محمد الطيب الأمين: هبطت ما هبطت ضاربنها !!

بالعربي الكسيح

412

* بعض أحداث وذكريات الطفولة تطارد الإنسان العمر كلو ..
* في مواقف وأحداث بتحصل وانت صغير لكن بتذكرها عمرك كلو وبتحس كأنها حصلت أمس ..
* وأكثر ما أذكره من الطفولة هو موقف تلك الأسرة التي داهمت قوات الشرطة منزلهم ..
* أسرة تتألف من أربع بنات، والدهن مقيم في السعودية..
* أربع بنات ومعهن والدتهن ..
* أسرة محافظة ومتحفظة في علاقاتها وتداخلها مع ناس حلتنا ربما لخصوصية وضع البيت الخالي من الأولاد ..
* البيت البيكون كلو بنات في العادة لا يكون مفتوحاً بالقدر الكافي..
* هذه الأسرة وبدون مقدمات اتهمتها الشرطة بارتكاب جريمة قتل ..
* خارج الغرفة كانت هنالك (أسلاك كهرباء عارية) ..
* أسلاك (عريانة) ولكنها لم تؤثر على كهربة المنزل ..
* يعني الكهربا شغالة والاسلاك عريانة ..
* ست البيت مشت طرف السوق جابت كهربجي ..
* والزمن داك عندنا ناس بيقعدوا في طرف السوق وقدامهم (عدة الشغل) ..
* واحد بيكون قاعد وقدامو (فأس وطورية وكوريك وذردية) ..
* لو جيت قلت ليهو داير (سباك) بيقول ارح ، داير كهربجي بقول ليك ارح ..
* لو قلت ليهو داير (حلاق) بيقول ليك ارح ..
* ممكن يحلق ليك شعر رأسك بالطورية ..
* عادي ..
* بشتغلوا أي حاجة ..
* وبعرفوا اي حاجة ..
* المهم المرا ست البيت دي لما مشت طرف السوق ولقت الجماعة ديل قالت ليهم دايرة لي كهربجي ..
* واحد منهم قام قال ليها أنا ..
* قالت ليهو لكن انت (متخصص) كهربا ولا بتشتغل أي حاجة ؟
* قال ليها أنا متخصص كهربا فقط ..
* مشى معاها ودخل البيت وشايل ليهو شريط كهربا ومفك بيان وسلك ..
* قالت ليهو المشكلة كلها في السلوك العريانة دي ..
* عمك ضحك قال ليها معقولة ياخ أنا (متخصص) في الكهربا ، الشغل بتاعك ده ما بياخد معاي خمس دقائق ..
* وبدأ الشغل ..
* وياريتو لو ما بدأ ..
* عمك ربط سلك مع سلك تاني والبيت ولع ..
* التلاجة ضربت ..
* التلفزيون ضرب .
* الخلاطة كانت شغالة ضربت ..
* المكوة مع انها قاعدة في الشباك ساكت وما موصلة لكن برضو ضربت ..
* والبيت ضلم ..
* بدل كان الكهربا شغالة وفي اسلاك عريانة بقت الكهربا قاطعة وما فيش اسلاك وكل الاجهزة ضربت..
* وعمك وقع في حتتو ميت ..
* سلخ السلك بطرف لسانو والكهربا ضربتو ودخلت القلب ..
* وقع ميت..
* وحالتو متخصص كهربا..
* والشرطة جات ..
* والدنيا اتلمت ..
* وشفنا ليك بنات البيت وهن ببكن ..
* ببكن لكن البكا عندهن زي الضحك والله..
* المهم ..
* القصة دي ذكرتني المريخ (المتخصص) في الاندية الجزائرية ..
* قالوا متخصص في الاندية الجزائرية ..
* وفي النهاية طلع كهربجي ساكت ..
* طلع لا متخصص ولا عندو فكرة أصلا ..
* قبل مباراة الشبيبة أي مريخابي تقابلو بيقول ليك نحن ما عندنا مشكلة الفرق الجزائرية بتخاف مننا ..
* يقول المريخ بيعرف ليهم ..
* قالوا الاندية الجزائرية عندها عقدة مع المريخ ..
* سبحان الله..
* عقدة عديل ..
* المريخ (المتخصص) سلخ السلك بلسانو والكهربا الجزائرية دخلت القلب مباشرة ..
* مسكين مات ..
* مات لحظة الولادة ..
* من التمهيدي طار ..
* وأصلاً دي الحتة البيطير منها كل سنة ..
* يا كافي البلا لا بعرفوا ثورة ولا بعرفوا مدنية ولا بعرفوا عسكرية ..
* بيطيرو في كل الاحوال ..
* عليك الله في زول بيطير في المدنية ؟
* أول مرة في حياتي أشوف لي فريق بيطير في الحكومة المدنية ..
* نحن قلنا (سقطت) عشان حالنا ينصلح ..
* قام المريخ ذاتو (سقط) ..
* تمهيدياااااااو ..
* سقط ما سقط دافرنو ..
* النجمة سقطت ما سقطت دافرنها ..
* هبطت ما هبطت ضاربنها ..
* ولسه راجيكم الوداد في البطولة العربية ..
* غايتو السنة دي بالذات يا متنا من الضحك ويا كمان الضحك كتلنا ..
* والله يكفينا شر (المصدي) اللمعتو الايام ..
* و..و..
* المريخ طلع كهربجي بتاع سوق ساكت ..

التعليقات مغلقة، ولكن تركبكس وبينغبكس مفتوحة.

WP Facebook Auto Publish Powered By : XYZScripts.com