محمد الطيب الأمين: ما لينا غيرك أهل وأنت الأهل لينا !!

* من الغباء أن تكون (المقابر) بالقرب من شارع النيل و(الفنادق) في قلب الأسواق ..
* من الغباء أن يكون مكان كلية (شرق) النيل (غرب) النيل ..
* من العبط أن يكون موقف (المواصلات) فيهو أي حاجة ما عدا المواصلات ..
* أكثر بلد في العالم يوجد فيها مفارقات وغرائب هي بلدنا السودان ..
* والأمثلة كثيرة .. قناة (أم درمان) الفضائية مقرها (الخرطوم) ، وقناة (الخرطوم) مقرها (أم درمان) ..
* سم الفأر بكتل كل الحيوانات ما عدا الفأر ..
* ومن الغرائب الكبيرة الناس لما تمشي شارع النيل عشان (تخلط) و(تشم هوا) لما يمشوا شارع النيل بيكونوا (مقبلين) علي الظلط و(ضهرهم) علي النيل ..
* بندي النيل ضهرنا وكأننا جينا نعاين للظلط ..
* من المفارقات أيضاً في السوق وكما هو معروف (الشباشب والجزم معروضة في الرفوف والطماطم والبطاطس مفروشة في الأرض) ..
* ولعل أسوأ مفارقة أن يكون مجلس ادارة رئيسه (أبو قوانين) ومع ذلك المجلس يكتب شكوى (غلط) ..
* والشكوى لغير الله مذلة ..
* مجلس أبو القوانين ما بعرفش يكتب شكوى ..
* في الشكوى كتبوا ما يلي: ( في لاعب في مريخ الفاشر لعب ضدنا موقوف عشان مكرت تقريباً) ..
* دي الشكوى كده ..
* علي بالقسم الزول لو عايز يكتب (خطاب) لحبيبتو ما بكتبو (مبهم كده) ..
* والخطاب تقريباً مكتوب في ورقة مقطوعة من كراس (رياضيات) ..
* حتى في الشكوى (فاشلين) ..
* فريق قالوا ليهو أغلب في الفاشر وهنداك الكأس ، قام اتغلب ..
* قالو ليهو اشتكي وشيل النقاط من المكتب قام اشتكى (غلط) ..
* أول مرة في حياتي أشوف لي زول بيشتكي غلط ..
* أنت بتقول مظلوم وداير تشتكي ورئيسك أبو القوانين ، طيب اشتكي صاح ..
* في زول ما بعرف يشتكي ..
* أيمن عدار الكتب الشكوى ده بيكون لما يمشي الدكتور والطبيب يسألو بتشكي من شنو ، ده النوع البقول للدكتور ( ما عارف لكن اعراضي زي اعراض جارنا عبد الباسط) ..
* بيقول للدكتور كده وكأن الطبيب علي علم بأعراض (عبد الباسط) ..
* وغايتو جنس غايتو ..
* عيب كبير لما الشكوى تترفض شكلاً ..
* عيب والله ..
* عيب لو انتو بتعرفوا العيب ..
* ناس العيب ما بعرفوا العيب ..
* ناس الدواعي الأمنية ما بعرفوا العيب ..
* محمد الشيخ مدني عايز يعمل فيها بطل بهذه الاستقالة وهو نفسه محمد الشيخ الذي بسببه تم تأجيل مباراة القمة لدواعي أمنية في سابقة مضحكة ..
* عموماً .. الشكوى اترفضت شكلاً ..
* والزلفاني قال بيفصلهم عن اللقب الموت ..
* ولحدي الآن شايفو (حي يرزق) ..
* ما مات ولا شال اللقب ..
* اليوم هو يوم الهلال ..
* واللقب هو لقب الهلال ..
* ولكن قبل ذلك لن تكون المباراة سهلة ..
* مريخ الفاشر أصبح علي المحك وسيقاتل بكل قوة من أجل الفوز ..
* الهلال الذي يعيش أياماً سعيدة وطفرة فنية كبيرة مطلوب منه أن ينتصر ويقدم أجمل ما عنده ..
* الفرق كبير بين الهلال والمريخ ..
* للهلال شخصية وحضور ..
* تابع الجميع أمس كيف استقبلت الفاشر الهلال ..
* الهلال محبوب حب من الله ..
* أينما ذهب الهلال وجد الكل بالنسبة ليهو أهل ..
* الكل يردد ما غناه التاج مكي : ( ما لينا غيرك أهل وأنت الأهل لينا) ..
* بالمناسبة يا الكاردينال ما نسينا الست نقاط والليلة الأحد ..
* قلت الأربعاء والليلة الأحد ..
* المهم
* قالوا القرعة أوقعت مدفور البلد أمام إتحاد العاصمة الجزائري ..
* انا العاجبني في البطولة إنها بتمهد للمريخ شوية شوية ..
* شغالين معاهو بالتدريج ..
* الجيش السوري واتحاد العاصمة ..
* لو المريخ اتجاوز اتحاد العاصمة وده طبعا مستحيل ..
* لو اتجاوزو لا قدر الله ح يدخل في حتة صعبة أوي ..
* المريخ أضعف فريق في البطولة العربية ..
* خفيف ومسيخ ..
* وما بعرف يشتكي كمان ..
* غايتو السنة دي بالذات يا متنا من الضحك ويا كمان الضحك كتلنا ..
* نرجع ونقول .. إحترام مريخ الفاشر واجب ..
* نحترمو ونلعب بقوة حتي نحقق اللقب ونحتفل من الفاشر..
* لايهمنا اليوم إن كان مريخ الفاشر قد أشرك لاعبه الموقف عن قصد أم لأ ..
* يهمنا أن نتوج ومن بعد ذلك سنفتح الملفات ..
* اليوم تتويج الهلال بإذن الله وتتويج النجم الكبير وليد الشعلة هداف الدوري الممتاز حتى قبل مباراة اليوم ..
* افضل دفاع ، أفضل خط وسط ، أفضل هجوم ، أفضل جمهور وهداف الدوري مننا وفينا ..
* وأعتقد أن نجم الموسم يمكن أن يكون وليد الشعلة ..
* وليد الشعلة أو حكم القضارف النور ..
* أو ممكن نجومية الموسم يدوها لايمن عدار ..
* طبعا أفضل مدرب هو سنغالي الهلال وبدون منازع ..
* السنغالي مدرب كبير يستحق أن نتحدث عنه في عمود منفصل ..
* واثق من نفسه وشاطر ..
* أما الأخ الزلفاني فهو مدرب فرحان ..
* كيسو فاضي ..
* قال يفصلنا عن اللقب الموت قال ..
* مسكين بحلم ..
* بيصرح كده قايل نفسو بدرب الهلال ..
* نسى إنو مدرب مدفور البلد ..
* مدرب المدفور الشهير ب(ميتات) والمشهور ب(دواعي أمنية) ..
* وتبكو بس .. عين قطرة وعين مس ..
* ونركب صافنات ونجيبة (هلالابية) واصلو الزول بيموت والذكرى تفضل حية ..
* و..و..
* وبشكيك لرب الكون الفي العيون أبدع ..