محمد الطيب الأمين: البخاف من الخائف بخوف !!

بالعربي الكسيح

485

* تجدني أحب النجم المصري محمد هنيدي بشكل مبالغ فيه .
* وقناعتي أن الذي يجري في (وريد) محمد هنيدي (شربات ليمون) وليس دم .
* محمد هنيدي في فليم (أمير البحار) سأل عريس تقدم لشقيقته : بتشتغل ايه يا حجازي ؟ رد حجازي : أنا عندي فرن شغال برش الكنافة في رمضان .. فباغته هنيدي بسؤال علي الطائر : طيب وبعد رمضان ؟
* السؤال لطيف جدا .
* زول شغال يرش الكنافة في رمضان ، طيب اها بعد شهر رمضان ينتهي بتشتغل شنو يعني ؟
* حجازي رد علي سؤال هنيدي وهو يضحك : بعد رمضان بلم الكنافة تاني .
* فقال هنيدي مخاطبا والدته : ده جاي يستظرف يا ماما .
* عريس ناس هنيدي بشتغل كنافة في رمضان وبعد رمضان بيلم الكنافة تاني .
* وجمهور المريخ الشهير ب(مدفور البلد) شغال يشجع المريخ لحدي التمهيدي .
* طيب وبعد التمهيدي بيشتغلوا ايه ؟
* بعد التمهيدي بيشجعوا الفرق البتعلب ضد الهلال .
* والله صحي .
* كل سنة كده .
* بشجعوا المريخ افريقيا في مباراتين أتنين .
* المباراة الأولى هي (ذهاب دور ال 64 أو ما يسمى بالتمهيدي) .
* المباراة الثانية هي (إياب دور ال 64 أو ما يعرف بالتمهيدي) .
* وبعد المباراتين ديل بيطروا .
* ثم ينصرفوا لتشجيع الفرق التي تلعب ضد الهلال أفريقيا .
* آخر فريق شجعوهو كان انيمبا النيجيري الذي ابعدناه وبلغنا المجموعات .
* أول أمبارح الاتحاد الأفريقي عمل مباراة الهلال وبلاتنيوم الساعة 9 مخصوص عشان (أطفال أفريقيا ينوموا) .
* وبالفعل كلمناهم وقلنا ليهم نوموا بدري .
* ما في داعي للسهر .
* البرد .
* والكورة مشفرة .
* والتلتلة ما حبابا .
* واصلا أنا بفترض إنو زول بيطير من التمهيدي حقو ينوم بدري .
* قلنا ليهم ما تساهروا .
* قالوا لا .. ح يشجعوا بلاتنيوم .
* ومشوا أندية المشاهدة وشايلين التسالي والسجائر وفول الحاجات .
* هسه فول الحاجات زنبو شنو يساهر معاكم لانصاص الليالي ؟
* ساهروا ويحدوهم الأمل .
* وجا الهلال طير النوم من عيونهم .
* وسجل هدفين كل هدف وجعو أكبر من وجع الهدف التاني .
* المهم .
* تعامل الهلال مع المباراة بواقعية في حدود الظروف والإمكانيات .
* واستطاع أن يحقق المهم في مثل هذه المرحلة .
* النقاط هي (مربط الفرس) في دور المجموعات .
* وبحمدلله نجح الهلال في تحقيق ذلك .
* نعم الأداء لم يكن بالشكل المطلوب ولكنه أفضل من المباريات السابقة .
* إذا قارنا مستوى الهلال أمام بلاتنيوم ومستواه أمام المريخ نجد أن الهلال أمس الأول كان أفضل .
* وتحديدا في النصف الأول من الشوط الأول .
* بلاتنيوم (راسو لافي) لحدي الدقيقة (25) من زمن الشوط الأول .
* نستبشر بهذه البداية وهذه الروح ونتمنى أن نرتقي للأفضل .
* ننشد هلال أفضل .
* نعمل لتقليل الأخطاء ونراجع السلبيات التي ظهرت في الأداء والتنظيم .
* يحتاج دراج أن يراجع حساباته وكذلك وليد الشعلة .
* ويحتاج جمال سالم لدعم من الجهاز الفني والإعلام والجمهور .
* غدا يلعب الهلال أمام حي الوادي ونتمنى أن يشارك جمال سالم حتى يجد الدعم ويعيد توازنه .
* لا ننكر أن الخطأ الذي وقع فيه جمال فادح وكبير .
* ولكن هذا لا ينفي أن الهلال سيحتاج لجمال في مباراة الأهلي والنجم .
* مباراة بلاتنيوم أثبتت أن سليم برشاوي لاعب كبير وسيكون له مستقبل باهر .
* كما أثبتت المباراة (ما في مدرب عاقل بيبعد بشة الصغير من التشكيلة) .
* عموما .. معالجة السلبيات هي الأهم .
* الجهاز الفني نفسه تحس بأنه مرتبك لحد ما .
* كده كده فزنا علي بلاتنيوم في مباراة حقق فيها الهلال الأهم ولكنه لم يطمنا بالشكل الذي يطرد الخوف .
* لو قلنا ما خايفين نكون كضابين .
* ولو قلنا الهلال مية مية نكون بنضحك علي روحنا .
* دايرين شغل وشغل كتير .
* وهذه البداية التي حصدنا فيها النقاط يجب أن تكون نقطة انطلاقة للأفضل .
* ثم نكرر ونكرر ، علي مجلس الإدارة أن يحسم أمر المحترفين الأجانب منذ الآن حتى إذا حان موعد التسجيلات نكون جاهزين .
* الإضافات المنتظرة ستلعب معنا ثلاث مباريات في المجموعات .
* فلابد أن تكون إضافات حقيقة تحدث الفارق وتنقلنا للمرحلة القادمة .
* نحن سعداء بهذه النقاط وما زلنا خايفين وناقصنا الكتير .
* وتحية كبيرة لجمهور الهلال وللاولترس وتحية خاصة لمحمد موسى الضي وابوعاقلة ولكل أهل الهلال .
* ونركب صافنات ونجيبة (هلالابية) واصلو الزول بيموت والذكرى تفضل حية .
* و..و..
* وقول النصيحة كلمني مالك ….(ساهرت مع إنك تمهيداوي) .

التعليقات مغلقة، ولكن تركبكس وبينغبكس مفتوحة.