محمد الطيب الأمين: الهلال فيهو (ضفادع سمان) !!

* لم يجد المجتمع تشبيهاً لكل فاسد ومستهبل أفضل من (القط السمين) ..
* والقط معروف أنه (حيوان أليف) يعيش معنا في بيوتنا وفي غرفنا ومطاعمنا ومكاتبنا ..
* القط (يسمن ويضعف) حسب الظرف الإقتصادي الموجود في البيئة التي يعيش فيها سواء أن كان (بيت أو مطعم أو مستشفى) ..
* وأذكر كان لنا صديق كلما زرنا مستشفى تجده (يكثر النظر ويطول التأمل) في كدايس المستشفى ..
* كل ما نمشي مستشفى صديقنا ده بعاين للكدايس الموجودة في المستشفى بطريقة غريبة ..
* بعاين للكديسة في المستشفى أكثر من معاينته للمريض الذي نحن بصدد زيارته ..
* مرات بيجيني احساس انو صديقنا ده شبه كديس المستشفى على كديستهم ..
* ولكن الحقيقة أن لصديقنا هذا فلسفة تقول: لو كديس المستشفى سمين أعلم أن أكل المستشفى كعب ..
* عندو فلسفة إنو أكل المستشفى لو كعب فان المرضى والمرافقين يتفضلون بالأكل للكدايس فتسمن هي ويضعف المريض والمرافق ..
* أنا أعتقد أن تشبيه (الحرامية وانصاف الحرامية) بالقطط السمان فيهو ظلم لهذه القطط ذات الطبع الخجول والحياة المسالمة ..
* ولذلك يجب أن نطلق عليهم إسم : (الضفادع السمان) أو (البغل السمان) أو حتى (الكلاب السمان) ..
* بالطريقة دي ظلمنا مجموعة من (الكدايس) ونحن نشبههم بمن لهفوا أموالنا بالباطل ..
* الكديسة لو بالغت وشذت وخرجت عن طور الأدب والضمير فإنها يمكن أن تخطف (نص ربع لحمة) أو تشرب (نص رطل لبن) في غفلة من سيد البيت ..
* غيروا هذا التشبيه حتي لا نظلم القط وتذكروا (عذبت امرأة هرة وحبستها حتى ماتت فدخلت فيها النار) ..
* عموماً وبما أن ذلك كذلك فان في الهلال توجد (ضفادع سمان) ..
* وهذه الضفادع تهمها مصلحتها في المقام الأول والثاني والثالث والرابع ..
* وهي ضفادع لا تتألم لخسارة الهلال ولا تتوجع لسقوط الهلال ..
* ضفادع لا هي شبعت ولا هي عندها نية تشبع ..
* ضفادع تفعل كل ذلك بينما الهلال ماشي (ضعيف) ..
* هم يسمنوا والهلال يضعف وجمهوره يتألم ويتوجع ..
* ضفادع (شلعت الهلال وكسرت أنيابه وسرقت هيبته) فأصبح سيد افريقيا يتهاوى أمام (أقزام افريقيا) من شاكلة الفريق الموزمبيقي المغمور والهزيل ..
* حب الهلال موكر في كل القلوب البيضاء النظيفة التي لا تميل حيث الجيوب المنتفخة ..
* حبينا الهلال ولن نتركه مهما (مال الحال) ولن نتوقف عن النصح فهو أضعف الإيمان ..
* ومن حق كل هلالي أن يقدم نقده ويقول كلمته في حدود الأدب طلما الهدف هو إصلاح الحال ..
* الوقت ليس هو وقت إيجاد مبررات من شاكلة (الفريق في حالة بنيان، والمحترفين لسه جدد، والمدرب لسه ما تعرف على إمكانيات اللاعبين) ..
* التبريرات دي ده ما وقتها والله العظيم ..
* لو الهلال في حالو الطبيعي أقسم بالله فريق زي الموزمبيقي ده لا دايرو ليهو مدرب سنغالي ولا داير ليهو هارونا ولا توماس ..
* فريق زي ده يفترض لما يدخل إستاد الهلال يخسر (3/0) قبل المباراة تبدأ ..
* إيجاد المبررات في كل الأوقات سيتضرر منه الهلال على الأمد القريب والبعيد ..
* طرنا من دوري الأبطال الناس بررت وقالت الفريق في حالة بنيان ويجب أن نصبر ..
* طرنا من كأس السودان أمام ود هاشم والناس بررت وقالت الفريق في حالة بنيان وعناصر جديدة ويجب أن نصبر ..
