محمد الطيب الأمين: كورية اللبن رز باللبن منو البياكلها ؟؟

* في حلتنا زمان كنا نبالغ في إحترام كل صاحب (صلعة) ..
* العندو صلعة كنا نتعامل معه معاملة خمسة نجوم ..
* لا نرفع أصواتنا فوق صوت كل صاحب صلعة حتي ولو كان في العمر أصغر منا ..
* قناعتنا إن الصلعة (يا حكمة ويا حكمة) ..
* ومع مرور الزمن كبرنا وعرفنا إنو الصلعة ممكن تجي لأي زول وما عندها علاقة بالحكمة ..
* الصلعة اكتسبت سمعتها الجيدة من العلماء والدكاترة ..
* أما الآن فإن الصلعة في الغالب بتمشي لناس ما بتقدر ..
* المستفاد من موضوع الصلعة أن المظهر لا يعكس الجوهرة في الغالب ..
* موضوع الصلعة يذكرني بناس المريخ في هذه الأيام ..
* ناس المريخ وبظروفهم المعروفة للماشي والغاشي استجلبوا ثلاثة أو أربعة محترفين فيهم اتنين من البرازيلي ..
* طبعا ما ح نقول ليهم من أين لكم هذا ولكن نقول أن المريخ مخدوع ومغشوش مثلما نحن كنا مغشوشين في بعض أصحاب الصلع اللامعة ..
* المريخ ووفق ظروفه المعروفة هذه الأيام في الغالب هو يختار المحترفين بالشكل العام ..
* لما الوكيل جاب ليهم السير الذاتية للمحترفين قاموا ركزوا علي صور المحترفين ..
* بختاروا عن طريق الصور ..
* لو شافوا المحترف قاصي شعرو على طريقة رونالدو بيركزوا عليهو ..
* ولو كمان المحترف طلع عندو دقن يكون ده عز الطلب ..
* الجماعة ديل من زمان عندهم غرام مع الدقون ..
* والله صحي ..
* من زمن باسكال بيفتكروا إنو كل صاحب دقن لعااااب ..
* داير تلعب في المريخ أعمل دقن وارسم ليك (فراشة) في عضلة اليد ..
* باسكال زمان قبل يعمل الدقن كان غاشي ناس المريخ بكم فراشة وعقربة مرسومة علي عضلاته ..
* هسه صلاح نمر لو داير يخش التشكيلة يفترض يرسم ليهو (تيس) في عضل اليد ..
* كيف نقتنع أن الذين استجلبهم المريخ هم لعيبة كورة ؟
* الضمان شنو ؟
* وكانوا بيلعبوا وين ؟
* الصفقة كلفت كم ؟
* وهل مجلس فشل في سداد مرتبات بكري والغربال وقصاري وأحمد آدم قادر علي التعاقد مع أربعة محترفين وبالدولار الحار ؟
* غايتو البرازيليين الإتنين ديل فيهم واحد سوري والله أعلم ..
* شكلو من دمشق كمان ..
* المريخ ما كان عندو نية للتعاقد مع أجانب ولكن لما سمعوا إنو رئاسة الجمهورية منحت الهلال أكثر من جنسية قاموا هم ذاتهم جابوا أجانب وطلبوا جنسية ..
* الهدف عندهم الجنسية وليس المحترف ..
* مستهدفين الجنسية ومن بعد ذلك الكورة ملحوقة ..
* نحن في الهلال نحمدالله مشاركين في المجموعات قبل انطلاقة التسجيلات بأيام عندنا تشكيلة ظهرت جديدة بقيادة بشة صغير ..
* الذين شاهدوا الهلال في مبارياته الأخيرة قبل التسجيلات اجزموا أن الفريق ما محتاج لاضافات ..
* ولكن دائماً طماعين ..
* إعلام الهلال بتجرد كبير انتقد الكارينال بعنف خلال الأيام الماضية حتى تتكرب التسجيلات ..
* الجميل عند الهلالاب إنهم يضربون بأقلام من حديد من أجل أن يكون الهلال الأفضل ..
* أما بالنسبة لاعلام المريخ فيكفي أن أخبار التسجيلات الحمراء عرفها جمهور المريخ من إعلام الهلال ..
* صحف المريخ تتعامل مع المريخ في عهد هذا المجلس بشكل مؤسف ..
* إعلام المريخ لو ما شافها شينة كان وقف مع الهلال ..
* بس خجلوا شوية ..
* المهم في الموضوع إنو مجلس سوداكال لازم يكمل دورته حتى ولو هبط المريخ للدرجة الاولى ..
* سوداكال صاحب حق وحق شرعي كمان ولذلك يجب أن يكمل دورته حتي آخر يوم ..
* بل أن سوداكال مطالب بأن يرتب صفوفه لخوض الإنتخابات القادمة ..
* نزع المريخ من حضن الحكومة مسؤولية سوداكال ..
* عشان نحن ذاتنا نعرف المريخ ببقى بدون جمال الوالي ولا ما ببقى ..
* ومطلوب من إعلام الهلال أن يلعب دوره التاريخي بدعم الشرعية ..
* إعلام المريخ تنكر لهذه المجموعة ولذلك نحن سنقوم بالواجب بإذن الله ..
* سنقف معهم حتى يقول سوداكال: نصرني إعلام الهلال عندما خذلني إعلام المريخ ..
* لن نخذلك يا سوداكال ..
* لن تسير وحدك ..
* ولو كترتو بندمج المريخ في الموردة ونسميهو الموردة ..
* ده طبعا بعد موافقة ناس الموردة ..
* والله ده مقترح ..
* بنقترح دمج المريخ مع الموردة حتي تكون هذه أول شاركة ذكية في الوسط الرياضي ..
* يذوب المريخ في الموردة ونسمي الفريق الموردة ..
* هكذا أقترح ..
* وأي زول طبعا حر في (اقتراحاتو) ..
* ونركب صافنات ونجيبة (دنقلاوية) واصلو الزول بيموت والذكرى تفضل حية ..
* و..و..
* وجينا بعد الفرقة نسأل…. كورية اللبن رز باللبن منو البياكلها ؟