محمد الطيب الأمين: أكل الميتة فمات قلبه !!

* فاجأ شاب سوداني أمس الأول نشطاء مواقع التواصل الإجتماعي وهو يقوم بعرض (أسد) للبيع بملبغ (650) مليون بالقديم ..
* يعني أكثر من نصف مليار ..
* الشاب رفع أكثر من صورة للأسد وأكد أن السعر قابل للتفاوض المعقول ..
* يعني الأسد أغلى من (التوسان) ..
* (650) مليون دي بتجيب ليها توسان بحالة جيدة ..
* من حق هذا الشاب أن يطلب هذا الرقم الفلكي في (أسده) ولكن عبيط الزول البشتري ..
* الأسد كحيوان لا ينكر أحد أنه صاحب كاريزما وحضور وشخصية قوية ومهابة جعلته يتوج رئيسا للغابة بدون حتى إنتخابات ..
* والأسد رغم شراسته إلا أنه صاحب مبادئ وقيم ..
* مبدأ الأسد في الحياة أنه لا يأكل الميتة ..
* الأسد لو (مشتهي ليهو خروف ولقى ليهو خروف ميت ما بياكلو وممكن يصبر على الجوع لحدي ما يلقى ليهو خروف حي يكتلو بعد داك ياكلو) ..
* دي أخلاق الأسد كده ودي فلسفتو في الحياة ..
* الحيوانات الأخرى التي لا تملك شخصية الأسد ولا قوة قلب الأسد ولا عضلات الأسد، هذه الحيوانات تأكل الميتة ولا تقدر على أكل الحية ..
* وبما أن ذلك كذلك فان التشبيه يمكن أن نستفيد منه في الرياضة ونقول أن المريخ لا يأكل الحية بل هو من عشاق الميتة والشبعانة موت كمان ..
* يحقق الهلال الألقاب على طريقة الأسد ولا يأكل الميتة ..
* يأكل الهلال من عرقه ويستمتع بالانتصارات العصية والصعبة ..
* ويحقق المريخ بعض ألقابه بطريقة ميتة وليس فيها جهد يذكر ..
* ينسحب الهلال من بطولة الدوري الممتاز فيفوز المريخ باللقب (الميت) ..
* يظلم التحكيم الهلال ويفوز المريخ باللقب (الميت) ..
* والغريبة بيشيلو لقب (ميت) ويفرحون به وكأنه لقب (حي) ..
* الطرق التي يفوز بها المريخ بالبطولات لا تشبه الطرق التي يفوز بها الهلال ..
* الهلال يعتمد في بطولاته على جهد لاعبيه وعرقهم وحناجر جماهيره ودعم إعلامه ووقفة مجلس إدارته ..
* والمريخ يعتمد على (المكتب) ويعتمد على (كوارث الهلال) ..
* تحصل كارثة للهلال مثل كارثة الإنسحاب من الدوري أو كارثة الست نقاط فيفوز المدفور باللقب ..
* وهكذا ..
* الآن جماهير الهلال تنتظر عودة النقاط الست حتى يتوج الفريق بكأس الدوري ..
* الست نقاط لو رجعت فان المريخ لو فاز على مريخ الفاشر بعشرين هدف لما نال شئ..
* ولو لم تعد النقاط فان الكأس سيذهب ميتا للمريخ لأن مريخ الفاشر لن يفوز اليوم ..
* مريخ الفاشر لن يفوز لأن المريخ الشهير ب(المدفور) سيفوز كسر رقبة ..
* مريخ الفاشر من الفرق القوية والتي مثلت دارفور خير تمثيل في بطولة الدوري الممتاز ..
* ولمريخ الفاشر وقفات قوية أمام المدفور ..
* لو لعب مريخ الفاشر من أجل الفوز سيفوز خاصة وأن اللقاء يقام على ملعب إستاد النقعة وما أدراك ما النقعة ..
* فاشر السلطان وجمهور السلاطين يجب أن يبعدوا أنفسهم من كل الشبهات وأن يجتهدوا ويعملوا للفوز ..
* في النهاية نحن بتهمنا سمعة ممثل الفاشر لأن الفاشر لها رمزية تاريخية ودينية ومواقف وبطولات ..
* وما يهمنا أكثر أن يحقق الهلال الفوز اليوم بعروس الرمال ..
* هلال الأبيض فريق كبير وعندما يلعب على أرضه تزداد خطورته ولذلك لابد أن ينتبه الهلال ويلعب وكأن المباراة مباراة كأس ..
* نعمل العلينا ونتابع انتصاراتنا ومن بعد ذلك ننتظر حقنا من الفيفا ..
* ست نقاط كانت في رصيدنا، ست نقاط حلال ضاعت بسبب خطأ إداري ..
* كانت بين أيدينا وأصبحنا نبحث عنها عبر المحكمة وعن طريق المحامي ..
* وهذا قمة الألم ..
* لما حقك يبقى ما حقك هذا ألم حقيقي ..
* عموماً ننتظر الست نقاط ولا ننتظر مريخ الفاشر..
* أتخيل الست نقاط ترجع ونشيل الدوري وبهناك هلال الأبيض يشيل كأس السودان ..
* أصلاً نحن تخطيطنا المستقبلي أن يصبح هلال الأبيض وصيفا للهلال ..
* في خطتنا هلال الابيض وصيف، والموردة ترجع تبقى ضلع تالت والخرطوم رابع والمريخ خامس ..
* الهلال وهلال الأبيض في الأبطال، والموردة والخرطوم الوطني في الكونفدرالية، والمريخ في سيكافا ..
* ده تخطيطنا بعد تلاتة سنوات ..
* ح يكون عندنا خمسة فرق مشاركة باسم السودان ..
* أربعة وخامسنا المريخ ..
* والموضوع ده ما بعيد ..
* تلاتة سنين بإذن الله ..
* وإلي ذلك الحين نتمنى فوز الهلال اليوم ونتمنى أن يقدم الهلالين مباراة تسعد وتمتع جمهور عروس الرمال..
* ونركب صافنات ونجيبة (دارفورية) وأصلو الزول بيموت والذكرى تفضل حية ..
* و..و..
* ودارفور بلدنا راجيانا نعمل ونعلي شأنا ..