محمد الطيب الأمين: عندهم (شُفع) قليلين أدب خلاص !!

* في السودان يكاد لا يخلو (عرس) من مشكلة و(زعل) وملاسنات وربما (حردان) ..
* المشاكل في المناسبات بتبدأ في شكل (ملاحظات) ومن بعد ذلك بتطور حتى تصل مرحلة (الدُشمان اللفظي) ..
* والملاحظات الأولية للأسف بتبدأ بسؤال يقول : (العريس من وين) ؟؟
* (منطقة) العريس و(قبيلته) هي أول ملاحظة ومن بعد ذلك تأتي الملاحظات تباعا ..
* مرات بيكون سبب الخلاف في (الثياب) ومرات في (المأكولات) ومرات في (المال) ومرات حتي في (الصابون) ..
* قبل فترة عندنا عريس رجعو ليهو (شيلتو) لأنو جاب لأهل العروس (صابون بشرى) وهم قالوا عايزين (صابون تيري) ..
* بسبب خلاف في نوع الصابون إنهار (بيت الحلال) قبل أن يبدأ ..
* والله صحي ..
* وهنالك خلافات في المناسبات بسبب (الأطفال) ..
* يقول ليك : عندهم شُفع قليلين أدب خلاص ..
* ومرات يقولوا ليك : (العريس عندو خالتو أنا من شفتها ما إرتحت ليها) ..
* أما (أس المشاكل) في الغالب بيكون بسبب الزيارات وما يصاحبها من مطاعنات ..
* (أم العريس) لما تمشي لأهل العروس تقول ليك : (ما إستقبلونا كويس جابوا لي الموية وأخواتو قعدن يتغامزن ويضحكن وخاشات الواتساب) ..
* أو تقول ليك : (بري منهم بيتهم وسخان وقعدوني في العريشة) ..
* بتذكر مرة أم العريس حلفت إنو ولدها ما يتم العرس لأنو قالت لما مشت لأهل العروس لقت أم العروس محننة وسلمت عليها ببردود ..
* ما يحدث في هذه المناسبات وبشكل يومي حدث للمريخ بمدينة الأبيض ..
* ناس المريخ أ تقول مشوا الأبيض عايزين (يناسبوا هلال التبلدي) ..
* بتكلموا كده وكأنهم عايزين يناسبوا مولانا أحمد هارون ..
* قالوا ما إستقبلونا كويس ..
* قربوا يقولوا لقينا ناس الأبيض (محننين وسلموا علينا ببرود) ..
* قالوا ما لقينا فنادق ، والوالى ما جانا زيارة ولا في زول إشتغل بينا ..
* وأنا حقيقة قبل أن أسترسل في الموضوع أحب أنبهكم إنو المريخ هو ليس هلال ..
* دي أهم حاجة لازم تعرفوها ..
* يعني ما تقارنوا نفسكم بالهلال ..
* لما تشوفوا الهلال (ضبحوا ليهو الخراف) أو إستقبلوهو بالخيل والجمال والفرق الشعبية ، لما تشوفوا الحاجات دي حصلت مع الهلال ما تعشموا في حاجات زي دي تحصل معاكم ..
* لازم تراعوا (فارق التوقيت) ..
* والناس مقامات ..
* الحاجات دي من الله ..
* القبول من الله ..
* ربنا قدر إنو الهلال يكون كده وكمان قدر إنو المريخ يكون (مواطن ساكت) ..
* الحاجات دي مكتوبة ومسطرة ..
* ناس المريخ لو كان مشوا الأبيض عشان (يتقدموا لبت) على بالقسم كان من الزعل رجعوا في نفس اليوم ..
* لكن الحمدلله الموضوع طلع (كورة وليس نسب) ..
* أنا بالجد ما فهمت هم عايزين مولانا أحمد هارون يعمل ليهم شنو ؟؟
* قالوا مولانا ما زارنا ..
* أها قول زاركم ؟؟
* شنو يعني ؟؟
* لو زاركم يعني هل كان ممكن (كورة كاريكا تمشي المدرجات) ؟؟
* وحبيبي آه قلبي تاه في يوم الزيارة ..
* قالوا ما لقينا فنادق ..
* وإتهموا الوالى بأنو طلب من الفنادق عدم إستقبال المريخ ..
* هو يعني مولانا خلاص فاضي للمريخ للدرجة دي ؟؟
* دايرنو يخلي النفير والطريق الغربي والموية والصحة ويجيكم زيارة ؟؟
* يزوركم بمناسبة شنو يعني ؟؟
* ممكن نعرف سبب الزيارة ؟؟
* وبي زيارتك بيتنا نور وكلو زينة ..
* الحقيقة أن (الوصيف خفيف) وفي الأبيض إنكشف وكاريكا تم ليهم الناقصة ..
* كاريكا قصد ينبه المريخ ..
* قون كاريكا زي حكاية الزول البيعمل ليك مسكول وقبل ما تشوف التلفون يرجع ليك بمكالمة عديل ..
* يقول ليك عملت ليك جرس قلت أشوف التلفون لو فاتح ..
* طيب وقت لقيتو فاتح قفلت لشنو ما كان تواصل بدل تقفل وترجع تاني ؟؟
* غايتو جنس غايتو ..
* هسه كاريكا عمل مسكول للمريخ وبإذن الله سيقوم الهلال بإجراء المكالمة يوم الجمعة ..
* يوم الجمعة بنعمل (الخدمة) وبنتصل عليكم ..
* أشحنوا البطارية بس ..
* وخلوا الشاحن قريب ..
* وعينكم ما تشوف إلا النور ..
* قلتوا هارون ما زاركم صاح ؟ طيب إحنا يوم الجمعة جاينكم زيارة المساء ..
* جهزوا لينا (شاي اللبن) و(رشوا النجيلة) ..
* مش إنتو دايرين الزيارات ؟؟
* أوكي ..
* يوم الجمعة بنزوركم وكمان بنقعد معاكم ساعتين عديل ..
* نتونس وفي النهاية نطلع منكم مبسوطين وإنتو زعلانين ..
* بس لازم تقدمونا لحدي الظلط ..
* قدمونا لحدي الباب ..
* أعملوا معانا الواجب زي ما كاريكا عمل معاكم أحلى واجب ..
* ومعليش ما تزعلوا من مولانا عشان ما إستقبلكم وعشان ما زاركم ..
* أكيد مولانا ما يقصد ..
* وإن شاء الله في زيارتكم الجاية للأبيض مولانا ح يزوركم ..
* هو عليك الله لو ما ساي مولانا يزور ليهو فريق ما عندو رئيس ؟؟
* وغايتو الله يكفينا شر (المصدي) اللمعتو الأيام ..
* ونركب صافنات ونجيبة (كردفانية) وأصلو الزول بيموت والذكرى تفضل حية ..
* و..و..
* ومن حور الجنان أم أنت من ….(عروس الرمال) ؟