* الآن ونحن نتأهب للطيران من الكونفدرالية وبرضو الناس بتقول بنيان وعناصر جديدة ..
* يا جماعة الصبر عندو مقومات ولوازم ..
* أنا ممكن أصبر لي على حاجة ماشة لقدام حتى ولو ماشة ببطء شديد ..
* لكن لا يجوز الصبر في حاجة كل يوم بتزيد في الانهيار والفشل ..
* هسه أنت لو (أجرت ليك دكان بي تلاتة مليون في الشهر وفتحتو بقالة وفي الاسبوع الاول كانوا زباينك 100 نفر وفي الاسبوع التاني زباينك بقوا 92 نفر وبعد تلاتة شهور بقوا 14 نفر وبعد ستة شهور بقي ما في زول بيشتري منك إلا حماتك وحماتك ذاتا بتشيل منك بالدين) ..
* في حالة زي دي بتقفل الدكان وتبحث عن مكان آخر ولو بتقعد تنظر وتبرر لروحك لحدي ما سيد الدكان يطردك ؟ ..
* يا جماعة الكاردينال في أول سنة مع الهلال الفريق كان ممتاز ، وفي السنة الثانية للكاردينال مع الهلال الفريق بقي جيد ، وفي السنة الثالثة للكاردينال مع الهلال الفريق بقي مقبول ، وفي السنة الرابعة للكاردينال مع الهلال الفريق بقى ضعيف ، والله وحده يعلم في السنة الخامسة والسادسة الفريق ح يبقى شنو ..
* ده بيأكد إنو الهلال في حالة تراجع وتدهور، وهذا يحتاج لإصلاح عاجل وفهم كبير ونفوس طيبة ..
* الناس البيصنفوا الناس ( ده كاردينالي وده اربابي) هم في الحقيقة جزء من أزمة الهلال ..
* الوضع في الهلال ما مستحمل تنظير وتصنيفات ..
*قلنا ان الكاردينال في السنة الاولى كان الفريق ممتاز ومع مرور السنوات أصبح ضعيف يعني ماشين لتحت ما ماشين لفوق ..
* ودي حقيقة يرفضها من يرفضها ويجملها من يجملها ولكن تبقى هي حقيقة يثبتها شكل الهلال ومضمونه ..
* وحسرتنا كبيرة لأن الكاردينال (ما زول كعب)، عمل جوهرة وفندق وقناة فلماذا غلبه فريق الكرة الذي هو رأس مال الهلال ؟
* لماذا فريق الكرة غلب الكاردينال (ستة صفر) وهو من رجال المال والأعمال الذين لا يخذلهم (القرش) ؟؟
* هل السبب الضفادع السمان أم نفوس أهل الهلال أم هو عدم توفيق يلازم الكاردينال ويمنعه الفرح حتى ونحن نلاعب صغار أفريقيا داخل استادنا ؟
* صحيح التعادل في مباراة لا يعني نهاية المطاف، والخروج من بطولة لا يعني نهاية الدنيا ولكن السؤال هل هذا أول تعادل وأول خروج وهل سيكون الأخير ؟
* من حق أي زول يحب الكاردينال ويعتبره أفضل رئيس على مر التاريخ لكن كمان عشان خاطر الهلال يجب أن تنتقدوا الكاردينال عندما يستحق النقد دون أن ينقص ذلك من حبكم إليه ..
* وتذكروا أن سبب تعارفكم مع الكاردينال هو الهلال ..
* يعني العرفكم على الكاردينال هو الهلال ويبقى من باب الوفاء للهلال أن نقول للكاردينال أحسنت عندما يحسن وننتقده عندما يفشل ..
* نقدم الهلال علي الكاردينال عشان حياتنا تمشي وعشان ده الصاح وعشان الهلال بيستاهل ..
* أجري عملية إصلاح شامل يا الكاردينال وأبعد الضفادع السمان والسماسرة والمصلحجية واصبر على الاجهزة الفنية وسجل لاعبين في قامة الهلال وحارب (القيل والقال) وأختار الكلمة الطيبة وقبل هذا كله (تواضع في حكم الهلال) ..
* أتواضع يا ريس وأسأل الله التوفيق وما بتجيك عوجة إن شاء الله ..
* عدم التوفيق الذي يعاني منه الكاردينال مزعج جداً والحل بيد الخالق العزيز.. أول خطوات الحل رفع الظلم ومنع الاساءات والتواضع ..
* واللهم إني بلغت فاشهد ..