محمد وداعة: مليارات البترول ..مشت وين ؟
السلام عليكم ورحمة الله تعالى وبركاته انا دكتور الجميعابي داير اعلق لي اخونا دكتور نواري وللناس المهتمين بقضية التنمية وبقضية البترول وضخُه، وحقيقةً نحنا ما قادرين نجاوب للشعب السوداني ولا لقطاع المثقفين ولا للقيادات السودانية الموجودة عن سؤال انا ما زلت بسألو لنواري لأنو بفترض انهو قدامنا في الجوانب دي مافي اي اتنين تلاتة ، ومن ناحية مهنية ،دكتور نواري الشباب السوداني وشباب السودان بسألو منذ ان بدأت قضية استثمار البترول؛ أين ذهبت اموال البترول؟ وكم هو عائد البترول؟ومين الكان عارفو؟هل ياها هي المجموعة دي زاتها ، انتا بترجع الفضل الان لي عِوَض الجاز ،أين ذهبت عائدات البترول؟وكم هي؟ايشمعنا ملف البترول يدار بسرية وتعتيم غير عادي؟ إحنا ما قادرين نفهم إحنا ما قادرين نجاوب؛ نحنا قيدات مجتمع، أين ذهبت أموال البترول؟وكم هي كانت ومين البعزكا ؟ولو ما بعزكا أين هي؟ومحفوظة وين؟ دا سؤال انا بسألو والله العظيم من اسوأ أقدارنا في الحكم حقيقةً طول الأمد.. نحنا ياخي ما قاعدين نفسح لي زول عشان يجي يحاسبنا ولا عشان زول يسألنا انت بتسأل منو؟ونسأل منو؟والبقدر يسأل منو؟والبجاوب منو؟شايف! لأنو اي زول قاعد لي في محطة وقاعد لي في موقع ، قاعد ليهو عشرين سنة تلاتين سنة واربعين سنة ، ماشين الان ماسك الاقتصاد ماسك التغيير ماسك البترول ماسك الان في اي معني اشرح لي اي معنى يخلي زول واحد يكون ماسك اخطر اربع إدارات في الخارجية عشان يديرها هو بعيد من وزارة الخارجية وليه؟والبسألو منو؟هو كان تبع منو؟ لي رئيس الدولة ؟ لي مجلس الوزارة؟ لينا نحنا؟ ليكم انتو؟ ولا لي رب العالمين؟ ياخي دي أسئلة من حق الناس يسألوها أين ذهبت اموال البترول هسي الجاي دا الجاي دا حيكون مسؤول منو منو؟ الركابي وزير المالية؟ الأمن الاقتصادي؟ انت؟اخرين؟ عِوَض الجاز؟ يعني الكلام دا ليك يا نواري وللناس البسمعونا مال البترول دا منو الرقيب عليهو الان؟ هسي فينا زول قادر يفهم حاجة انتا قادر تفهم الإيرادات كم؟ وتفهمن من منو وانصرفت وين تفهمها من منو؟ هل المجلس الوطني فاهم حاجة؟ هل المجالس التشريعية فاهمة حاجة؟ هل فاهمينا الولاة وزراء المالية ولا دي شغلانة ماشة بي نظرية المشيخة يعني عمد و مشايخ بالعين قبايل وغيرو يا نوراي انتا زول عشت في إنجلترا وفِي بريطانيا يعني عشت في دولة فيها مستوى شفافية عالي جداً نحنا هل ممكن تجربو لينا تقولو لينا التجربة دي ؛تجربة متابعة الإيرادات الداخلة والمارقة عشان المواطن السوداني يطمئن لينا ياخي عشان نحنا على الأقل نكفر التمانية وعشرين سنة التلاتين سنة الحكمناها دي؟ وانا في تقديري الشخص يدير ملفات قعد فيها زول عشرين سنة وتلاتين سنة في البترول وفِي غيرو وفِي غيرو حواة دي والده ياخ ديل دايرن شنو؟ ما يغادرو يمشو يمشو! واحد قاعد ليهو من الإنقاذ دي ما بدت ما غادر وزير اتحادي يعني دا نبي؟ الرسول صلى الله عليه وسلم تلاتة وعشرين سنة كمل مهمتو ومشى كملها كلها ومشى ، دعوة ودولة ماف سبب اخوي ماف سبب،ماف سبب يخليني أخت عِوَض الجاز كتر خيرو وبارك الله فيهو واخرين لكن انا في تقديري الشخصي يجو ناس تانين اقل شي من ناحية عمر ساي نقدر نسألهم اسئله،انتا بتقدر تسأل عِوَض الجاز؟ ولا بتقدر تسأل ليك زول من الإنقاذ دي قامت وزير اتحادي ماسك الأجهزة الأمنية تسألو بياتو صفة وعندك شنو و بياتو قوة …………الخ ،
هذه اسئلة مشروعة ، وسئلت من قبل ، الجديد فيها انها تأتى من احد رموز الانقاذ ، احد الغلاة سابقآ ، المتبرئ حاليآ من خطايا الانقاذ ، وهو يطلب ان يكفر عن (28) عامآ حكمتها الانقاذ ، وان كان الامر تعلق باموال البترول فهذه واحدة من كوارث الانقاذ ، المطلوب اكثر من ذلك ، الامر يتطلب ان تكفر الانقاذ عن خطاياه اولآ بفك اسر البلاد و الاعتراف بكل الاخطاء ، والاعتذار للشعب السودانى ، ورد امر السلطة اليه ، و رد او استرداد الاموال المنهوبة و تعويض الضحايا والمفصولين و كل الذين تضرروا من حكم الانقاذ ،
نوارى قال ان اموال البترول حتى 2010م حوالى (51) مليار دولار ، و قدرتها شركة استشارية امريكية بطلب من حكومة جنوب السودان قبل الانفصال ب( 68) مليار دولار ، و قال د. مالك حسين انها ( 200) مليار دولار ، و ان كانت هذه او تلك يظل السؤال قائمآ و مشروعآ ، مليارات البترول ..مشت وين ؟
التعليقات مغلقة.