محمد الطيب الأمين: التورتة نص فدان واللحمة بالكيمان !!

* رغم ضخامة جسمها إلا أن (البقرة) من حيث (اللحم) لا تعتبر الأولى من حيث التصنيف في سوق اللحوم.
* قد يكون (لحم البقر) في مؤخرة ترتيب (اللحوم) من حيث القيمة الغذائية وربما القيمة الاجتماعية كذلك .
* لحم الضأن والسمك والفراخ والماعز والأرنب والطير والحمام ثم يأتي لحم البقر .
* ترتيب (لحم البقر) بين اللحوم هو مثل ترتيب المريخ في أفريقيا.
* تمهيدي ساكت ..
* في اللحم (البقر طيش اللحوم) يعني تمهيدي ساكت.
* البقر بيعمل (قاود) ..
* وفي الفرق الرياضية (المريخ طيش الفرق) يعني تمهيدي ساكت .
* البطولة العربية بتعمل (طوحال) .
* ولعل أكثر ما يحزنني أن أهل المريخ يتعاملون مع البطولة العربية باعتبارها (بطولة) .
* فاكرنها (بطولة) ومصدقين الحاجة دي .
* البطولة العربية أقل ترتيباً حتى من (لحم البقر) .
* بطولة غير محترف بها ولو ما قروشها دي لو شالها كلب ما في زول بقول ليهو جر .
* الآن كلما تقدم الهلال في بطولة الكونفدرالية وكلما حقق انتصاراً كلما أحس الناس بـ(هيافة) البطولة العربية .
* وما قدمه الهلال أمس الأول، أمام نكانا أكد أن الهلال عندما (يقوم على الكورة) فهو صعب .
* لما نقوم على الكورة صعبين ..
* الفوز برقم كبير في كرة القدم عادي ولكن الما عادي أن يكون الفوز بالأربعة أقل من روعة الأداء .
* نحن الآن نتعامل مع مباراة الهلال أمام نكانا على جزئيات .
* الجزئية الأولى فرحنا بالتأهل ..
* عقب المباراة كان الفرح خاص بالتأهل .
* امبارح فرحنا بالرباعية .
* واليوم ياداب ح نفرح بالعرض العالمي ..
* لو فرحنا فرحة واحدة بنظلم الفرحة ..
* لازم نفرح بالأقساط المريحة ..
* الفرح في الزمن العلينا ده بقى زي (لبن الطير) ..
* نادر في الزمن ده تلقى ليك زول فرحان .
* قبل كم يوم مشيت لي عرس ..
* وحقيقة كنت معزوم من قبل أهل العروس .
* يعني ما بعرف العريس ..
* في آخر ربع ساعة العرسان جو داخلين الصالة ..
* وأكثر شيء لفت نظري هو (زعل العريس) .
* العريس كان زعلان وصاري وشو ..
* ما عرفتو زعلان من العروس ولا زعلان من أم العروس ولا زعلان من نفسو ..
* في زمنا ده حتى العريس في (ليلة العمر) بيكون زعلان ..
* ويجي الهلال في (90) دقيقة يصنع فرحة عشرين مليون نسمة .
* أنا متأكد العريس الزعلان ده بيكون فرح بعد تأهل الهلال ..
* لو شاف قون أمبومبو احتمال يمشي يعرس تاني ..
* أنا امبارح اليوم كلو كل ما أتذكر قون أمبومبو بخلف رجل فوق رجل ..
* والله صحي ..
* عشان كده أنا أتوقع إنو العريس الزعلان يوم زفافو داك بيكون فرح يوم زفاف الهلال .
* والعريس ده لو شاف قون الشعلة التاني ح يجر شهر العسل ..
* ودي قيمة الهلال ..
* الهلال هو (قهوة الشعب السوداني) ..
* هو الكيف وهو البيعدل المزاج وهو البتحكم في المشاعر والمحاسيس .
* الشعب السوداني ما أجمع على شيء بخلاف حبه للهلال .
* الهلال نعمة .
* والمحافظة على (النعم الكبيرة) واجب.
* فريق بتحكم في مشاعر بلد جدير بالاحترام .
* ولعل ما حققه الهلال بالأمس، انعكس بشكل إيجابي جداً على رئيس الهلال الكاردينال من خلال الحوار الذي أجراه بقناة الهلال .
* تحدث الكاردينال في اللقاء بتواضع محبب .
* تواضع الكاردينال وكان مرتباً ولم يجنح للمغارز .
* وهذا أمر مطلوب في هذه المرحلة المهمة .
* وأحسب أن لغة التسامح والتسامي التي تحدث بها الكاردينال في أغلب فترات الحوار سيكون لها ما بعدها .
* الحوار ربما يعد من أفضل حوارات الكاردينال ولو أنه (دغمس) بعض الحقائق فيما يتعلق بموضوع بشة .
* أحسن الكاردينال وهو يسلم اللاعبين حافز التأهل أمس .
* خطوة مهمة تجعل نجوم الفريق في وضع نفسي أكثر من ممتاز قبل انطلاقة دور الثمانية .
* وأكثر ما يحتاجه الهلال في الوقت الراهن هو (توحيد الصف وإخلاص النوايا) .
* تبييض النية يقود للنجاح .
* والنية في كثير من الأحيان هي أصدق حتى من العمل نفسه .
* نصفي نيتنا عشان الهلال بيستاهل النية السليمة .
* أيضاً تحديد الأول من أبريل القادم موعداً لوصول الإضاءة الجديدة ضربة معلم .
* صبر الهلال على الإضاءة (المعمشة) فترة من الزمن .
* الإضاءة دي لو ما كانت (مغبشة) ممكن أمبومبو في كل مباراة يجيب ليهو قون زي القون الجابو في نكانا .
* ناس موفق صديق والثعلب وسليم عطبرة دايرين ليهم إضاءة كاربة .
* نزار حامد لما يلقى الإضاءة ممكن براهو يهزم النجم الساحلي أو الزمالك .
* دايرين الإضاءة في الجوهرة تكون زي الإضاءة في عيادة طبيب الأسنان .
* وليد الشعلة براهو داير ليهو (برج إضاءة) .
* قون وليد الشعلة الثاني ده لو الإضاءة ما بقت مية مية ممكن يجينا رمد .
* نحمد الله على نعمة الهلال ونحمدو على نعمة الفرح الذي لا يحققه إلا الهلال .
* طبعاً الكاردينال في ختام الحوار أمس (ضبح التورتة) على الهواء مباشرة .
* تورتة فيها الرقم أربعة .
* تورتة نص فدان والفرح كيمان كيمان .
* ونركب صافنات ونجيبه (أم درمانية) وأصلو الزول بيموت والذكرى تفضل حية ..
* و..و..
* أنت الجمال وأنت الصفة.