محمد الطيب الأمين: علي بلدو.. القُعاد مع الخواجات ما بغير اللون !!

* (شعرة رفيعة جدا) تفصل ما بين (الخيال الخصب والوهم الكبير) ..

* و(الوهم) له كثير من التفسيرات أبرزها أن تظن (بأن القُعاد مع الخواجات ممكن يغير لونك) ..

* في ناس من شدة الوهم الواحد بيجيهو إحساس إنو لو قعد ليهو مع (خواجي) ممكن لونو يتغير ..

* وده وهم كبير دون شك ..

* أيضاً يمكن أن نقول أن (الوهم عند بعض الناس هو زيادة في المحلبية)..

* يقول ليك: (كترت المحلبية)..

* و(كترت المحلبية) عند السودانيين تعني إنك قد (بالغت أو شطحت أو سرحت شديد)..

* مثلاً.. كان عندنا (بت في حلتنا) كل ما تقابلني بتقول لي: (أمبارح إتقدم لي سعد الدين حسن لكن رفضت) ..

* وأنا بقول ليها: بركة الرفضتي وخيرو في غيرو ..

* بعد أسبوعين (نفس البت دي) بقابلها بالصدفة بتقول لي: (يوم الجمعة الفاتت نزار حامد رسل لي جلكسي مع بكري المدينة) ..

* وأنا بقول ليها: (كتر خيرو نزار حامد كريم وإنتي بتستاهلي) ..

* في العيد لما أقابلها بتقول لي: (أنا حزينة شديد لأنو الناس بتقول لي إن شاء الله السنة الجاية في بيتك)..

* قلت ليها: طيب دعوات الناس دي حاجة كويسة لما زول يتمنى ليك السنة الجاية تكوني في بيتك، قالت لي: لا أنا ما عايزة أعرس..

* وطبعاً هي النهار كلو لافة من شيخ لشيخ عشان يجيب ليها عريس..

* ودي كلها أوهام ..

* هنالك أوهام مخلوطة بـ(حبة خيال) ..

* ودي أخطر أنواع الأوهام لأنها بتولد أفكار مشاترة وأفكار غبية جداً..

* مثلاً..

* إحنا قاعدين في (صمة خشمنا) ظهر لينا (علي بلدو) وقال داير يعمل ليهو (مدرسة لتعليم الرومانسية بالسودان) ..

* إتخيل ؟؟

* علي بلدو عايز يعلمنا الرومانسية في زمن أصبحت فيه (الرغيفة بجنيه والقميص بـ200 جنيه، والبامبرز القطعة الواحدة بـ8 جنيه، وتعرفة المواصلات بـ 10 جنيه، وشوال السكر بمليون جنيه، ولبن البدرة أقل وزنة بسبعة جنيه، وكيس النايلون منعوهو وجابو لينا كيس نايلون جديد بجنيهين..

* جانا علي بلدو عشان يعلمنا الرومانسية وكأنه (رجل تركي أو هندي الأصل والجنسية) ..

* وعلي بلدو في الأصل وعلى ما يبدو هو طبيب يتسول الشهرة والنجومية بطرق مختلفة فقد ظهر في الصحف (كاتباً) وظهر في الإذاعات والتلفزيونات (ضيفاً كثير الطلة والرشاقة) ..

* ومحبة علي بلدو الشديدة للشهرة والنجومية جعلته (يشطح) ويفكر في أشياء (مشاترة) في زمن (مشاتر) ..

* من حقه أن يشطح بخياله كما نملك نحن الحق في نقد شطحاته هذه ..

