محمد الطيب الأمين: تصريحات الكاردينال مثل (اللبانة المستعملة) !!

* أنا على قناعة أن أكثر ما يضر الكاردينال على الإطلاق هو (عدم الصدق) ..

* والتلفيق ..

* والتبرير الفاضح والمفضوح ..

* واللعب على كل الحبال، والضرب على الأوتار العاطفية التى تخاطب (الطيبة في الناس) ..

* يخاطب الناس الطيبين ..

* و(الناس الطيبين) بمفهوم الأخوة المصريين هم الناس (العبطاء) ..

* المصريون لما يقول ليك (فلان ده طيب) معناها قاصدين (فلان ده عبيط ساكت) ..

* وجمهور الهلال ليس من بينهم (عبيط) حتى يخاطبهم الكاردينال مُفترضا فيهم (الطيبة بالمفهوم المصري) ..

* ما فينا عبيط ..

* ولا إحنا (طيبين) ..

* ولذلك الذكي هو الذي يحترم عقول الناس ولا يفترض عندهم الغباء ..

* في (عامه الأول) كان الكاردينال عندما يتحدث (يسكت الجميع) لأن حديثه في ذلك الوقت كان مدهشا وفيه مداعبة صارخة لأحلامنا وتطلعاتنا ..

* كنا بنتابع تصريحات وحوارات الكاردينال ونحن سعداء بـ(حديثه البلدي) الجميل وهو يعدنا بساماتا والأخطر منو، ويعدنا بالكأس الأفريقي (2017) وهو ذات العام الذي بشرنا فيه بكشف هلالي خالي من الأجانب ..

* كنا نتابع حوارات الكاردينال وحديثه عن المدربين الكبار وعن المحترفين الكبار ..

* كنا نتابع تصريحاته من زمن (بكري المدينة تاني ما بدقها ومرورا بإصابة محمد عبد الرحمن المزمنة ووصولاً إلى نقاط الهلال الستة والتى وقفت الفيفا برجل واحدة) ..

* صدقنا كل تلك التصريحات وعلقنا آمالنا على (الكسكتة) .. ولكن ..

* ضاع الصدق وضاعت مقولة (بمسكو من لسانو) ..

* أما الآن فان حديث الكاردينال وتصريحاته تشبه للحد البعيد (اللبانة المستعملة) ..

* وأظن أن الجميع يعرف طعم (اللبانة المستعملة) ..

* الكل يستمع لتصريحات الكاردينال عن طريق الصدفة لأن ليس هنالك حماس لترقب ما يقول ..

* والسبب أن ما يقوله هو كلام ربما الكاردينال نفسه لا يصدقه ..

* كلام قد يدخل عقل (شافع ما دخل الروضة) ..

* ولكن الشافع لو دخل الروضة فان تصديقه لحديث الكاردينال يدخل في إطار (العبط) ..

* أمس الأول قال الكاردينال إنهم إكتشفوا أن التقارير التي رفعتها دائرة الكرة بقيادة (الفاضل) فيما يتعلق بالكوكي في فترته الثانية إنما هي تقارير كاذبة ..

* وهو ذات الكاردينال الذي قال بعد إقالة السنغالي لامين نداي : (السنغالي ده ما عندو شهادات وأنا ما كنت عارفو عاطل) ..

* وبكرة لو الكاردينال رجع السنغالي ح يقول ليك : (إكتشفت إنو ناس خالد النقر رفعوا لي تقارير كاذبة وإنو السنغالي عندو شهادات وما عاطل) ..

* أقوال الكاردينال تتبدل حسب المصلحة وحسب الظروف ..

* وللأسف الشديد هو لا يجيد فن التبرير ..

* عند إقالة الكوكي قال الكاردينال: (الكوكي مدرب أخلاقو ضيقة وما بعرف يتعامل مع اللاعبين وبجدع ليهم الورق وبكورك فيهم) ..

* وأضاف: اللاعبين شكوا لي من الكوكي وقالوا ما مرتاحين معاهو ..

* الآن الكاردينال (نكر الكلام ده كلو) وأراد أن يُجرم الفاضل ..

* الفاضل الآن غير موجود في نادي الهلال وإذا كان الكاردينال (زعلان من الفاضل في حاجة) فمن الأفضل أن (يفش زعلو في موضوع تاني) ..

* نحن (مع إقالة الزعفوري) ونرى أن الكوكي مدرب لا بأس به ولكن نحن ضد (نكر الكلام والتلفيق واللعب بعقول الناس) ..

* والكلمة يا الكاردينال أطول من العمر ..

* يعني بكرة لما تجي تشيل الكوكي ما تقول فيهو كلام كضب عشان الدنيا ضيقة وإحتمال تحتاج ليهو بعد سنة ..

* وعلى فكرة الكلام القالوا الكاردينال عند إقالة الكوكي هو نفس الكلام القالوا عند إقالة السنغالي مع إختلاف بسيط ..

* لما أقال السنغالي قال : (ما عندو شهادات وتمارينو عبارة عن جري وتقسيمة واللاعبين عندهم رأي فيهو وطالب بشطب شيبوب والثعلب) ..

* ما في قائد بتخبط كده ..

* ما في قائد بيقول كلام وبيجي بعد (45) يوم يبلع كلامو ..

* أهم صفات القائد الصدق والشجاعة ..

* التبرير عن طريق التلفيق هو (خوف) ليس إلا ..

* الشجاع بيتخذ قرارو وما بيرمي الناس بالباطل ..

* وبعدين حكاية (في حاجات أنا ما داير أقولها دي) الجمهور بقى ما بصدقها والله ..

* شطب هارونا وسيرجو وقال : (ما دايرين نتكلم في حاجات كتيرة حصلت) ..

* قال هزيمة الرابطة هي إستهتار وفي (حاجات تانية أنا ما داير أتكلم عنها) ..

* الحنك بتاع (في حاجات أنا ما داير أتكلم عنها) حنك ميت وما بشيل في الناس ..

* ده كان زمان يا ريس ..

* الكاردينال يحتاج أن يصدق ويحتاج أن يغير طريقته في الحديث بمعني يغير (الحنك) ..

* ما ممكن خمس سنين نفس (الحنك) ..

* وعود ، وتلفيق تهم في ناس أبرياء ، وتخدير ، و(في حاجات أنا ما داير أقولها) ..

* حكاية إنك توهم الناس إنو في (حاجات خطيرة إنت ما داير تتكلم عنها) ، ده كلام مضحك جدا ..

* ما في أي حاجة خطيرة ودي محاولة تبرير فاشلة ..

* أنا والله في كل صباح أسأل نفسي : (هل الكاردينال محتاج لكل هذه التبريرات والتناقضات والتلفيق) ؟؟

* هل محتاج ؟؟

* المصيبة إنو ما محتاج ..

* زول قدم (كتابو بيمينو) وعمل جوهرة غاية في الجمال وصنع لنفسه أرضية (كانت) قابلة لتخليده ..

* فلماذا يصر على الهبوط من مكانة (كانت) سامية ؟

* ليه الإصرار على الفشل والتلفيق ؟

* صدقني يا رئيس عيوبك ما كتيرة وكلنا عيوب، فقط مطلوب منك (الصدق) وعدم تشويه سمعة الذين يغادرون الهلال والتركيز مع فريق الكرة ..

* و..و..

* وغايتو جنس غايتو ..