محمد الطيب الأمين: مسحنا الليمون عشان نكبر وكبرنا بعد ما كبرنا !!

الخرطوم: باج نيوز

* قبل بلوغنا سن الرشد كنا نجتهد كثيراً في سبيل أن نصبح (ناس كبار) بالعافية كده ..
* وفي سبيل ذلك (مسحنا الليمون) في (محل الشنب والدقن) بعد أن علمنا أن الليمون بقوم (الدقن والشنب) ..
* كانوا بيقولوا لينا لو مسحت (ليمونة) بيقوم ليك شنب ..
* وقد إستهلكنا كثيراً من الليمون في سبيل الحصول على الشنب قبل حلول موعده ..
* حاولنا نبقى كبار بـ(الرجاله كده) وجربنا نلبس ملابس ناس أكبر مننا ، وجربنا نقعد مع الناس الكبار وجربنا نمشي المسجد برانا وجربنا نشرب سجائر وقهوة وحلبة ..
* كل حاجة بيعملوها (الكبار) جربناها ونحن (صغار) وكان ذلك محاولة مننا لكي نصبح كبار ..
* الواحد فينا كان بيلبس (مركوب أبوهو) و(بحشي قطعة قدام محل الأصابع عشان المركوب يكون ظابط) ..
* فعلنا الكثير وفي النهاية ما كبرنا إلا بعد ما كبرنا ..
* وحالياً كبرنا وكبرت أحزانا وبقينا نقول (ياريت) ..
* وبما أن ذلك كذلك أعتقد أن هنالك من حاول أن (يمسح ليمون) لأهلي شندي حتى (يبقى قدر الهلال) ..
* دايرنو يبقى قدر الهلال بالرجالة كده ..
* أهلى شندي فريق محترم وتجربته في الدوري الممتاز هي تجربة حافلة بالتحدي والإثارة وتستحق الوقوف عندها ..
* وقد دعمت شندي الجميلة فريق الأهلى وصنعت منه فريقاً يلعب كرة قدم ممتازة ..
* ولكن الجميع نسى أن الهلال يبقى هلال وأهلي شندي يبقى أهلى شندي ..
* ليس هنالك ندية كما أن الأهلى لا يعتبر منافساً للهلال حتى وإن حقق كأس السودان على حساب الهلال ..
* لو فاز الأهلى على الهلال مرتين تلاتة ده ما معناها الكتوف إتلاحقت ..
* والحقيقة أن ما يقدمه أهلي شندي إنما هو بسبب الهلال لأن الأهلى من صناعة صلاح ادريس بعد أن (زعل وقنع) من الهلال ..
* بسبب (زعلة) من الهلال قام الأرباب عمل أهلي شندي ..
* طفرة الأهلى سببها الهلال ..
* زي ما المريخ بيشارك في الأبطال بفضل الهلال فان الأهلى شندي يقاتل من أجل أن يبقى هلال ..
* ودي بالذات صعبة ..
* صعبة لأن الهلال هو سودان وشعب وأمة ..
* تمر به ظروف ولكن في النهاية هو الهلال ..
* نزعل نغضب ننتقد ولكن الهلال هلال ..
* ولذلك ما في عقدة بعد اليوم في إستاد شندي ..
* وأصلاً من الأول المفروض ما تكون في عقدة ..
* ولا المفروض تكون في حساسية بين الهلال وأهلى شندي ..
* شندي مدينة هلالابية بتحب الهلال والهلال بحبها ..
* في الموسم الماضي حقق الهلال الفوز على الأهلى شندي داخل شندي أيام كان خالد بخيت مدرباً..
* وأمس الأول تحقق الفوز الثاني على التوالى في الدوري ..
* ليبقى الكبير كبير ..
* هذه النتيجة يجب أن تصحي بعض الذين يريدون لأهلى شندي المجتهد أن يصبح (هلال) في أربع سنوات ..
* ما كده يا جماعة ..
* القصة دي أصعب من كده ..
* ولعل أجمل ما في اللقاء اللياقة البدنية العالية جدا التي لعب بها نجوم الفريقين وخاصة الهلال ..
* الهلال صحصح في الشوط الثاني بعد أن سيطر الأهلي على الحصة الأولى ..
* وجاءت الرصاصة من الرصاص بشة الصغير الذي سجل هدفه الغالي قبل أن (يعرق) ..
* نزل الملعب ومعاهو هدفه ..
* وبشة بهذا الهدف أحرج الأهلي وأحرج الهلال ..
* بهدف واحد أحرج بشة الصغير برازيلي الأهلي وسنغالي الهلال ..
* بشة لاعب كبير وصاحب إمكانيات كبيرة وهو واحد من أهم إشراقات الكرة السودانية ومستقبلها الزاهر ..
* واثق من نفسه ومؤدب ويلعب بالقدمين وصاحب خيال وحضور ..
* ووجوده في الكنبة أو خارج القائمة يبقى ظلماً للهلال قبل أن يكون ظلم له ..
* بنظلم الهلال لما نحبس بشة الصغير وهو بكل هذا الثراء الإبداعي ..
* نتمنى ونأمل أن نشاهد بشة الصغير في كل المباريات القادمة بما فيها مباراة القمة ..
* لابد للجهاز الفني ان يستغل الروح المعنوية لبشة الصغير بعد هذا التألق والهدف الجميل ..
* هدف لا يسجله إلا لاعب فنان ..
* إستغلال روح بشة ستخدمه هو وستخدم الهلال ..
* والإستغلال يكون بإشراكه في المباريات القادمة ..
* يعني ما ترجعوه الكنبة تاني ..
* عشان ما يتحطم ..
* اللاعب إنطلق فلا توقفه مجددا ..
* حتى وإن أخفق في اللقاء القادم يجب أن يواصل ..
* وعقبال أن تتاح الفرصة للنجم الفنان مؤيد الصيني ..
* مؤيد الصيني إذا دخل التشكيلة وكتب له التوفيق لن يخرج إلا معتزلا بعد سنوات طويلة إن شاء الله ..
* خير الهلال في شبابو مع ضرورة إستمرار الخبرة ..
* الخير في الشباب ..
* وإشراك الشباب يحتاج لشجاعة وصبر وتشجيع ..
* بشة الصغير يحتاج لحافز خاص ..
* بشة وراء بشة والهدف واحد ..
* من بشة ولبشة ..
* ونركب صافنات ونجيبة (شنداوية) وأصلو الزول بيموت والذكرى تفضل حية ..
* و..و..
* والكبير كبير (بدون ما يمسح ليمون) ..