محمد الطيب الأمين: الفراغ بيعلم الإنقلاب !!

* أهلنا بيقولوا : (المال السائب بيعلم السرقة) ..
* وإحنا بنقول : البلد الما فيها حكومة بتعلم (الإنقلاب) ..
* محاولات الإنقلاب في السودان بقت تحدث (مرتين في الأسبوع) ..
* زي (ختة الصندوق عند النسوان) ..
* وهذا بسبب الفراغ العريض الذي تعيش فيه البلاد ..
* أكثر من ثلاثة شهور (مفاوضات وإجتماعات ومماطلة) ولسه البلد بدون حكومة ..
* المناخ الآن يشجع حتى الجبناء لقيادة إنقلاب عسكري ستكون نتائجه كارثية ..
* شكلوا الحكومة المدنية عشان أي زول يمشي يشوف شغلتو ..
* وتذكروا .. ما في كل مرة بتسلم الجرة ..
* إختار الهلال تونس مكانا لإعداده ثم قام مجلس الإدارة بصرف النظر عن معسكر تونس ..
* ووقع الإختيار على كينيا لتكون مكانا لإعداد الأزرق ..
* من جانبه إختار المريخ الدمازين مكانا لإعداده ثم قام مجلسه بصرف النظر عن معسكر الدمازين ..
* ووقع الإختيار على توتي لتكون مكانا لإعداد الأحمر ..
* وفعلاً: (كل زول بردو قدر بطانيتو) ..
* وغايتو جنس غايتو ..
* أفضل قرار أصدره المجلس العسكري طوال فترته هو: (منع تصدير إناث البهائم) ..
* قرار صائب سيكون له ما بعده ..
* في عهد البشير تم تصدير الإناث والذكور والحوامل كذلك ..
* حتى (الرملة) دي ناس الإنقاذ صدروها ..
* رملة الله والرسول دي صدروها ..
* كانوا ماشين في سكة صعبة ناس الإنقاذ ..
* لو إستمرت الإنقاذ شهرين لقدام كان ممكن يصدروا (النيل) ..
* البيصدر اناث المواشي والرملة ما بغلبو تصدير النيل ..
* حاجة تكسف ..
* من الصعب جدا أن يحضر الهلال السعودي أو العين الاماراتي إلي الخرطوم من أجل مواجهة الهلال أو المريخ في البطولة العربية ..
* صعب أن يحدث هذا ..
* ولا أحد يتذكر آخر مرة زار فيها الهلال السعودي السودان كانت سنة كم ؟
* ولذلك من الأرجح أن القرعة ستكون (معمولة بحب) حتى يتفادى (الخلايجة) الحضور إلى أم ردمان ..
* بخافوا من ملاعبنا والشمس الحارة ..
* عشان كده القرعة ح ترميهم مع بعض ونحن لينا الله وقعاد المظلة ..
* عموماً المشاركة في البطولة العربية أهدافها مالية، وفي النهاية شئ أخير من لا شئ ..
* قالت تراجي مصطفى وهي من (فصيل داليا الياس) قالت : (الناس قبل ما تركب المواصلات بتسأل سيد الحافلة عندو تسجيلات لتراجي ولا ما عندو) ؟؟
* قالت كده ..
* والله صحي ..
* يعني الواحد فينا يقيف للحافلة بتاعت المواصلات ساعتين وربع ولما الحافلة تجي والناس تدافر إنت تقوم تسأل الكمساري تقول ليهو: عندكم تسجيل لتراجي ولا يفتح الله ؟
* لو عندهم تسجيل تقوم تركب ، ولو ما عندهم تنتظر الحافلة البعدها ..
* عليك الله ده ما وهم ؟
* تراجي ربما تكون فاكرة نفسها محمد سيد حاج أو محمود عبد العزيز ..
* جنس محن ..
* الله غالب بس ..
* يحتاج مجلس إدارة نادي الهلال أن يكون واضحاً وصريحاً فيما يتعلق بموضوع أمبومبو ..
* زمن الدسديس إنتهى ..
* أمبومبو نزل تمارين مع نكانا بينما عقده لا يزال سارياً مع الهلال ..
* لم يكتفي برفضه العودة ..
* لم ينتظر حتى تتم مخلاصة مع الهلال ..
* ركب رأس وشغال تمارين ومباريات ودية مع ناكانا ..
* وده إستفزاز وحقارة ..
* ده تقليل من مكانة الهلال وعدم إحترام صريح ..
* لو أمبومبو ما عارف قدر الهلال فهذا شئ يخصه ، ولكن الحقيقة المعروفة أن الهلال أكبر من ناكانا وأكبر من أمبومبو ..
* ولكن ..
* هل أمبومبو إستفاد من ثغرة في العقد وبالتالي الهلال لا يملك حق التقاضي ؟ أم أن اللاعب مستهبل وللهلال حق ؟
* لابد لمجلس الهلال أن يكون شفافا في هذا الملف ..
* الملف ده ما بستحمل كذب وتخدير ..
* الكضب الكتير الإتعودتو عليهو ده ما بينفع في القضية دي ..
* خليك واضح عشان تجيب حق الهلال ..
* أمبومبو لو لم يكن على حق يجب أن نصل معه أقصى مراحل التقاضي حتى يعرف حجم وقدر الهلال ..
* البرود الذي يتعامل به الهلال مع هذا الملف سيضيع كل الحقوق ..
* العين الحمراء مهمة ..
* يتعاقب اللاعب ويرجع الخرطوم ويكمل عقدو في الكنبة ولا كتر خيرو ..
* خليكم أمينين على حقوق الهلال ..
* و..و..
* والله في ..