أما النار .. شرارة أصغر من صغيرة بسبب استهتارك ممكن تحرق بيت كامل أو ممكن تحرق قرية بحالها ..
* أي نار أصلها شرارة ..
* وإخماد النار يتم في الطور الأولى قبل أن يستفحل الأمر ..
* وبما أن ذلك كذلك نقول إن الهلال به (شرارة) ..
* في الهلال (بداية نار) ..
* وهذه البداية يمكن أن تقود لحريق كبير ..
* حريق يفرتق الفريق من الداخل ..
* نتحدث وفق (مصادر) ..
* يعني ده ما (كلام ساكت) ..
* ولا اجتهاد مني ..
* ده كلام (من جوه) ..
* الجو داخل فريق الهلال فيهو (كهربا) ..
* مكهرب ..
* وحتى نكون أكثر صدقاً وأمانة نقول إن الخسارة أمام هلال كادوقلي والأمل عطبرة ليس هي آخر المطاف ..
* لا يوجد فريق في الدنيا لا يخسر ..
* تخسر مرة ومرتين وتلاتة ..
* الموضوع كرة قدم، والخسارة من عناوين كرة القدم ..
* ما في حاجة ..
* تخسر مباراة عادي، تخسر بطولة عادي ..
* ياهو المريخ الجمبنا ده تلاتة سنين بيطير من التمهيدي وشبعان هزائم ..
* الخسارة ما بتفرتق الفريق ..
* ولكن الجو المكهرب بيفرتق بلد عديل ..
* الهلال من جوه ما كويس ..
* في حاجات ما طيبة بين الناس ..
* عشان نكون واضحين ..
* أعلم أن البعض سينفي ذلك والبعض الآخر سيدافع ..
* لكن دي الحقيقة المرة ..
* نعم، الهلال لعب مباراة جيدة جداً أمام إنيمبا وبلغ المجموعات عن جدارة واستحقاق.
* مباراة إنيمبا عندها حساباتها ودوافعها الخاصة جداً.
* حافز اللاعب الواحد في مباراة إنيمبا (70) مليوناً.
* قروش عديل ..
* مباراة إنيمبا دخلها اللاعبون بدوافع خاصة جداً جداً جداً ..
* وجات خسارة كادوقلي بالجوهرة ..
* قلنا ده تراخي واستهتار بيحصل بعد كل مباراة أفريقية.
* ثم جات خسارة عطبرة وبدأ الجميع يتململ.
* خسارتان جعلت الناس تضع علامة استفهام كبيرة.
* في حاجة ما طبيعية.
* الحاجة دي ظهرت في شكل الفريق، بعيداً عن النتيجة.
* في انخفاض غير عادي في مستويات عدد من اللاعبين.
* في شرود ذهني واستهتار.
* الاستهتار مرات بيكون مقصود.
* تراخي متعمد.
* وهنا يأتي دور مجلس الإدارة.
* يدرس المجلس حال الفريق كمجموعة و(تيم).
* خليك من النتائج.
* أدرس الفريق من ناحية تناغم وترابط اجتماعي.
* شوف هل في خوف بين اللاعبين؟
* شوف هل في (تنشنا)؟
* هل في شرارة؟
* في متاخرات قروش؟
* الإدارة هي التي تستطيع أن تتحصل علي الإجابة وتجد العلاج.
* شوفوا المشكلة وين وعالجوها قبل فوات الأوان.
* الهلال بدون مشاكل (ماشي بالبركة ساكت).
* ظهور أي (تنشنا) بين أفراد فريق الكرة سيكون ثمنها غالي جداً.
* الفريق مقبل على مرحلة المجموعات، وهي مرحلة صعبة تحتاج لتركيز وتكاتف ووحدة.
* القوة في الوحدة.
* وأي فرقة وشتات ستضعف الفريق.
* العلاج أول بأول مطلوب.
* لو المشكلة في الحوافز والمرتبات شوفوها.
* لو المشكلة في الكوتش صلاح آدم شوفوهو.
* لو المشكلة في مساعد صلاح هيثم مصطفى شوفوهو.
* لو المشكلة في مدير الكرة السادة شوفوهو.
* شوفوا الشرارة جاية من وين واخمدوها عشان الهلال ما يولع نار.
* والداير ينفي الكلام ده ينفي بطريقتو لكن ما بغير الحقيقة.
* الهلال سيعود لسكة الإنتصار وسيتغلب علي أهلي عطبرة بإذن الله ولكن حتى الفوز لن يطفئ نار الهلال التي لم تزل في طور الشرار.
* نحتاج أن نعمل بتناغم وبعيداً عن الاستفزاز.
* نحترم بعض ونخلي قلوبنا على الهلال.
* نخلص العمل ونبيض النية.
* لن نبلغ المقاصد بالأنانية والنظرة الضيقة وتصفية الحسابات.
* والهلال اكتوى كثيراً بنيران الأبناء قبل الأعمام.
* بتحرق من جوه دائماً.
* تأهلنا على حساب إنيمبا كان يجب أن يكون صفحة جديدة ونقطة انطلاق جديدة.
* ولكن..
* عموماً الله يبعد العوارض ويوحد المقاصد ويوفق الله في كل المحافل.
* و..و..
* وأصل النار شرارة.