* علي بلدو قال عندو مدرسة بيعلم فيها الرومانسية وأنا حقيقة ما عارف هو بيقصد ياتو رومانسية ؟ هل الرومانسية بالمعنى القريب المتمثل في (لطف الكلمة والذوق) أم الرومانسية بالمعنى البعيد ؟؟

* وهل مدرسة علي بلدو للمتزوجين أم هي مفتوحة ؟؟

* تعليم الرومانسية هل هو (عملي) أم (نظري) ؟؟

* وهل في مدرسة علي بلدو هنالك فصول..؟ يعني سنة أولى لتعليم الكلمة الطيبة، وسنة تانية لتعليم الحنك، وسنة تالتة لتعليم البوسة..؟

* وهل نحن (كملنا العلم ورفعنا شعار السودان خالي من الأمية وأصبحنا تلاميذ في مدرسة علي بلدو الما جايبة حقها أصلاً) ؟؟

* وأهم من كده مدرسة علي بلدو دي لما تديني شهادة بإعتباري (خريج مدرسة بلدو الرومانسية) الشهادة دي بشتغل بيها في بنك السودان ولا في سد مروي ولا في قناة النيل الأزرق ؟؟

* الشهادة الرومانسية البيديني ليها علي بلدو دي بشيلها معاي يوم أكون ماشي أخطب حبيبتي ولا ما بشيلها معاي ؟؟

* يعني ممكن أشيل الشهادة أوديها لأبو البت أقول ليهو يا حاج معاك خريج رومانسي من مدرسة بلدو ؟؟

* طيب أقرأ دي يا بلدو رجل يبيع (أباريق ومساويك في السوق العربي، يخرج من المنزل بعد صلاة الصبح ويعود إلى المنزل بعد صلاة العشاء وفي جيبه 13 جنيه وفي يده خمس رغيفات و14 قطعة طعمية وشايل تلفون ربيكا وبنطلونو مقدود تحت الركبة مباشرة)..

* رجل بهذا التعب والكدر يريد علي بلدو ان يعلمه الرومانسية ..

* أقول لدكتور علي بلدو: أمنح هذا الرجل بيتاً في كافوري وعربة توسان وراتب شهري 15 مليون جنيه وستجده بعد ذلك رومانسياً أكثر من مهند حبيب نور ..

* علي بلدو جاء عشان يمسك بينا زمن ويشتهر على حساب أشياء أقل ما توصف بأنها فارغة ..

* ولذلك أنا أقول: الزول البيقعد يسمع شحطات بلدو ونظرياته (الماجايبة حقها) ده زول ما عندو شغلة ..

* وأخص القنوات الفاضية ..

* قنوات البعض منها فارغ يدور في فلك خمسة أشخاص (قدونا بيهم قد)..

* تفتح أي قناة تلقى ليك واحد بيتكلم عن الطب النفسي أو واحد باحث إجتماعي ..

* إحنا ذاتو نضمن كيف إنو الناس ديل مؤهلين ينصحونا ويتكلموا في تفاصيل حياتنا ؟؟

* نضمن كيف وقبل أيام قناة أنغام إستضافت ليها باحث وطبيب نفسي وبعد أن قدم عشرين حلقة إكتشف الناس أنه رجل من كبار (بتوعين إغتصاب الأطفال في البلد دي) ؟؟

* نضمن كيف ؟؟

* الشعب السوداني أحب محمد سيد حاج وعمل بنصائحه لأنه أحس (بصدق) محمد سيد حاج ..

* ولكن هؤلاء الأطباء والباحثين غير مؤثرين لأننا لا نحس الصدق في نصائحهم ..

* ديل في وادي وإحنا في وادي ..

* الناس دايرة تأكل وتشرب وده يجي يقول ليك رومانسية ..

* الرومانسية خليناها ليك يا علي بلدو ..

* على الدولة متمثلة في (أمن المجتمع) أن تحارب مثل هذه الأفكار (الوهمية) التي يريد علي بلدو أن يظهر بها على السطح ..

* وغايتو جنس غايتو ..

* يا استاذة : أنا عايز أفتح لي مدرسة لتعليم طقطقت الأصابع واللبان ..

ونركب صافنات ونجيبة (رومانسية) وأصلو الزول بيموت والذكرى تفضل حية ..

* و..و..

* وكان نفسي أقوليك من زمان …(قلة الشغلة بتعلم المشاط) ..