محمد الطيب الأمين: حليل زمن الكهرباء كانت بدق!!

* معظم (الخرفان) الكبيرة الموجودة في السوق حالياً هي من (مواليد) عهد الكيزان.
* ولذلك ننصح بشراء (الحملان) فهي علي الأقل من مواليد 11 أبريل.
* فهم برضو ..
* مبكر جداً بدأ المريخ (الشحدة)..
* ورد في الأخبار بحسب مصادر أن المجلس العسكري وبطلب من المريخ قد دفع لهم (حق تذاكر السفر) إلى الجزائر.
* المريخ متخصص في الحكومات.
* بحبو قروش الدولة حب عميق.
* رضعوا من ثدي الإنقاذ التي زرعت وسطهم ابنها المدلل جمال الوالي.
* 14 سنة وزيادة والحكومة متكفلة بالمريخ.
* الآن يبدو أن المريخ يريد أيضاً أن يعيش على حسابنا.
* رسالتنا للأخ عمر الدقير والأخ الأصم بأن (يفطموا) المريخ.
* ناس المريخ ديل قولوا ليهم دي ما الإنقاذ.
* دي المدنية الفيها كلنا سوا سوا.
* وبلدنا دي ناقصة حاجات أهم من المريخ وأهم من الكورة.
* المريخ لو ما قادر يسيِّر نشاطو يبطل الشغلانية دي بس.
* ما في زول فاضي عشان يصرف عليكم.
* تاني أي قرش بيطلع بحسابات معينة.
* يا تشيلوا نفسكم ويا كمان أقلبوا ثقافي.
* حاجة تكسف.
* أكثر ضامن للمدنية التي تحققت هو (الدم) الذي دفعه الشعب مهراً لها.
* اتفاق تمنو الدم ما بضيع.
* مدنية (رويانة دم) لا خوف عليها.
* وأي (حركات) من الحركات المسلحة في الوقت ده بالذات نحن ما فاضين ليها.
* ودعنا بالدم عهد الظلم، وعلينا أن نستقبل العهد جديد بكل طيب نفس وسلامة قلب.
* كلموا (مناوي وعقار وجبريل والحلو وعبد الواحد) قولوا ليهم من كان (يعادي) البشير فإن البشير قد (سقط) ومن كان يعادي الوطن أحسن (يورينا عدييييييل).
* ده زمن الكاروهات والكنداكات يا مناوي.
* وغايتو جنس غايتو.
* أسر الشهداء البعض منهم رفض (قطع أراضي)، والبعض الآخر رفض (الحج والعمرة).
* ولذلك من العبط أن يتحدث البعض عن (خروف الشهيد).
* ده عبط.
* خروف شنو وبطيخ شنو؟
* الناس في شنو وأنتو في شنو؟
* أسر الشهداء تعيش حالة نفسية صعبة ولذلك إن كان هنالك من يبحث عن (الشو) فيجب أن يكون ذلك بعيداً عن الشهداء وأسرهم.
* صحيح نحن لا نعلم بالنوايا ولكن بعض الأشخاص أفعالهم قائمة على الشو.
* وبمناسبة الشو.
* الطريقة التي يسير بها الهلال الآن ستجعل عمره قصيراً في جميع المسابقات التي يشارك فيها هذا العام.
* الإعداد ضعيف جداً والفريق مشارك في أربع بطولات.
* من العيب أن يلعب الهلال وديات أمام منتخب المحترفين والحرس الجمهوري.
* مثل هذه التجارب لن تفيد الفريق.
* المطلوب من الكاردينال أن يحدد موقفه.
* يا معانا ويا معانا.
* لو معانا اشتغل لينا شغل كورة.
* ولو ما معانا عليك يسهل وعلينا يمهل.
* الكضب ما حبابو.
* خليك واضح.
* التضارب والكضب الحصل من مجلس الإدارة خلال فترة التسجيلات والإعداد يؤكد أن الهلال يدار بطريقة عشوائية جداً.
* والكلام ده ما ببقى.
* ولا ممكن يستمر كده.
* المهم.
* في أول علاقة عاطفية كنت قد أهديتها (قش) هدية لخروفهم.
ولسوء حظي القش عمل للخروف وجع بطن وحدث ما حدث.
* من اليوم داك هي بقت بتشوفني (عشرة عشرة) وأنا بقيت بشوف القش (عشرين عشرين).
* هذه أول علاقة تفشل بسبب القش.
* القشة الشقت بطن الخروف وفرقتنا يا حبيبي.
* عندما كانت للكهرباء هيبة وشخصية كنا نحن وأولاد حلتنا نرفض مصافحة الزول الدقتو كهربا.
* لو عرفنا إنو قبل كده دقتك كهربا ما بنسلم عليك.
* كنا قايلين الكهربا (بتعادي).
* والله صحي .
* أما الآن بقينا نحن البندق الكهربا.
* حليل زمن كانت الكهربا بدق، وحليل زمن كان البيبسي بيطلع بالأنف وبيحبس العيون دموع.
* و..و..
* وفرحتي بالجية القلوب واتراقص الفل و………(العدس برضو).