محمد الطيب الأمين: وسوق ليبيا خير شاهد !!

* في صلاة الجماعة عندما يقول (الإمام) استوووا يرحمكم الله تجد في ثواني قد تساوت الصفوف المبعثرة ..
* ثواني فقط تستوي الصفوف وتنسد الفراقات وترى الرجال في استقامة وهيبة ..
* ولو اراد (الإمام) أن يرص الصف بنفسه لاستهلك ذلك كثير من الوقت والجهد ولذلك يقول: (استووا) ويتركنا وأنفسنا..
* يترك الإمام هذه المهمة للمصلين..
* كل زول بعاين لنفسو وبيستقيم حسب الصف ..
* ولهذا لا تأخذ الاستقامة في كبرى المساجد المحتشدة بالمصلين لا تأخذ أكثر من (30) ثانية ..
* (30) ثانية يستقيم فيها حوالي ألف شخص بكل يسر ..
* وبما أن ذلك كذلك فإن السودان وفي هذه الفترة بالذات يحتاج لمن يقول للناس (استووووا يرحمكم الله) ..
* نستوي من تلقاء أنفسنا ونستقيم في الأمور كلها ..
* لما كل زول يبدأ بنفسو بنسهل مهمة نهضة السودان ومحاربة الفساد ..
* لو استوينا ح نبني سودانا الجديد ..
* التغيير من عند انفسنا ومن بعد ذلك سيغير حمدوك الكثير إن شاء الله ..
* في عز الليل شال الهلال الكوكي، وفي صباح اليوم التالي اعاد الهلال الكوكي..
* عبر اللسان (استقال) الكاردينال، وعبر (البيان) الكاردينال رئيس للهلال ..
* هذه المواقف المهزوزة تؤكد جدا أن الهلال يحتاج لحمدوك رياضي ..
* لا أحد يبكي على خسارة (عابرة) بدبي ولكن الكل يبكي على حال مائل (مقيم) بديار الهلال ..
* والله في ..
* ضجت مواقع التواصل أمس بسبب صورة لعضوء المجلس السيادي التعايشي ..
* في الصورة تحدث الناس عن أن التعايشي يعلق على اذنه (حلق) ..
* واحدين قالوا ده (حلق) وواحدين قالوا دي (نخلة) ..
* شد وجذب ونقاش وغلاط دار حول (الحلق أو النخلة الموجودة بطرف اذن التعايشي) ..
* الحقيقة إن مثل هذه الانصرافية لن تبني السودان ولن تقدمنا شبراً للأمام ..
* النظرة يجب أن تكون للفكر والمؤهل وليس للحلق والقويشة ..
* الناس تبقى عميقة عشان نمشي لقدام ..
* لكن لو قعدنا نقول ده لابس حلق وداك لابس سكسك وفلان لابس قرمصيص لن نتقدم ..
* حاجة تكسف ..
* يدخل المريخ مباراته اليوم أمام شبيبة القبائل تحت شعار (نحن بنعرف للفرق الجزائرية)..
* الجماعة بقى عندهم وهم انهم بعرفوا للجزائريين ..
* يقول ليك الاندية الجزائرية عقدتها المريخ ..
* المرة دي المريخ يلعب الذهاب هنا والإياب هناك ..
* يعني حكاية عقدة دي بتتحدد السنة ..
* افريقياً يلعبون أمام الشبيبة وعربياً أمام الوداد المغربي ..
* وغايتو السنة دي بالذات يا متنا من الضحك ويا كمان الضحك كتلنا ..
* وبالمناسبة ..
* شخصياً لن أستغرب إذا دخل بكري المدينة الملعب وهو يحمل (سكين) أو حتى طبنجة ..
* بكري الذي فلت من كل عقوبات سوء السلوك ستكون شهيته مفتوحة لارتكاب المزيد خلال الفترة القادمة ..
* الله يكون في عون قضاة الملاعب ..
* جهزوا نفسكم يا الفاضل ابوشنب ..
* السنة دي بكري المدينة أقل حاجة ممكن يقدمها ليكم هي (الكف) ..
* في (كف) اسمو (السودان قفل) ..
* السودان قفل هو كف باليدين الإتنين ..
* وبكري الذي يفلت من العقوبة كل مرة سيستخدم السودان قفل ..
* عشان كده يا ابو شنب أعمل حسابك وكلم اخوانك في جهاز التحكيم برضو ..
* وغايتو جنس غايتو ..
* الحكومة الجديدة يجب أن تعمل على معالجة مشاكل الخريف عقب انتهاء فصل الخريف مباشرة ..
* العلاج بعد انتهاء فصل الخريف سيكون أفضل..
* نطرق على الحديد وهو سخن..
* مع آخر مطرة نبدأ العمل الجاد ..
* الطريقة التي كانت تتعامل بها الحكومة السابقة مع الخريف هي طريقة سخيفة جدا ..
* طريقة فيها استهبال وعبط حقيقي ..
* كانت الحكومة السابقة تبدأ فتح المجاري بعد بداية الخريف ..
* استهبال وكده ..
* يفتحوا المجاري بعد الناس تغرق ..
* ولما الناس تغرق بتقوم تجي الاغاثات والمعونات ..
* دولة قطر في كل خريف عندها إغاثة للسودان ..
* والجماعة اللا وطنيين بيشيلوا الإغاثة وبدوها سوق ليبيا ..
* من مطار الدوحة وإلى مطار الخرطوم ومنه مباشرة إلى سوق ليبيا ..
* أسوأ شئ في حكومة الانقاذ انها كانت تستثمر وتتربح في كل شئ حتى صحتنا وعافيتنا ومعيشتنا لم تسلم من ذلك ..
* الآن يجب أن تعمل الحكومة الجديدة وفق خطة واضحة لإنهاء معاناة الناس مع الخريف والسيول ..
* بالتخطيط والتفكير السليم والضمير الحي كل شئ ممكن ..
* وإن شاء الله ربنا يجبر ضرر كل المتأثرين بالسيول والأمطار الأخيرة ..
* ونركب صافنات ونجيبة (بورتسودانية) واصلو الزول بيموت والذكرى تفضل حية ..
* و..و..
* والبسمة بالبسمة والبادئ أجمل ..