محمد الطيب الأمين: حتى ذكرياتكم شيلوها معاكم !!

* قمة الفلاح والنجاح هي أن (تشيل بوتفليقة وتشيل كأس الأمم الأفريقية) ..
* هذا قمة النجاح ..
* عصفورين بحجر واحد ..
* دي سنة سعيدة على الشعب الجزائري ..
* وأظنهم سيتفقوا معانا أن (شيلت بوتفليقة أصعب من شيلت كأس الأمم) ..
* إحنا شلنا البشير وباقي لينا الأمم الأفريقية ..
* طالما الجزائر شالت بوتفليقة وشالت كأس الأمم يبقى إحنا برضو موعودين إن شاء الله ..
* نجهز الدولاب من الآن ..
* إستحق الشعب الجزائري هذا الفرح فهو شعب معلم في كل شئ ..
* وعقبالنا يارب ..
* القناعة التي وصل لها أمبومبو هي التي جعلته يوقع عقد مع نكانا رغم سريان عقده مع الهلال ..
* وقناعة أمبومبو هي : (مجلس الهلال هين ولين) ..
* الآن مطلوب من الكاردينال (المستقيل لكن ما مستقيل) مطلوب منه أن يسترد حقوق الهلال ..
* ورينا شطارتك بعد ده ..
* ما فعله أمبوبو تجاوز للقانون والإحترام ويجب أن يدفع الثمن غالياً..
* الكاردينال قبل اليوم ذكر في تصريح شهير وقال بالحرف: ما بنشتكي في الكاف لأنو ما في نادي سوداني كسب شكوى قبل كده ..
* ذكر هذا التصريح المعيب وهو يتحدث عن الحكام ..
* ترى الكاردينال سيرفض أيضاً تقديم شكوى ضد أمبومبو ونكانا (عشان ما في نادي سوداني كسب شكوى قبل كده) ؟؟
* حاجة تكسف ..
* جميل جدا أن يعيد الشعب تسمية كثير من الشوارع باسماء جديدة ..
* إعادة تسمية الشوارع عمل مهم لأن كثير من الشوارع أطلقوا عليها أسماء دون وجه حق ..
* الثورة السودانية العظيمة جاءت لترد الظلم عن كل مظلوم، حتى ولو كان الظلم قاصرا على الشوارع ..
* أتمنى أن تشمل إعادة تسمية الشوارع الأحياء كذلك ..
* بعض الأحياء في الخرطوم لا بأس أن نطلق عليها أسماء جديدة تتماشى مع العهد الجديد ..
* التخلص من ذكريات النظام الساقط مهم ..ع
* حتى ذكرياتكم شيلوها معاكم ..
* كلها ذكريات أليمة ..
* طبعا ناس المريخ لما نتكلم عن ذكريات الحكومة السابقة الكلام ده ما بعجبهم ..
* ما بعجبهم لأنو الرد كاسل هو من ذكريات الحكومة السابقة ..
* والله صحي ..
* ناس المريخ عشان يتخلصوا من الذكريات دي لازم يشيلوا الطابق الفوق ده ..
* ما في ليهو داعي ..
* هي وين الكورة البتعملوا ليها طابقين ؟؟
* وغايتو جنس غايتو ..
* حتى وقت قريب كان العذر الأقبح من الذنب هو أن تعتذر لصديقك لأنك لم تتمكن من تعزيته في وفاة والده بسبب (صعوبة المواصلات) ..
* هذا يعتبر عذر أقبح من الذنب نفسه ..
* أما الآن فان الإنجاز الحقيقي هو أن تتمكن من تعزية صديقك في وفاة والده وجها لوجه رغم صعوبة المواصلات ..
* تفعل المواصلات هذه الأيام بالناس الكثير والكثير جدا ..
* الشغلانية دي شوف ليها حل ..
* الحكومة المدنية القادمة يجب أن يكون من أول أولوياتها (المواصلات) ..
* المواصلات قبل قضية السلام ذاتو ..
* الأولويات بالترتيب: محاسبة قادة النظام السابق ومحاكمة مجرمي فض الإعتصام والمواصلات ..
* والله في ..
* بعد أن نسى نيلسون الكورة وفتح طبلية في وطنه قرر المريخ إعادته للمستطيل الأخضر والتعاقد معه كلاعب ..
* نيلسون خدم في الهلال وذهب هلال الأبيض خدم قدرتو والآن ابراهومة يعيده لاعباً للمريخ ..
* البيعجبني في ابراهومة إنو بيسجل أصحابو (بغض النظر عن الأعمار) ..
* والبيعجبني في ناس المريخ إنهم بوافقوا إنو ابراهومة يسجل أصحابو بغض النظر عن الأعمار ..
* في صحيفة (قوون) عدد الأمس كتب أستاذنا هساي ملاحظة ذكية تقول ان ابراهومة عادة يركز على اللاعبين كبار السن مع إنو هو من جيل الشباب ..
* الملاحظة ذكية جدا لأن أبراهومة بالفعل كل تركيزه في تسجيلاته ينصب نحو اللاعبين كبار السن ..
* عموماً نبارك مقدماً للمريخ اللاعب نيسلون وننصحهم بتسجيل داريوكان ..
* وغايتو الله يكفينا شر (المصدي) اللمعتو الأيام ..
* مسكينة داليا الياس فهي محاصرة بعامل (الزمن والعمر) وتريد الشهرة ..
* الأشعار التى تكتبها داليا الياس لن تصنع منها نجمة مشهورة ..
* داليا لا هي حلنقي ولا هي نضال حسن الحاج ..
* عشان كده بجانب الشعر لابد أن تسلك داليا طريق التصريحات والكلام الخارم بارم ..
* عشان تصل لازم تقول كده ..
* وهذه شهرة لا محتاجة قافية ولا محتاجة جرس موسيقي ..
* شهرة سريعة ..
* ولذلك إتوقع إنو داليا الياس بعد شهر شهرين ممكن تحدثنا عن حاجات تانية حتى تحافظ على شهرتها ..
* مسكينة أتركوها ..
* ونركب صافنات ونجيبها (شنداوية) وأصلو الزول بيموت والذكرى تفضل حية ..
* و..و..
* والله في ..