محمد الطيب الأمين: نور لأهلو وأحبابو.. ونار للبهبشو !!

* من الأسئلة التي شغلت بالي ردحاً من الزمان سؤال يقول: هل (عود) الكبريت (موسكو) أم (مهوقني) أم (طلح) ؟
* زمن طويل وأن مشغول جداً بفك طلاسم (الكبريت) وهذا (العود) مجهول الهوية ..
* عود الكبريت من (العيدان) التي نجهل أصلها وفصلها ..
* ثم أن الكبريت في حد ذاتها هي (أصل) النار ..
* الكبريت هي (أم النار) ..
* طبعا (الزناد) هو (حنكوش الكبريت) ..
* الزناد (ود ميكي) ..
* الكبريت تنظر للزناد ذات النظرة التي ننظرها نحن للشاب (الداقي سستم) و(بنطلونو ناصل) ولابس (الكارينا) بتاعت اختو ..
* بحساباتنا نحن ولد زي ده (ود ميكي) ، وبحسابات الكبريت فإن الزناد هو ود ميكي أيضاً..
* إذا استمعت لونسة بين كبريت وكبريت ستعرف كيف أن الزناد مكروه من قبل (الكباريت) ..
* الكبريت هي (نار مُعلبة) ..
* نار مع وقف التنفيذ ..
* نار مؤجلة ..
* نار يمكن أن تحرق ويمكن أن تظل مسالمة ..
* والنار المسالمة ما تهبشها عشان ما تحرقك وتخرب الواطة ..
* وبما أن ذلك كذلك فان الهلال هو النار وهو النور ..
* نور لأهلو وأحبابو ، ونار للبهبشو ..
* نظرتنا لإنتصارات المريخ هي مثل نظرة الكبريت للزناد ..
* ولو إستمعت لونسة (هلالابي وهلالابي) ستعرف كيف يتحدثون عن إنتصارات المريخ ..
* تلك الإنتصارات الميتة والضعيفة ..
* إنتصارات يتم حسمها في المكاتب وليس الملاعب ..
* الآن أنجز الهلال المهمة المستحيلة وحقق الدوري بعد أن فعلوا كل شئ من أجل سرقة اللقب ..
* فعلوا كل الممكن وبعض المستحيل ولكن الهلال أهداهم (نار) أحرقتهم وأهدانا نور أضاء لنا والحمدلله على نعمة النور والنار ..
* توقع أهل المريخ أن يفوز الهلال في الفاشر بضربة جزاء ، توقعوا أن يظلم الحكم مريخ الفاشر ، توقعوا أن يحسم الهلال المباراة خارج الملعب ..
* توقعوا كل شئ فخاب كل شئ ، وحسم الأزرق اللقب (رجااااالة كده) ومن جوة الملعب ..
* وفي النقعة كمان ..
* وبدون شكوى وبدون أيمن عدار ..
* بمناسبة أيمن عدار ..
* زمان أيام المراهقة لما تجي تكتب خطاب لحبيبتك بتشوف أشطر ولد في المدرسة وبتقول ليهو أكتب لي خطاب عليك الله ..
* في الغالب الولد ده (خطو) بيكون جميل وبيكون شاطر في (الإنشاء والتعبير) ..
* وأيمن عدار ده شكلو كده من الناس الكانوا بيستعينو بصديق لكتابة الخطابات الغرامية ..
* واضح ..
* من خلال (شكوتو) كل شئ وضح ..
* هسه ده كلو هين .. بالنسبة للإستئناف عرفتوا تكتبوا ولا ما عرفتوا برضو ؟؟
* الإستئناف هين .. الكلام البكتب ليكم منو ؟؟
* إستعينوا بـ(عرضحال) من محلية أم درمان ..
* أو لو جيتوا أمام بوابة التأمين الإجتماعي هنالك مجموعة لا يستهان بها من العرضحاليين ..
* ممكن يكتبوا ليكم إستئناف بقروش رمزية ..
* المهم ..
* حقق الهلال اللقب وهذا لا يعتبر إنجاز بل هو (عادات وتقاليد) ..
* الإنجاز أن الهلال حقق هذا اللقب بعد أن خصمت الفيفا ست نقاط من رصيده في اللفة الأخيرة للبطولة ..
* اللقب ليس إنجازاً ولكن هذا اللقب (عار) بالنسبة للمريخ الذي يفشل في مجاراة الهلال المعاقب من الفيفا ..
* عار والله ..
* عار أن يدعمك الحكام والحكومة والدواعي..
* عار أن يظلم الحكام خصمك ويتربصون به والبرمجة تضغطه والفيفا تخصم منه ثم يفوز باللقب ..
* وهذا إن دل إنما يدل على أن الهلال فعلاً لا قولاً هو سيد البلد والزعيم ..
* هو هلال الشعب ..
* هو الفريق الوحيد في السودان أينما ذهب داخل الوطن وجد نفسه سيد بيت ..
* هو الفريق الذي حقق اللقب بفارق (18) نقطة ، وهو الفريق الذي خصمت منه ست نقاط ومع ذلك حقق اللقب ..
* فرحتنا ليس لأننا حققنا الممتاز ..
* بل فرحتنا لأن الممتاز هو الذي إختارنا رغم ظروفنا ورغم العراقيل والمتاعب وكافالي ..
* الممتاز بيعرفو ناسو ..
* أما كأس السودان فهي بطولة تشبه المريخ في كل شئ ..
* بطولة أصلاً إستحدثها الإتحاد قبل سنوات من أجل إرضاء المريخ ..
* والله صحي ..
* لما شافوا الهلال طوالي شايل الدوري قاموا عملوا كأس للمدفور ..
* وطبعاً ناس المريخ ما بخجلوا بيقولوا : (كأس السودان بطولة المريخ المحببة) ..
* بيقولوها بدون خجل ..
* والله إحنا كأس السودان ده لو شالو كلب ما نقول ليهو جر ..
* بطولة وهمية ..
* نبارك لجمهور الهلال العظيم هذا اللقب الغالي و(العادي) فقد لعب جمهور الهلال هنا وفي الولايات دوراً مؤثراً في جميع الإنتصارات التي تحققت ..
* ونبارك لنجوم الهلال هذا الجهد والمثابرة والروح والصبر رغم كل كل شئ ..
* نبارك للجهاز الفني بقيادة السنغالي والزعفوري وكل الطاقم الفني ..
* نبارك لمجلس الإدارة رغم الهنات الكثيرة والأخطاء الكبيرة والست نقاط ..
* نبارك للزملاء والأخوان الإعلاميين الهلالاب الذين كانوا خير سند للهلال ..
* بالمناسبة الإعلام بعد فوز الهلال على المريخ في القمة، الإعلام نسى كل شئ وركز مع الفريق ..
* حتى الست نقاط لم نتوقف عندها كثيراً إيماناً من الجميع بأن المرحلة مرحلة حصاد ..
* وقد وقف إعلام الهلال وقفة قوية جدا قبل وبعد مباراة المدفور أمام سلاطين الفاشر ..
* نبارك لكل الأسرة الهلالية لقب الدوري الغالي و(العادي) ..
* بالمناسبة .. أكتر حاجة عجبتني في شكوى المريخ هي (خط يد أيمن عدار) ..
* خطاط ما شاء الله تبارك الله ..
* وغايتو جنس غايتو ..
* ونركب صافنات ونجيبة (هلالابية) وأصلو الزول بيموت والذكرى تفضل حية ..
* و..و..
* تستاهلوا الفرح ..