محمد الطيب الأمين: الزهور صاحية وإنت نايم

* ضجت أمس وسائل التواصل الإجتماعي بصورة لمدرب الهلال محمد الطيب وهو (ينوم على الأرض).
* من خلال الصورة لم يظهر المكان هل هو (مطار) أم (فندق) .. ؟؟
* الصورة رغم إنها (عادية لحد ما) إلا أن تناقلها بتلك الكثافة جعل منها صورة غير عادية .
* أنا ما عارف الناس دي مستغربة في محمد الطيب عشان (نام) ولا مستغربة فيهو عشان يفترض ما يتم تصويرو وهو نايم ؟؟
* ما ينتظر الهلال في نيجيريا أكبر من (صورة).
* تركيزنا يجب أن يكون أبعد وأعمق من صورة لمدرب نايم ..
* يقولون : (يخلق من الشبه 40) ..
* ولتأكيد ذلك عليك أن تتأمل فستجد أن (مريخ العرضة ومريخ نيالا ومريخ الفاشر ومريخ الحصاحيصا) يشبهون بعض لدرجة التطابق ..
* أنا لما شفت (مريخ نيالا ومريخ هنا) إفتكرتهم (تيمان) ..
* والله صحي ..

* بخلاف (الوالد والوالدة) لا أحد يستطيع أن يفرز التيمان ..
* وأعتقد أن الزول الوحيد الذي إستطاع أن يفرز مريخ نيالا من مريخ العرضة هو محمد جعفر قريش وأسامة عطا المنان .
* ديل كانوا تيمان عديل داخل أرض الملعب ..
* أنا أقترح إنو مريخ نيالا يشارك في البطولة العربية بإعتباره مريخ العرضة .
* وأصلا كده كده الإتحاد العربي ما بيفرز مريخ نيالا من مريخ كوستي ولا بيفرز مريخ أم روابة من مريخ العرضة الملقب بـ(المدفور) ..
* هكذا أقترح ..
* وأي زول طبعاً حر في (مقترحاتو) ..
* وغايتو جنس غايتو ..
* المرمطة التي يعاني منها الهلال في مطارات أفريقيا كان يمكن تفاديها بالطائرة الخاصة ..
* (الجرجرة) التي تحدث للهلال في مطارات أفريقيا تجعل الفريق يصل بلد الخصم وهو في حالة من الاعياء والتعب ..
* سفرية الهلال إلي نيجيريا هذه المرة كانت تتطلب طائرة خاصة لأن خروج الهلال من الكونفدرالية يعني نهاية الموسم الأزرق ..

* دافع الهلال يجب أن يكون أكبر من دافع الفريق النيجيري ..
* الهلال يدافع عن سمعته ومكانته ..
* ظل الهلال وعلى مر التاريخ يتعفف من المشاركة في بطولة الكونفدرالية ولكن طالما (قدرنا رمانا فيها) يجب أن نكون على قدر التحدي ..
* المهم .
* لو داير تعرف إنو فعلاً المريخ (ضل) عليك أن تتابع السيناريو الذي يحدث مع جمال سالم الآن ..
* الهلال (خرب وش) مع مكسيم قاموا ناس المريخ (خربو وش) مع جمال سالم .
* المريخ يقلد الهلال حتى في (خربان الوش) ..
* حاجة تكسف والله ..
* إذا تأهل الهلال لمجموعات الكونفدرالية وهذا ما نتمناه فان الكاردينال مطالب بتغيير سياسته العرجاء تجاه فريق الكرة ..
* وإذا لا قدر الله وتعثر الهلال وخرج من البطولة فان الكاردينال أيضاً مطالب بأن يغير سياسته العرجاء تجاه فريق الكرة ..
* حكاية إيقاف مرتب لاعب عشان (دخل فيهو قون ساهل) ما بتنفع.
* وحكاية شطب لاعب عشان (وزنو زاد) برضو ما بتنفع ..
* وحكاية إبعاد أي لاعب من التشكيلة حال مطالبته بحقه ما بتنفع ..
* الحق حق ..
* إذا أراد الكاردينال ان يحرم مكسيم من مرتبه عشان (دخل فيهو قون ساهل) فان الكاردينال من الموسم القادم يمكن أن يعاقب الثعلب بخصم مرتب تلاتة شهور إذا لعب (باص قصير) ..
* بالطريقة دي الكاردينال ح يعاقب اللاعبين حتى في الباص والعرقلة ورمية التماس .
* وإدارة كرة القدم لا تتم بهذا الفهم الغريب والعجيب ..
* في كل الاحوال الكاردينال مطالب بأن يغير طريقته هذه لأنها ستقود إلي مرحلة يصعب العودة منها ..
* اليوم يتوجه المريخ الشهير بـ(المدفور) إلي سنار لمواجهة ود هاشم ..
* والمريخ الذي يتواضع داخل إستاده الشهير بإستاد الحكومة لن يصمد في إستاد سنار التاريخ ..
* ود هاشم عليه أن يشرف سنار وناس سنار ..
* سيكون المريخ من أسهل الفرق التي يمكن لود هاشم تجاوزها ..
* المريخ داخل الأرض وخارج الأرض بقى واحد ..
* بتغلب جوة وبرة ..

* أنا العاجبني في ناس المريخ إنو بقوا ما شغالين كتير بحكاية (الجمهور والأرض) ..
* والله صحي ..
* أي ملعب ممكن يتغلبوا فيهو حتى لو كان ذلك هو ملعبهم ..
* الظريف في الأمر.. قالوا اللاعبين أمس بعد التمرين تعاهدوا قبل السفر إلى سنار ..
* تعاهدوا على شنو ؟؟
* بيكون إتعاهدوا على إنو ما يتغلبوا كتير ..
* فهم برضو ..
* وغايتو الله يكفينا شر (المُصدي) اللمعتو الأيام ..
* ونركب صافنات ونجيبة (سنارية) وأصلو الزول بيموت والذكرى تفضل حية .
* و..و..
* وأوعديني بكلمة منك وأحكي ليا عني و…..(جمال سالم البقى صفاية) .