محمد الطيب الأمين: الخميرة بتصحي الدقيق !!

* في العادة الذي يقبل الوقوف بالساعات في صف (الرغيف) أو صف (الوقود) أو صف (القروش) هو إنسان صبور ..
* الصفوف لا يقدر عليها إلا (أيوب) ..
* وناس البيت في الغالب يركزون على أكثر الأبناء صبراً حتى يتصدى لمهمة الصف وإنجاز رغيف الفطور ..
* وبما أن ذلك كذلك فنحن نرى أن أي بيت سوداني فيهو مريخابي يجب أن يتم إرساله ليقف في الصف ..
* استغلوا المريخاب الموجودين في البيوت واستغلوا صبرهم (الفايت الحدود) ..
* من يصبر على المريخ وهو يدمن الطيران من التمهيدي قطع شك سيصبر على صف الرغيف حتى وإن كان (الرغيف لسه في طور العجين) ..
* صبر المريخاب على (مدفور البلد) يجب أن يتم توظيفه بالطريقة الصحيحة ..
* هذا (صبر) مهدر ساكت ..
* صابرين ليهم على فريق الخروج من التمهيدي عنده زي (واجب العزاء) ..
* والله صحي ..
* كل الفرق التي (طيرت) المريخ طوال السنوات الماضية من التمهيدي هي فرق تاريخ تأسيسها لم يتجاوز العشر سنوات ..
* فريق فايبر أصغر عمراً من النعسان ..
* يعني النعسان لما خرج للدنيا الأخوة اليوغنديين ما فكروا في فايبر ..
* فريق مغمور أبعد فريق طاعن في السن ..
* فايبر حتى في يوغندا لا يعرفه الناس ..
* فريق بلا جمهور ..
* مغمور ولاقى مدفور ..
* أظرف حاجة إعلام المريخ حمل الخروج لمجلس الإدارة ..
* ده يعني على أساس إنو دي أول مرة تطيروا من التمهيدي ؟
* فريق كل سنتين بيطير من التمهيدي لو كان قريش رئيس أو الوالي أو ود الشيخ ..
* ده حجم المريخ في إفريقيا ..
* والمجلس ما عندو أي يد في الطيران ده ..
* المريخ طار من التمهيدي حوالي سبع مرات في عهد جمال الوالي ..
* يعني الطيران ما عندو علاقة بالرئيس منو ..
* دي عادة كده ..
* عادات وتقليدات ..
* وكثير من العادات والتقاليد مضرة ومع ذلك نفعلها ..
* لو جلس أوردوغان على كرسي رئاسة المريخ سيطير المريخ من التمهيدي ..
* القصة ما في الرئيس القصة في المريخ ..
* دي قسمتكم كده ..
* مكتوب ليكم كده ..
* زي ما قسمتكم تأخدوا (سبعة) في الأردن بسبب البرد، برضو قسمتكم تطيروا من التمهيدي ..
* وأنا والله طيران التمهيدي ده ما شايف إنو فيهو مشكلة ..
* ولا يفترض الجمهور يزعل والإعلام يهاجم ..
* الزول بيزعل في الحاجة الما عادية ..
* العادي ما بيزعل ..
* هسه عندكم أهلي شندي ده طار وهو ساكت ..
* أكلوها في حنانهم وسكتوا ..
* أنا بس داير أعرف الجديد شنو في إنو المريخ يطير من التمهيدي ؟
* الجديد شنو يعني ؟
* نفس الطيران ونفس التمهيدي ..
* ما في جديد ..
* البشوفكم زعلانين يحلف يقول السنة الفاتت لعبتوا الفاينل ..
* الموسم الفات طيران من التمهيدي والموسم ده برضو طيران من التمهيدي يعني ما جديد ..
* في المدرسة لو في طالب كل سنة بيجي الطيش هل بيزعل لما يجي الطيش تاني وأصلاً هو طيش كل سنة ؟
* أنا أفتكر إنو زعل المريخاب غير موفق ..
* زعل في غير محله ..
* وده كلو كوم والاتحاد الجزائري كوم تاني ..
* تمشوا الجزائر بنفسياتكم دي عليَّ بالقسم سبعة ما تحلكم ..
* عندي ليكم اقتراح ..
* والاقتراح خاص بالجهاز الفني ..
* في الجزائر ألعبوا بتنظيم (1-9-1) ..
* منجد النيل في المرمى وقدامو (9) في الدفاع وقدامهم لاعب ارتكاز ..
* ده أفضل تنظيم ممكن يلعب بيهو المريخ في الجزائر ..
* وأنا ما بقول كده عشان المريخ يتأهل، وإنما منعاً للفضيحة ..
* المريخ ح يندم إنو فاز على الاتحاد الجزائري في مباراة الذهاب ..
* ح يندموكم والله ..
* امشوا اتشلاقوا وقولوا دايرين تجيبوا قون في الجزائر ..
* والله تعرفوا حاجة ..
* مشاركين في البطولة من أجل المال والأخوة الجزائريين ح يوروكم المال وسد المال ..
* والسنة دي بالذات يا متنا من الضحك ويا كمان الضحك كلتنا ..
* المهم ..
* نرجع ونقول وننصح الآباء والأمهات في البيوت بأن يركزوا على المريخاب فيما يتعلق بصف الرغيف ..
* ما ترسلوا الولد الهلالابي لأنو ما بصبر ليكم على الصف ..
* ركزوا على المريخابي (جلدو تخين) وشبعان طيران ..
* الجزائر في انتظار الشهيد الواحد بعد المليون ..
* أوع في الجزائر تعملوا فيها فريق كبير وتحاولوا تتقدموا على مرمى الاتحاد ..
* قفلوا ورا بس ..
* وأنا شايف لو سافر معاكم الفاتح النقر لزوم الخندقة وكده يكون أفضل ..
* أنا شايف كده ..
* وأي زول طبعاً حر في (شوفو) ..
* وتبكو بس .. عين قطرة وعين مس ..
* وغايتو الله يكفينا شر (المصدي) اللمعتو الأيام ..
* و..و..
* وأنا ليهم بقول …. (ألعبوا بتنظيم 1-9-1) …