محمد الطيب الأمين: كان قلبو في يدو والآن كمامتو في (نخرتو) !!

* بعض الرسائل نفهمها وأغلب الرسائل نمر عليها مرور الكرام .
* هذا هو حالنا حتى مع الرسائل الهاتفية.
* نتجاهل أكثرها ونركز مع جزء منها .
* هنالك رسائل مهمة والتعاطي معها يجب أن يكون بعمق وإدراك .
* وبلاشك مرض كورونا هو رسالة من الصعب تجاهلها.
* لا يمكن تجاهلها ولابد من التعامل معها بعمق .
* هي رسالة من مجموعة رسائل أرسلها الله العلي القدير فهل من يستلم هذه الرسالة ويدرك عمقها ؟
* رسالة ارعبت كل العالم .
* كل العالم قلبو في يدو .
* طبعا زمان بيقول ليك : (فلان ده قلبو في يدو) ، والقول هذا يفيد الخوف .
* يقول ليك (من شدة الخوف قلبي في يدي) .
* ومع مرض كورونا أصبحت المقولة : (من شدة الخوف كمامتو في نخرتو) .
* هي رسالة للجميع.
* مسلمون .
* مسيحيون .
* رياضيون .
* سياسيون.
* فنانون .
* تجار .
* دكاترة .
* موظفون .
* رسالة للكل في العالم .
* كبرى الدوريات الرياضية علقت نشاطها واوقفت المباريات .
* وهنالك دوريات تلعب بدون جمهور .
* أهم من هذا .. الكعبة المشرفة والعمرة ممنوعة .
* الدول ترفض استقبال جنسيات عديدة .
* خوف وهلع وكل زول في العالم (كمامتو في نخرتو) .
* مرض صغير لا علاج له لا أحد يعرف أصله وفصله.
* رسالة ولا ما رسالة ؟
* والله سبحانه وتعالي أرسل لنا رسائل لا حصر لها ولكن .
* الموت الطبيعي .. رسالة .
* الموت بحادث حركة .. رسالة .
* الموت بالحريق .. رسالة .
* الموت بالإيدز.. رسالة.
* الموت بالسرطان .. رسالة .
* لاحظ .. ظهر الإيدز قبل سنوات بعيدة (حضانته في الجسم ١٠ سنوات ولا علاج له) .. رسالة .
* ظهر السرطان (حضانته في الجسم أقل من ١٠ سنوات ولا علاج له) .. رسالة .
* ظهرت الكورونا (حضانتها في الجسم أيام وربما ساعات ولا علاج لها) .. رسالة .
* رسائل خطيرة يا مولانا ولكن .
* من يقرأ؟
* الموضوع أكبر من أن تشترى كمامة.
* فعلا والله ( هذه الدنيا لا تساوي عند الله جناح بعوضة) .
* والمؤسف إنو حتى في المرض القاتل ده الناس عايز تستثمر وتربح .
* ما بتذكروا الله وقدرة الله .
* انت تاجر كمامات ممكن تموت بهذا المرض .
* طبيب ممكن تموت عادي .
* ما في حصانة .
* ده وباء جايينا كلنا .
* عشان الاستثمار ده ما وقت .
* ده وقت التراحم والتكاتف .
* في الصين وزعوا الكمامات مجانا للشعب رغم أن الكمامة في الصين أرخص من منديل الورق .
* وناسنا ديل رفعوا سعر الكمامة (١٥) مرة .
* في واحد قال لي جبت لي كمامة بي (٢٧٠) جنيها .
* قلت ليهو دي كمامة ولا (مرتبة اسفنج) ؟
* أي أزمة تظهر دايرين يربحوا منها ويركبوا عربيات ويبنوا العمارات .
* البنزين ، الجاز، الغاز، الرغيف والدواء كل شيء عملوا ليهو سوق أسود.
* ياخ لما يظهر مرض زي ده انت أرحم الناس عسى ولعل ربنا يرحمك وينجيك من البلا.
* القروش لو لميتها بالشوالات بتمشي تخليها .
* ما تغشك الدنيا .
* الدنيا التي أجبرت العالم على لبس الكمامات .. ما تغشك .
* الدنيا التي منعت العمرة وزيارة بيت الله الحرام وقبر الحبيب الغالي رسول الله صلى الله عليه وسلم .. ما تغشك .
* الدنيا التي أوقفت النشاط الرياضي والفني .. ما تغشك.
* الدنيا التي أجبرت ترامب وسمية الخشاب على وضع الكمامة في النخرة.. ما تغشك .
* أقرأ هذه الرسائل الربانية بعمق وحسن تدبر وشوف نفسك واقف وين .
* نسأل الله السلامة والعافية لكل المسلمين في الأرض وربنا يصلح حالنا ويجعلنا من الذين (لا خوف عليهم ولا هم يحزنون) .
* و..و..
* والله في .